On djoû dè mârs nonante-cate, onz è pôzè noûs pîs su les tères d' Amèrike latine. On, c' est mi, èt ma fame k' astét a ç' momint la, ma bwêçale. Pocwè l' Amèrike Latine ? Èt pocwè nin ? Onz è cmincè nosse pèripe, ki dèr'rè vint mwès, pol Mexike. A chîje eûres èt dmèye dè l' après-non.ne, i fèjét dja nwâr. Onz atèrichét a Mecsico, li pus grande vèye do monde ! Vint-deûs miyons di dmorants. Elle è on oûte rècôrd, lu cî d' la mégalopole la pus poluwéye dol planète. Onz analét normâlmint po lontins, sins savèr po ostant, lu nombe dè djoûs, dè smin.nes, dè mwès ou d' anéyes k' alét dèrè noste avanture. On dvét rwètu a chake dolar, po permète a nosse rêve dè sèy lu pus long possipe. Prèmîre ètape : Mussè foû d' l' ayéroport èt passè les controles des dwanes. O !, on n' avét rin a s' rèprotchè, si ç' n' astét k' on plét mussè â payis avu cink pèlicules foto, èt k' mi, dj' a-n avé dipus d' deûs çants. Po controlè les djins, a Mecsico, les dwanîs ant on sistème impârcial, on feû a deûs coleûrs, roudje ou vert. To poûsses so on boton ; si c' est rodje, on t' rètoûne les satchs èt si c' est vert, t' ès trankile. Djè m' aprotche a tronlant sins l' mostri, èt djè bouche so l' boton. Djè frûle one sègonde, … deûs sgondes, … trwâs sgondes : la vète lampe s' alume ! Po on coûp, dj' ê yu dol chance â djeû ! Onz è pris on tacsi, one vète cocsinèle. Les tacsis sant tos les minmes, des VW cocsinèle. Gn è k' la coleûr ki tchindje, padècoû djène, padècoû vert, sûjant la soce di tacsis. Et onz è dmandè â tchâfeû on lodjmint nin trop tchîr. Mins atincion, nin trop tchîr por zèls èt nin " nin trop tchîr po Gringo " (1), come is djant. Paskè, i sondjant kè si onz est " Gringo ", onz est plin d' brokes. Alors' , todi bin lzî prècizè çou k' on vut. I nos è mon.nè dins one bèle mâjon coloniale, on rèsse du l' influwance du l' Urope, l' Espagne, pol coûp. Onz è mètu lu poû d' afères k' onz avét dins one tote pitite tcham.me èt pus, onz è stî fè on ptit tour so la plèce çantrale dè Mecsico, " lu Zoccalo " èt c' est jusse a ç' momint la k' on s' è vrêmint rindu compte k' èl trisse décôr dol vèye la pus poluwéye do monde n' astét nin po rire. La catèdrale, luméye pas des grossès lampes, rèssonét a one vedète dol tchanson su sin.ne. Les fachês d' lumîre fèjint des grands cônes come si la plèce astét rimpliye di fumijènes. Ké fumîre, ké polucion, k' on respire la, kè ces vint-deûs miyons d' omes, dè fames èt d' afants respirant. " Ê, Manu, la catèdrale, èle pantche, k' on dîrit, ou bin c' est mi k' è la berluwe ? " Ele pantche vrêmint èt voci pocwè. Cand les Espagnols ant vnu an kinze çant dîj-noûf èt k' il ont dèscouvru la cité Astèke, cisse-cile su trouvét â mitan des fagnes. Dè ç' tins la, la tère astét gwârdjéye d' êwe. Mins èl sukèpiadje batét adon s' plin. Gn avét todi dpus d' djins èt il avint dandjî todi d' pus d' êwe èt onz è vite oyu souwè les tères. Asteûre, les napes d' êwe duzo tère sant co al minme plèce, mins ele sant vûdes. Èt daboûrd, ele mènaçant d' s' afondrè, ca tot l' pwès dol vèye aspoye dèssur zèles, èt les tassè todi pus fwârt. Vola pocwè ki l' catèdrale pantche èt k' les mâjons s' crèvâdant. Après la ptite pormon.nade, onz è rintrè dins nosse pitite gayole. Prèmîre nute d' one longue sèriye ; c' est nosse veû a tos les deûs. Lu landmwin â matin, prèmîre ocupâcion : on s' è mètu a tossè tos