Badasses

On manèdje di badasses, cwand i tome, i casse.
[Spot lîdjwès]

Såye po l' tèyåte è walô dè payis d' Hêve [Trembleur, L43] à djouwer so ô tins avou ô seûl pèrsonèdje (eune feume).

Ahèsses

Eune cwène-couhène avou 'ne sôr di côtwêr po magnî drèssî èt ô Aliving´@, come ô dit asteûre : eune plèce avou 'ne tåve èt dès tchèyîs, ô sålô po l' tèlèvûziô (fôteûy, canapé, årmå...). Ô cwårtî come ènn' a bråmint.

PRUMÎRE PÅRTÊYE

Cwand l' teûle su lîve, lu feume, k'a åtou d' cékante ans, mousse à pîds d'hås foû dèl tchambe à dwèrmi. Èlle a so lès rins eune rôbe du tchambe. Su tièsse èst tote duwåyemêye. Èle frote sès-oûy. Èlle a l'êr d'avu må dwèrmou. Èle passe duvant l' mureû. Su r'louke.

Mô Diu ! Come ô d'vint. Dju n' mu wèze cåzî pus r'loukî è mureû. Ké visèdje tot rapleûti ! Èco ô pô, èt dj' raviz'rè 'ne souwêye catche. Dju n' va portant né vîrer come lu måråsse dèl fåve èt måtrêtî m' mureû dusk'à tant k'u m' mosteure eune imådje du mi pus-adawiante : Duhez-m' dô, mureû, mu bê mureû, ku dj' so l' pus bèle. I n' mu dèbit'reût k' dès boûdes. Ô n' pout né èsse èt aveûr sutu. Volà ! C'èst l' vêye çoula. À chake èsproûve su pleû ! Fåt creûre ku dj'ènn'a oyou, dès-èsproûves... Du totes sôrs : dès rascråwes, dès rossês guignons... Mins ossu, du tins-in tins, kékès djôyes. Lès p'tits pleûtions, là, al cwène dès lèpes, åtoû dès-oûy surtout... ni sèreût-ce né lès tèmôs dès kékes moumints d' djôye ku dj'a-st-oyou ? Ca, dju n'a né k'tapé tote mu vêye à målvå, à n' rascoyî k' dès miséres. Dj'a-st-avu, ossu, dès bôs moumints. Come turtos : eune rôye du crås, eune rôye du mêgue... Mutwèt deûs rôyes du mêgue po 'ne rôye du crås : ci sèreût pus djusse... Cèst tot l' minme drole, lu vicårêye... Èt pwis, tot l' môde èl sét, ç' n'èst né å pîd dè lét k'ô-z-èst so s' pus bê. Lu nut´ vis-a tote racrafougn'té. Lu cwêr... èt lès-îdêyes. C'èst vrêye, vormint, ku dj'a må dwèrmou. Èt si dju n'î prin né astème, dju va duv'ni hêre, dju va toûrner à vîle hèyåve feume. Èt ça, dju n' vou né. Ridrèssîz-ve, dô, vîle carcasse ! Lu vîle carcasse va mostrer k' èlle a co d' l'èhawe èt ku ç' n'èst né co oûy k'èle su va rinde... (Èle sôdje.) Surtout né oûy.

Èle su rind vè l' machine à cafè. Su chève eune jate. Drèssêye.

Ça, c'èst l' côp d' corîhe ku v' rimèt´ d'adram´ po tote lu djoûrnêye. Ça rènôde lu mécanike. Ô crås neûr cafè, là, né dèl lapète, savez, nèni, dè fwêrt cafè tot bolant ku v' plake å stoumac´, avou cék ou sî bokèts d' souke duvins. Eune jate ou deûs. Ték'fêye cwate... ou cék... Ou pus´ minme. Ci n'èst né po ré k'ô m' lome Marêye-Cafè ! Mins dj'a bé l' dreût d'aveûr, mi come tos l's-ôtes, mès p'titès marotes. Ås cisses du mès pratikes, ås cis d' mès malådes ku m' couyonèt tot m' trêtant d' caf'teûse, dj'èlzî èsplike ku l' cafè è-st-ô vaso-dilatateûr, ku ça fêt mî cori l' sôg´ duvins lès vônes, ku l' cafè è-st-ô tonifiant cardiaque, ku ça rind l' coûr pus vigreûs, ku l' cafè è-st-ô diurétique, ku c'èst bô, cwè, po sêwer lès r'nos... èt k' ça fêt pihî... I riyèt l' pus sovint èt pinsèt sûr'mint ku l'infirmiére ku dj' so cwîre pus vite à s' duner 'ne bone rêzô dè lap'ter chal èt là su p'tite jate du cafè ku d' sayî dè côsî sès malådes.

