ratourneures_petcheur

Expressions wallonnes rassemblées par E. Pècheur.

Ratourneures da Mimile Petcheur.

Lu 24 du sètambe 1996, one èkipe do Libramontissime (Roland Guérisse) vint mu d'mamdèr dès ècsprècions, dès rimas. Dju m'ê assis duvant m'machine a scrire èt dj'ê fêt do pat't-avô a rlame.

Lu prumî d'aousse 2001, dj'ê rtapè tos cès rimas la dins l'ordinateûr.

ATANCION!!! Dj'ê sovint rupri cès rimas la dins mès scrijâdjes.

d'on gamin k'a one grosse tièsse:

" Il a one tièsse come on blokê d'sabotî"

d'on gamin rossê:

" Il a rwinè s'pére po avèr one tièsse d'ör"

d'on-ome ki vikèt trop bin èt k'avèt dès potches o dzo dès-ouy:

" Il a dès-ouy come dès ptites souris plin.nes"

d'on-ome k'avèt u lu ptite vèrole èt k'avèt dès tron plin l'frimouuse:

" Il a one gueûye come on fiyinr a galète"

d'on-ome k'avèt l'vizâdje fwârt mêgue:

" I rabrèss'rèt bin nosse gade intur lès cwanes"

d'on chôve:

" Il a l'tièsse ki dèpasse lès tchfeûs"

" I fêt l'ligne o mitan"

" Il èst crolè come on-oû"

" Il èst crolè sins tchfeûs"

" I n'a pus on pwèl sol l'chou"

" I n'a pus on pwèl sol macate"

" Il a one tièsse come one bole du djeû d'guîyes"

d'onk k'a dès grandes-orayes:

" Il a dès-orayes come dès fouyes du chou"

" Si n'avèt nin lès-orayes, lu tchapê lî tum'rèt jusk'o con"

d'on buveû k'a l'nèz tot viyolèt avou dès ptites vônes ki r'sôrtant:

" Il a on nèz ki cosse tchîr"

d'on bossu ki côze avou on rossê dins l'boulanj'rie:

" On t'a lèyi trop cûr ti valèt ?"

" Et ti, on t'a lèyi trop lèvè ?"

d'on luscâr:

" Il a on-ouy ki dit mèrde a l'onte"

" Il a on-ouy ki djou o bilyard èt l'onte ki marke lès pwins"

d'on-ome k'a on vinde come one plantche:

" Il èst tène d'ou ç'k'on mèt l'marinde"

" Il a on vinde come one afiche"

d'one fème come ça ossi:

" Ele n'a ni panse ni tète"

d'on malôde fwârt mêgue:

" I n'irèt pu long"

" Tu dirè one banze d'ochês"

d'onke k'a dès longs brès:

" Il a dès brès come dès bringonês d'voleûr"

d'onke k'a dès grandes djambes mêgues: 2.

" Il a dès djambes come dès montants d'tchiote"

èt s'il a dès pantalons fwârt courts: " T'a l'êwe al côve, valèt ?"

" I fôt on fameûs bètch po n'alèr lî kèr lu viyinr o cu"

d'on fwârt grand èt mêgue:" S'il a créchi insi so one nute, il èstèt timps ku l'djoû s'lèviche"

do min.me-ome ki s'pormine:

" Tu dirè on pardèssus ki s'pormine tot seû"

d'on-èfant k'a dès brès mêgues:

" Il a dès brès come dès cawes du losse"

d'onke ki raptiti an duvnant vî:

" I créche come lès cawes du vatche...après l'tin.re"

d'one pètite fème fwârt vousséye (bossue):

" Avou s'dos, on frèt d'dja one bèle tchame"

tchame = partie arquée d'une jante de roue de charrette, en bois.

d'onke ki stint fwârt dwa èt k'èst on pon grandiveû:

" Il a one bardache pikée o cul"

bardache = perche.

d'on fwârt mêgue avou on grand fond d'culote:

" I n'èst nin spè"

" Il a dès fèsses come dès massales du tchin d'tchèsse"