les deûs come des démons èt on motchét tot nwâr. L' êr est bin poluwé, s' i falét co s' a convinke. Èt pîs, on s' lave èt on s' musse. Èt vla l' prèmî contrètins por mi. Come dj' èl dijé pus hoût, on n' è wêre di bagadjes. Ca, cand onz ava pou wit' djoûs d' vacances, on prind tot çk' i fât, po n' nin divlèr rèlavè. Mins cand on kite la mâjon po des mwès (espèrans l' ), on n' prind k' lu strik minimom : on pijama, deûs camuzoles, deûs trwâs calçons, trwas cate pêres du tchâsses, one tchèmije, on pulovèr, on fin paltot, one calote, deûs ptits draps po s' choûrbu èt one pêre du bons solés. Èt c' est tot çk' i gn avét dins nosse baluchon. Djè rtoûne tot l' satch … Nondidju, dj' ê rouviè mes calçons. La fame mu prusse one dè ses culotes. Ebin , c' est la k' onz è rmârkè kè ça n' est nin côpè dol minme manîre. C' est come si on mètét des trukes dins on filet trawè ! Dj' ê dit al fame : " Lu cî ki vut voyadjè lontins rèwête a sa monture ". Èt nosse monture, ç' astét lu porte-manôye. Insi, dj' irans mindjè dins la ruwe ou su les martchîs ; Por mi, ça n' astét rin : dj' avé dja cnuchi ça chîs mwès a m' prumî voyadje â Pèrou, an catru-vint neûf, nonante .Mins por lèye, ç' a stî one oûte pêre di mantches. Vos n' mi croyèz nin ? Adon, wêtèz d' imajinè tos ces alimints la , po brâmint, inconus â batayon : les pwins â slo, la tchâr padzo les moches èt les pèchons dl' ocèyan, k' on dîrit k' ils ont vnu a pî. Èt tot ça dins des ruwes nin fwârt rasgotantes, â mitan dè mile èt mile djins an vwètures, bus èt camions, vômichant one sipèsse fumèye nwâre. Sins rouviè non pus, â dzeûr di noûs tièsses, l' èpèye di Damoclès : l' êwe, pwerteûse dè totes soûrtes dè mizéres èt do cholèra ki, a ç' momint la, fèjét des ravadjes. Dins ces condicions la, on voyadje kèmince todi pa les trwas wits, come djè ls ê oukè : wit eûres po dwarmu, wit eûres po voyadjè èt wit eûres sol trône, si vs vèyèz çku dj' vu dire. Après one kinzin.ne dè djoûs, onz è nosse vitesse du crwaziére. Prinde one carte, lêchi tumè l' dwat èt dmandè comint k' on fêt po nn alè dins ç' viyadje la. Sovint, on s' atindét rèsponde : " Mins, gringo, gn è rin a vèy la. Et dè leû responde : " Prèmîrmint, djè n' sus nin gringo, ca non-amèrikin, mins " crudo " (cru, nin cût) èt deûjimmint, si vs dèjèz k' i gn è rin, adon, ça nos intèresse sûrmint, ca i fêt k' i gn arè dja pont d' tourisses, ki purdèt sovint les djins po rin, tot come leûs manîres èt leûs uzadjes. Et on srè chûrs dè trouvè la des djins ki fant di Mècsike, çu k' il est anute. Paskè les " tampes précolombiens ", Aztèkes, ou Mayas, fant partiye do passè. Nu confondez nin ; gn è ossu les Incas, mins c' est dpus â Sud : Ekwateûr, Pèrou, Bolivie. On pèrnét don l' bus k' on nos avèt dit po nos rinde al plèce ku nosse dwat avét tchwazi. On coûp la, on s' pormon.nét dins l' viyadje po pârlè avou les djins, a respondant a leûs kèsses, come zèles âs nosses. Discutè avu ces djins la, ç' astét come si chake coûp, lu tins s' arètét. Ç' astét des parantêses, des momints a mète dins des crotches ; èt vos m' plèz crware, des parantèse, gn a yu su vint mwès. Mi k' inme tant d' pârler. Dij' coûps, çant coûps, mile coûps, rèpètè les minmès afères ; mins , si on n' astét nin d' acôrd, on n' avét k' a pârti ou ruvnu voci. Nu jamês rouviè k' onz î astét addé zèles èt kè c' est a nouzoûtes d' ènnalè aviè