" Il a dès fèsses come dès massales du cwarnayes"

" Il a on fond d'culote k'on n'î têrèt bin mènâdje"

d'onke ki rote avou lès djambes arkéyes:

" Il a stî mô rafachè"

" Il a stî a tchfô so on tonê"

d'one comére ki ratind famîye avant d'èsse mariyée:

" Ele a stî o bwès vèy lès fouyes a l'anviyinr"

" Ele a stî al trèfe"

" Ele a tumè so on clô rouyè"

d'on cope ki s'marie...is n'sont nin bê:

" On pourèt bin catchèr l'pére èt l'mére po vinde lès djon.nes"

d'on cope fwârt pètit èt ki s'marie:

" Si ça dèjènère co on pon, ça srèt dès-imôtches"

d'on chnikeû (ivrogne):

" Il a stî spani avou one tièsse du sorèt"

" I bwarèt bin cèkes èt tonê"

" I lèrèt bin adjalèr l'gote po suçèr lès glaçons"

" Il avale ça come do ptit lèsê"

" ça duch.chint come dins dès tchôssètes"

" I spôrgnèt po one biciclète, mês il a co beû l'guidon hayîr"

dès djambes mêgues dins dès pantalons stwa:

" On dirèt dès buzes du stûve"

d'onke k'a on gros vinde:

" Il a bin sûr one botroule come one tôte ôs pomes"

" I gn'a d'dja lontins k'i n'a vu s'cayèt"

" I ratind, ça srèt on-èlèfant...i gn'a d'dja l'trompe ki passe"

d'onke k'èst mô moussè, niche èt ktchèrè:

" Va t'assîre so lès marches do tchapistrê, on donrèt cink sous"

" Si l'martchand d'lokes passèt, i t'fout o satch" 3.

d'onke k'a l'frimousse tote nwâre, ki n'su lave wèr:

" T'a stî tètèr lès troyes dol cinse ?"

il èst mwârt:

" Il a roviyè d'rèspirèr"

" Il a clô s'cul"

d'one fème k'a on gros drî:

" Ele a on cul come one pwate du grègne"

d'one fème avou dès grosses massales (joues):

" Ele a dès massales come dès fèsses d'èfant"

d'one fwârt grosse k'èst mwate:

" Cand lès viyinrs vont l'vèy arivèr, is vont tchakèr dès mwins"

d'onke k'èst malôde èt ki cratche todis:

" I cratche su mole dispouy a ptits bokèts"

d'on-èfant ki tchule tot l'timps:

" I fôrèt l'minèr a Lorcy...a Sint Brèyô"

d'onke k'a d'l'épilèpsîe:

" I tume dins lès môs"

" Il a l'danse du Sint Guîye"

do ci k'a d'l'asme:

" Il a l'coutrèsse d'alin.ne"

d'onke ki piyèrd lu tièsse:

" I n'èst nin come on-onte"

" I dvint maboule"

" Il a u on côp d'martê d'trop"

" Il a tumè so s'tièsse cand il èstèt ptit"

" I don.rèt d'dja gros po èsse come on-onte"

dès grands pîds:

" Il a dès solès come dès barkètes"

" Il a dès solès come dès bwasse a violon"

" I tchôze o mwin do carante sèt' sins l'talon"

" I tchôze do carante sèt' fiyète"

" C'èst todis lès pus mô tchôssè ki riyant dès solês dès-ontes"

d'on-ome ki parvint a fére dès sous avou tot ç'k'il atèrprind:

" Tu l'foutrè a l'ètang, i mousrèt foû tot sètch avou dès pèchons plin lès potches"

d'onke ki dit k'il a l'timps long:

" Rucôpe lu"

d'onke ki raconte dès mantrîyes èt k'î cwa:

" Tu bave èt t'cwa ki plout"

" Va dire ça a on tchfô d'bwès, i t'pitrèt"

" Man, dju n'ê nin fwin èt vo mè mètéz d'trop"

" Mougne çu k't'a d'trop po c'mincèr"

dès tatches brunes so lès mwins dès vî djins:

" C'èst dès clôs d'wachèr"

one ècsprècion po voyèr kékonde ô djâle.

" Bôche mu c..."

prumîre rèponse: " Bôche lu min.ne, t'ôrè dol mèyeûte crin.me"

deuzime rèponse: " Tu pou bin l'mète kinze djoûs al rumouye"

pokwè ç'k'on beût an mougnant ?

" Po nin tchîre dès poussîres"

tirer à la courte paille = 4.

" T!rèr al bouche"

d'onke ki tire lu djâle pa l'cawe:

" Il a mô l'sou"

" Il î manke todis on sou po fére on franc"

" I n'sét d'dja tchiptèr"

dès djon.nes omes ki vnint vèy lès coméres o Fayîs.

" Is sont fêt rcalonèr a côps d'pîres"

" Po kî ç'ku tu m'prinds ?"

" Dju n'tu prinds nin, dju t'lê la"

d'onke ki kite one discucion an dzant: " Dju m'èrva"

" I vô mî k't'ènn'aliche ku l'bon timps.

a onke k'on n'a nin vu dupouy lontimps:

" Tu vike co ?"

a onke k'on n'in.me nin èt ki dmande on sèrvice:

" Dj'in.m'rè co mî k'tu tourniche dîj mile côps so pivot"

d'onke ki mougne bramint:

" D'ou ç'ku t'mè ç'ku t'mougne ?"

a onke k'a l'kike (orgelet):

" T'a stî tchîre o pazê"...pouy ku ça s'vèyèt, is n'î alint pus.

" Il a djalè tot blanc"

" T'a d'dja vu djalè tot nwar ?"

a one fwate émocion:

" Dj'ê u lès sangs tot rodjes"

il a on grand nèz:

" Il a on nèz a dustournèr lès waléyes (averses)"

" Il a on nèz a dustinde lès boujies a l'èglije"

" Il a on nèz come on martê du scayteûs" (l'asseau)

d'onke ki n'sé jamês s'dècidèr:

" I n'sé nin d'dja cand il a mougnè assèz"

d'onke so ki on n'pout nin comptèr:

" C'ès't'on tchi o pot"

d'onke k'a dès tchfeûs spè, long èt ki n'lès rcompe nin sovint:

" I nn'a bin po rbonrèr one sèlète (selle)"

" Ponve nos-ontes, lès tchins d'tchèrète èt lès roues d' biciclète"

" Dj'ê mô l'tièsse":

" Osse lu cul, ça tum'rèt dins lès fèsses"

d'onke k'on n'in.me nin èt ki vint du v'kitèr...on dit ôs ci ki dmorant:

" Dj'in.me mî sès talons k'sès pwintes"

d'onke k'èst fwârt naïf èt ki cwa tot ç'k'on lî dit:

" Tu lî frè bin acware ku s'pére c'èst l'djâle"

d'onke ki saye todis du dmandèr auke ôs-ontes: (cigarète, aprontèr dès sous...)

" C'ès't'on bribeû"

" C'ès't'on pawyeû"

d'onke k'èst mô lèvè:

" I n'a nin co rwètè s'botroule odjoûrdu" (botroule = nombril)

d'onke ki vint sovint mês ki n'dumeûre jamês longtimps, c'ès't'on:

" Bondjoû vo m'ci, arvèy dj'èrva"

d'on patron ki n'lê wêr du timps a midi a sès-omes po mougnèr:

" Tu n'a nin co l'goléye foû dol boutche ki fôt d'dja ratakèr"

" I gn'a longtimps ku tu l'conu ?" 5.