zèles, a nouzoûtes dè les prinde come il astint èt nin l' contrêre. Mins, i fât bin l' avouwè, gn a des coûps k' ça srè bin malâjî ! Djè fèjé des fotos, ca c' est bin la m' mèstî : des nwêres èt blankes po des esposicions èt des diyas di couleûr po dinre des confèrances, cand on rintèrrè. Ça m' fèjét don deûs trwas aparèys pindus â coû. Èt i fât bin dire, ça atrinnét padècoû les pârladjes. Minme si on lzî djét, k' des sous, on nn' avét wêre. Wêre por zèles, ç' astét dja brâmint ! Et minme s' i n' savint nin la valeûr dè ces aparèys la, la rvinte lezî ârit permi dè mète tote ène lêtrîe dins leûs spinâds. D' â lon, les fotos d' djins n' cåzint ku rârmint des problèmes ; mins, d' pus près, ç' astét one oûte pêre du mantches. Lèzî dmander, estét l' mwinsse a fè ; ca, i n' fât jamês rouviè kè zèles ossu, c' est des djins come vos èt mi, èt nin des curiosités po les tourisses. Ça vs plêrit, vos, si on illusse inconu, a deûs mètes di vos, brakét su vosse cwâr on aparèy foto, po " hapè " voste imâdje ? Sovint, la rèsponse astét on rfus, ca, ç' astét volè leûs âmes. Tolminme, avou kékes dolars, ci-cale, come pa mirâke, dèmèrét dins leû cwâr èt i n' sondjint pus a-z analer. Mins dj' ê rfuzè tchake coûp a ç' djeû la., ca ç' astét rognè on poû dpus dins nosse boûsse. Eûreûzmint, il arivét padècoû ku ma dmande ariveûche a èsse riçûte . Après avèr catoûrnè dins tot l' viyadje, on pèrnét la minme voûye k' â matin, mins a pîs, ç' coûp ci. La manîre ku dj' avins po rascontrè les djins nos fajét routè on bon vint kilomètes par djoûr. Mins dj' avins come ça lu mwayin d' tot vèy. Ça î est ! Il è vnu, l' tins d' kitè Mecsico èt d' analè dèscouvru l' Mècsike. Anfin, one pârtiye d' ci-ci, lu Sud èt l' Ess, ca l' Mècsike, asteûre, est pus tchîr k' on n' sondjét. A nosse dèpart du Beljike, on sondjét k' on pourit dmèru chîs mwès dins ç' payis la, frontîre avu ls USA. I nos fârè rastrinde çu programe la, si on vut plèr porsûre nosse prèmîre idéye, si cisse-cile è jamês egzistè ! Si onz cmincét pol Mècsike, c' est po la rêzon ki sût. Après " Mu " Pèrou, dè 89-90, dj' ê promètu a Manu, ku dj' asté co a l' ayéroport du Lucsambourg, divant minme dè lî dire bondjoû, k' on djoû, djè l' ramon.nri la-drî . Avu l' tins, les budjets nos permètint d' analè. Mins la comére è toumè fwârt malâde ; onz è don rèpwartu l' voyadje. Çu k' est mwês po one afère est sovint bon po one oûte. Nosse cagnote grochichét. C' est insi k' â Pèrou, onz è rajoutè l' Ekwateûr èt la Boliviye. Pu, tot rwêtant one cârte, lu Chili èt l' Ardjintine n' astint nin si lon k' ça. Pocwè don dè n' nin sayè d' î alè ossu. Et ça n' est k' poû d' tins dvant nosse dèpârt, k' onz è rajoutè l' Mècsike. Nosse voûye astét don asteûre dèfiniye. Mècsike, èt pus, l' avion ou batê jusk' a l' Ekwateûr, Pèrou, Bolivie. Si ça nous astét possibe, onz î rmètrit l' Chili èt l' Ardjintine. Vos vièrèz pus târd, kécfèye, kè ç' porjet la è subi brâmint, brâmint d' tchindjmints, a fwêt des rascontes èt des umeûrs. Gn ârè, si ça vs intèrèsse, vint mwès d' avantures, du flâwes, du sbarmint, d' èmèrvèymint, èt co bin d' oûtès afères, alèz. Mins, atincion, sins fè l' ronflant d' sèy lu seûl, ni d' sèy on grand scrîjeû. Claudy Raskin, èl prumî d' may 2006. (*) " Gringo ", c' est on mot po dire on Amèrikin do Nôrd (USA) , mins i mètant totes les blankes pês dins l' minme satch.