" Nèni, i gn'orèt après dmwin twas djoû"

d'one fème ki n'arète nin d'côzèr:

" Ké babètche"

" Tot s'k'èle a rèvèt dol nut', i fôt k'èle lu racontiche do djoû"

a l'iviyinr, cand i djale:

" I vô mî on-èr du feû k'on-èr du violon"

cand ôke èst mô fêt èt k'on vourèt bin s'ratrapèr:

" Trop tôrd du clôre lu cloture cand lès vatches sont bizéyes voy"

d'one fème pètite èt nin fwârt prôpe:

" Si èle n'èstèt nin si tigneûze, on lî mougnrèt bin l'sope sol tièsse"

dès cis k'avint leû prumî re biciclète dins lès-anéyes trante:

" On dirèt on os'cul so on gruzalî"

" On dirèt on cok du four so one fènasse" (cok du four = sauterelle)

d'one chôze imposibe a fére:

" C'èst come si tu poussè conte lu grande èglije po l'ruculèr"

d'onke ki cmince a fumèr l'pipe:

" Deûs tièsse du pipe après l'min.me twiyô"

d'onke ki s'cwa pus bê k'lès-ontes:

" I gn'a pon d'glace a vosse môjon ?"

" Tu n't'a jamês rwètè dins on mireû"

d'one fème fwârt bavarde:

" Ele a one linwe come on tchoze pîd d'dij'ût' sous"

" Ele a todis l'linwe ki dèpasse lès dints"

" Ele n'orèt nin dol linwe po l'rèstant d'sès djoûs"

d'on gamin nin fwârt malin:

" Il a stî a scole cand lès mêsses alint mèchnèr" (mèchnèr = glaner)

d'onke ki s'ascrouke:

" Il a avalè po tron do dimagne"

d'on cinsi d'dja ritche ki rinture co dès bones rècoltes:

" Lu djâle tchie todis sol gros moncê"

dès meûbes du pon d'valeûr:

" Kékes chèrbins"

d'on gamin ki djoue a on bièsse djeû tot seû, su mére dit:

" Lèyéz'l fére, sol timps ki fêt ça, lu djâle nu l'tantrèt nin"

d'onke ki lê todis lès-uch drovue padrî li:

" Lôtch cul"

a on-èfant k'intur èt ki n'dit nin bondjoû:

" Rwête on pon padrî l'uch po vèy si tu n'a nin roviyè ôk'"

du kékonke ki dit dvant vos a on-onte ôk' ku vo vlî ordèr secrèt:

" Dj'ôrè bin volu avèr su linwe o dzo du m'pîd"

d'one fème ki s'dit todis malôde;

" Ele a todis pète ou vèsse"

" Ele ouke lu docteûr po one vèsse mô tournéye"

- d'one fème todis mô cwèféye:

" Ele a one tièsse come on bouchon du spines"

" Ele a dès tchfeûs come dès baguètes du fuzik"

" Ele a dès tchfeûs come dès baguètes du glu"

d'on-ome k'on vourèt bin puni (come Hitler timps dol guère):

" I forèt l'pinde pa d'ou ç'k'on pind lès pwares"

d'one fème avare: 6.

" Tu n'orè nin d'dja l'êwe k'èle cû sès canadas" (canada = pomme de terre)

- a onke ki sprogne (éternue):

" Ku l'Bon Dju t'bèniche"

i rèspond: " Et ku l'djâle t'apisse" (apissèr = empoigner)

a onke ki fume trop djon.ne:

" Lê fumèr lès strons"

a kékonke ki prind one dècizion tot d'on côp, subitmint:

" ça lî a pri come lu chite ôs vê"

d'onke k'èst pris an dèfôt:

" Il èst jin.nè come on tchin skawè"

sovint, al cîse, a onke ki grawî dins s'nèz:

" Tu n'vou nin l'grawyeû ?"

" Kîr dins l'onte tron, i gn'a one biciclète"

cand on dmande: " Ké djoû ç'k'on èst ?"

on rèspond:" Djudi!...l'ci ki s'fêt do bin c'èst por li"

(a l'place du djudi, on dit l'djoû k'on èst bin sûr)

d'onke k'a dès grandes dints:

" Il a dès dints ki courant après l'biftèk"

d'on voleûr:

" Il a dès pates a crotchèts"

" Il a lès dègts trop longs"

" I trouve todis çu ki n'èst nin pièrdu"

su fème èst malôde, li, lu ptit vî l'sogne:

" Dumwin ou après, c'èst li ki tum'rèt l'cul al nasse"

a onke ki vint s'mète intur lu kinkèt èt l'ci ki lit:

" T'ès trop spè po one tchandèle"

on bagnèt tot nu, d'onke k'avèt on ptit cayèt:

" I n'a nin co po fére vèssi one souris"

lu curiyeûs ki n'sét nin ç'k'on a dit sor li:

" Dj'orè volu èsse one pètite souris po atinde çu k'is l'ont dit sor mi"

on vint d'dire a on-onte du clôre su brayate...pus on-ajoute:

" D'ou ç'ki gn'a dès mwârts, lès-uches sont todis ô lôdje"

il a pèchè one pètite trûte èt l'pêle po l'cûre èst grande:

" On dit bin basse mèsse dins one grande èglîje"

o cafè, lu sièrveûze n'arive nin vite assèz:

" Ay la, Simone, dju vont sklèyi"

" Done nos dès sous, Simone, dj'iran bware ôt'pôrt"

d'onke k'èst fwârt conçantrè so ç'k'i fêt:

" Il èst sériyeûs come one gade ki piche"

d'onke ki dwâme bramint:

" I s'pourirèt lès-ouy an dwarmant"

d'on-ome fwârt lê èt niche:

" Il a one gueûye come on côp d'pougne dins one flate du vatche"

a onke ki vint v'rinde vizite:

" Vinè t'assîr one pêre d'eûres so chake fèsse"

a onke ki s'lève après avèr sokiyè on pon so one chéze èt ki s'sutint:

" Lès cûrs srant bon martchî, lès vê su stindant"

o ci ki dit k'ça sint mwê: 7.

" Prumî sinteûs, prumî vèsseûs"

" Vô mî pèti an sociètè ku d'avèr mô l'vinde tot seû"

lès parints sont pôves èt on dmande o ptit ç'k'il a u po s'Sint Nicolas:

" One mwin vude èt l'onte rin d'dins"

c'èst impossibe:

" I gn'a rin d'impossibe a l'ome, çu ki n'sé fére, il lê la"

lès parints èstint ritche èt vla l'valèt ki dèpanse tot:

" Tot ç'ki vint rif è va d'raf"

èt si on avèt fêt ci, èt si pn avèt fêt ça...:

" Si...si...si ma tante avèt dès roues çu srèt one tchèrète"

Man dj'ê fwin:

" T'a fwin mfi, c'èst one bone maladîe ça"

d'onke ki s'rèspond vite:

" Ah! ça, i n'fôt nin lî rotèr sol pîd"

d'on vantard ki sét todis fére tot:

" C'èst nin dol mèrde, c'èst po z'è fére"

cand on a stî fwârt subarè èt émocionè:

" Dj'ê u lès sangs tot rotches"

" Si on m'avèt foutu on côp d'coutê, dju n'orè nin sin.gnè"

cand on rèpète dès consèy a kékonke èt ki n'î rwête nin:

" C'èst come si tu lî tchantè Malbrouk so l'èr du Dj'ê mô l'ouy"

d'one ki fêt todis dès maniéres:

" Ele fêt todis dès chimagrawes"

avèr on maleûr ou one tchèdje ki dèpasse sès fwaces:

" Dj'ê n'ê one d'aclapéye sol dos"

" Dj'ê n'ê one d'aclapéye sol panse"

cand on avèt d'dja u deûs nêsances, on gamin èt one gamine:

" Asteûr, i fôt l'violoneûs po fére dansèr l'cope"

duvant one comére avou ki on n'vourèt nin coutchèr pask'èle èst niche:

" I forêt d'dja avèr fwin d'djote po mougnèr dès-olines"

duvant one djon.ne fème ki court èt k'a one grosse pwètrine ki bat l'bèrloke:

" C'èst l'fièsse o paradis, lès sints dansant" jeu de mots, sint = sein.

duvant on-insouciyant ki dit todis ku ça n'pout mô:

" Pout mô, poumô a brulèt s'môjon èt i n'èra co pon"

do ci ki dit todis "Sègneûr, oyéz pitié d'nos-ontes"

on-ajoute " Et foutéz dès pîres ôs-ontes"

lu mére ki mènace su gamin d'one bafe:

" Tu va avèr one imôtche a cink dègts"

cand on rit d'on maleûr d'on-onte:

" I n'fôt nin rire dès mô tchossès, i gn'a dès solès po tortos"

formule po dmandèr pardon k'on fèt rèpètèr ôs nayifs:

" Pardon al cawe do ramon, on ptit côp so lès rins, ça fêt do bin"

duvant dès ècspècions impolies avou "panse, gueûye, crèvèr":

" I gn'a k'ti èt lès bièsses k'ont one panse"

" I gn'a k'ti èt lès bièsses k'ont one gueûye"

" I gn'a k'ti èt lès bièsses ki crèvant"

cand on a fwârt fwin:

" Dj'ê l'miss' ki tire" miss' = pancréas.

- d'on manteûr: 8.

" Tu l'trouvrè dins l'm... jusk'o con, i dirèt co ku ç'n'èst nin vrê"

" Dz'éme on mot dou la Catrine!"

" Dol lôme" lôme = miel.

lu mére ki s'fâche so l'èfant ki br^et po rin:

" ôrd' tès lârmes po cand dj'mour'rê"

timps dol guère, d'on djon.ne ome k'alèt travayèr al cinse:

" I travaye po sès dints" (gratuitement, pour être nourri)

d'on-ome fwârt mèchant:

" I n'a rin d'bon al camisole"

d'on mènâdje todis an dispute:

" Is s'batant todis come dès rawijeûs"( rawijeûs = aiguiseur de couteaux)

" Dju cwayè bin fére":

" Tu cwayè, tu cwayè, lê cwâre lès bèguines, èles ont mî l'timps k'twè"

a kékonke k'on dèt ôrdèr:

" Si tu boudje d'one pate, dju t'câse l'onte"

cand l'pére ou l'mére avint côpè les tchfeûs o gamin (mô côpè):

" Il (èle) lî a rtournè l'crameû sol l'tièsse èt il (èle) a côpè tot ôtoû"

(note: ôdjoûrdu, l'èfant srèt al mode)

( crameû = pot en terre cuite, largement évasé, pour écrèmer le lait)

d'onke ki s'dit catolikemês kin'l'èst wêr:

" Il èst catolike come lès bourikes, jusk'ôs gn'gnos"

d'on fème k'a one grosse pwètrine:

" Ele done bin kinze canètes"

d'on cope ki s'marie èt k'is l'ont dupus d'carante ans chacun:

" On va fére do noû avou do vî"

a onke ki raconte dès mantries one après l'onte sins s'arètèr:

on lî côpe lu parole an dzant: "Et l'tron du m'cul, c'ès't-on chofla"

d'on neû fêt a one cwade èt k'on n'sét dusfére:

" On-a co sèrè ça a fèrnok"

d'onke k'arive todis tôrd al sîze:

" C'ès't-on racaweû d'sîze"

d'onke ki dit tot yon o groupe "Dju va tchîre":

" Nos' tchin î va bin sins l'dîre"

d'on cope ku l'ome èst mêgue come one chète èt ku l'fème èst crôze a pètèr:

" C'èst môrdi crô èt miércrudi dès sanes"

a l'ome ku l'fème prind dès alures du vî:

" Il èst d'abôrd timps dol ruvinde si tu n'vou nin piède duso"

" Tu pou bin fére one tombola avou èt n'pon prinde du numèro, po nin l'rugangnèr"

d'on mur k'èst fêt pa on-alcotî: (alcotî = mauvais ouvrier)

" C'èst dwa come mès gn'gno cand dj'si assî"

d'on vî cope ki n'mousse pus foû:

" Is sont todis o cwin do feû come deûs vî tchè d'sane"

d'onke k'èst todis d'ou ç'ki n'fôt nin:

" Il èst todis d'ou ç'ku lès bok su sucant"

d'one fème k'èst todis assise:

" Ele va atrapèr dès fèsses come dès volètes" (volète = claie à tarte)

a onke ki n'arète nin du v'dire dès mèchanstès:

" T'a nin on bokèt d'cwade ?"

" Pokwè fére ?" 9.

" Po loyèr t'linwe a m'cul"

d'on bokèt scrit sol gazète:

" Lu papî s'lêt scrîre"

a kékonke k'èst assis a l'ombe:

" Tu dmeûr'rè d'dja longtimps come ça sins t'rapwazèr"

- c'èst mwince ku rin:

" C'èst mwince ku rin ? c'èst lès-ochês d'one vèsse"

d'on gamin k'aprind a djouwèr d'on-instrumant an cwîve:

" Choûte...tu dirè on cwarneû ôs gades"

cand on vèt on-ovrî ocupè pa one mwêche paye: (mwêche paye = mauvais payeur)

" Tu vè c't'ovrî la ? Il orèt l'timps long "

" ? "

" L'timps long après sès sous"

on m'dèt co dès sous:

" Avou c'ti la...cand t'lès-orè, tu lès oss'rè"

a onke ki fêt todis rèpètèr ç'k'on lî dit:

" Dis on pon...nos' curè nu dit nin deûs côps mèsse po lès min.mes sous"

d'on-ome ki rote vite:

" Tu dirè ki va chèrè l'êr a cate"

d'on fème ki fêt l'pôze èt k'a mètu trop d'êwe èt ki lî manke dol farine:

" Ele a mètu Sint Pîre al mêye"

il èst tot seû, kwè vousse ki fiche tot'djoû ?

" I n'a k'a agnèr dins s'cawe èt djouwèr avou lès bokèts"

twas maladies invantéyes pô blagueûs du ç'timps la:

" lu rititis' = lu botroule ki s'dusvisse"

" lu noufla = lu tron do cul ki toûne a nougat"

" èle cuchère tos lès draps d'lit...èle a one dint ki lî pousse o cul"

a onke ki v'vèt do matin d'bone eûre ki v'dit: " D'dja lèvè ?"

" Ay va, c'èst pus facile po rotèr"

d'onke k'a on tron a s'pantalon:

" Il a l'cul foû"

èt si l'panê dèpasse: " I n'srèt jamês avocat, i pièrd sès papî"

a onke ki n'èst wêr malin:

" Cand on-èst vê, c'èst po on'an, cand on èst bièsse c'èst po tote su vîye"

a onke ki n'èst wêr dustouyè:

" Dju n'ê jamês vu on-amôl come twè"

" D'ou ç'k'il èst t'pére ?"

" Dins s'tchumîje avou l'tièsse ki dèpasse"

al place du dire "I vout pèti pus yon ku s'cul"

" I va s'fére on tron dins l'dos"

d'on gamin fwârt gros (obèse):

" Il èst crô come on tchin d'botchî"

timps dol guère du 14-18:

" On tron a on mous'mint, c'èstèt on cratchon d'Almand"

d'onke k'in.me bin d'rabrèssèr:

" C'ès't-on ratchoufteû"

a dire fwârt vite:

" Twas cate tchèrtèyes du bèl' vèt' sètch' chèt'"

a onke ki v'z'a fêt on grand plêji:

" T'ôrè one boutche al novèl-an" 10.

po n'pus avèr lu nèz rotche ?

" Bwâre du pus...i dvinrèt violèt"

a one fièsse du famîye, après one tchanson:

" Gn'a nin one tchanson

Kin' kin' kin' kin' kin' kin'

Gn'a nin one tchanson

Kin' fôt bwâre on ptit côp"

ça n'èst nin fwârt l'êwe:

" C'èst fwârt l'êwe, ça pwate lès batôs"

d'onke a ki s'camarade vout donèr dès consèy, ki sêt ku ça n'srèt nin sî:

" C'èst come si tu l'sucrîjè so one fouye du chou...èt l'donè al gade"

" C'èst come si t'pètè dins on sèyè d'êwe"

a tâbe, duvant on bokèt d'tchôr ki n'èst nin fwârt cû:

" Ele n'èst nin cûte, çu tchôr la, èle n'èst nin min.me adwarmue"

d'onke ki v'sî todis partout:

" Dju n'ê nin dandjî d'on sî-cawe"

" Kin' aplôze" (aplôze = vésicatoire)

a on djon.ne ki s'plint du d'avèr co pon d'moustatche:

" Tos lès djoûs avant d'alèr dwarmu, tu mèts dol poline du pouye o dzo do nèz"

(poline du pouye = crote de poule)

a onke ki s'dit ote: (ote = fort fatigué)

" T'ès ote...c'èst côzu tchèna,ça" (ici ote = hotte / tchèna = panier)

cand on toke a l'uche:

" Intréz...si c'n'èst nin l'djâle"

cand i tone:

" C'èst l'djâle ki djoue ôs guiyes"

cand i gn'a arc-an-cièl:

" C'èst l'djâle ki bat s'fème èt ki marie s'bwèssale"

cand on lî côze du s'bèle mére, come i n'l'in.me nin i rèspond:

" Bèle mére! Bèle mére! Lu tchin k'a mougnè s'bêtè a crèvè do mô d'panse"

d'on-ovrî k'èst fénèyant:

" Il a co cassè on mantche u choupe ôdjoûrdu...an s'asployant dso"

o ci ki dit mèrde ôs-ontes:

" Mougne lu t'mèrde, t'orè l'gueûye tot'vèt'"

" Mougne lu t'mèrde, c'èst l'mwètî du t'nouriture"-

dins one famîye k'a bramint d'èfants:

" I fôt lès foute a l'uche po lès comptèr"

d'on grand bènèt:

" C'èst on choûte si plout"

cand i manke ôke:

so one tôte: " T'a mètu lès cèrijes an courant voy"

on costume trop court: " On t'a pris mèzure an courant voy"

a on tchin ki vint ôtoû dol tchine:

" Atatche lî on casson ou one casrole al cawe" (casson = casserole écaillée et bosselée)

d'on mwê ovrî:

" C'èst on' alcotî"

" C'èst on tchondronî"

cand on vantâr è sôrte one trop grosse, on chouteû lî lance:

" Et l'londmwin, i plovèt!"

on-èfant fwârt fèb', mô nouri: 11.

" C'ès't'on tchintchireû"

d'onke k'in.me bin d'rabrèssèr:

" C'èst on ratchoufteû"

d'onke ki n'èst nin dèbrouyard:

" I n'sé d'dja duscramiyèr deûs gades"

ké novèle ?

" Avou on tonê, on fêt deûs cuvèles"

cand on a cassè kék tchôse:

" Cratche so lès bokèts, rucole lès èt prie l'Bon Dju ki djale"

d'onke k'avèt télmint mô:

" I s'twardèt come one coloû"

d'onke k'èst trop pwartè so l'sècse:

" I pèrirèt come lès èchalotes...pa l'cawe"

" Ké novèle vwèzin ?"

" ça va, ça vint, ça bèrloke èt ça pind !"

d'one fème assèz bèle mês niche:

" Tu n'l'aduzrè nin d'dja avou on ramon d'dî sèt' mètes"

cand on toûne a bourike kékonke addé vos:

" Si on m'è dzèt on'parèye, dju m'agne o dos èt dj'cour voy"

a onke k'èst an dèfôt, on stint l'indècs gôtche sor li èt on frote l'indècs dwa an dzant:

" Calalê...calalê..."

(Back homepage) Alans rzè al mwaisse-pådje.

(Back menu lexicologie) Alans rzè al mwaisse-pådje des diccionaires

(Back menu dictionnaires général du wallon) Alans rzè al pådje minrece do Diccionaire di Tot l' Walon