Èle su drèsse, va vè l' lîve là k'èle sucrît lès visites k'èle deût co rinde.

Dj'î tûse, dju n' deû né roûvî d'aler, d'vant l' dîner, fé leû pikûre å vî Tchèdôre èt al grande Zélîye. Ô-z-a bê èsse dimègne : eune infirmiére, cwand-èlle è-st-à s' côte, c'èst come lès docteûrs, èles duvèt-èsse pindawes à ô clå : tofêr prètes à chèrvi. Dj'a tofêr inmé m' mèstî ; ça, c'èst sûr. Mins, djèl deû ruk'nohe, i m'arive dès côps, come oûy, d'èsse ô pô flasse. Dju so come plinte du lê-m'-è-påye. Èt dju m' dumande : à cwè ça chève-t-i, tot çoula ? C'èst k' vo-m'-là tote seûle asteûre. Èt dj'a come l'îdêye ku dju m' nantih´ al vûde. Pocwè ? Pocwè fé djoûr-èt-nut´ lu trik'nonote ? Todi cori, chal èt là, todi hay èvôye... Cori, po n' né tûzer mutwèt. C'èst ku, à tûzer trop lô, dju m' tûz'reû sote : ô vét å môde, ô n' sét pocwè, ô crèh´, ô-z-ouveure, ô-z-avîlih´ : treûs p'tits toûrs come ô campinêr, èt pwis ô 'nnè va, lès treûs cwårts dè tins so l' bètchète dès pîds po n' né d'rindjî l's-ôtes. Kéne comèdêye lu vêye !

Èle va vè l' meûbe. Avise eune photo. Èle su r'ssêsih´.

Dju m' lê aler, là. I n' fåt né. Ô n' vike né por lu. Lu vêye n'ést plêhante ku cwand-ô vike po l's-ôtes. Èt lès-ôtes, por mi, c'èst mès pratikes... èt c'èst, duvant tot, mu fêye. Angèlike, ku dj' l'a loumé. Èlle a stu l'andje du tote mu vêye. Vét-ans k'ô-z-a viké èssôle. Nos deûs, totes-èt-seûles, l'eune po l'ôte... èt l'ôte po l'eune. Ah ! Dj'ènn' a dès sov'nis : dès sagnes tèribes cwand-èlle èsteût malåde ou cwand djèl duvéve ratinde, sacwantès nut´, ô pô trop lôtins. Mô Diu ! çou k' dj'a transi à r'doter tos lès måleûrs ku lî årît polou toumer so l' tièsse. Mins d'eun-ôte costé èle m'a d'né tant dès djôyes èt dès côtint'mints : èlle aprindéve bé è scole, èle n'èsteût né rôleûse... Né lêde nô pus : ô bê p'tit bokèt d' feume, minme si c'èst mu kèl dit. Ça, ô pout dîre ku dju so fîre du lêy. Mins volà, parèt, i-n-a todi ô djoû ku lès p'tits oûhês s'ènêrèt èt cwitèt leû nid, si tchôd k'i seûye... Èlle a rèscôtré ô brave valèt. Èt i s'ôt mètou à leû manèdje. Dju n'a ré à dîre. Èt volà ku m' seûle fêye a lèyî s' mére tote seûle. Ah ! come èle su plêhîve tant à dîre, ås cis kèl fît assoti, k'èlle èsteût fêye ûnike d'eune mére ûnike, k'èle ni d'véve né m' pårti è deûs avou 'n-ome k'åreût stu s' papa... Lu hic, duvins tot çoula, c'èst ku dju m' ritroûve asteûre tote seûle, tote fin mwér seûle. Lu d'sseûlance, dju k'nohe. Èt, po-drî vos, lès côps d' bètch dès djins ku v' kudjåzèt pace ku vos v's-avez fêt fé eun-èfant tote seûle, come dit l' tchansô. Dju k'nohe tot çoula ossu. Come si c'èsteût si sépe, dê ! Fåt-i vormint ku ç' seûye oûy, djustumint oûy, ku dju m' rapinse du tot çoula ? Come si ô-z-èsteût vrêmint mêsse du s' dèstinêye... !

Èle s'achît, sôdjeûse, s'astipe lu mintô so s' min.

Po k'mincî, a-dj'dju jamåy cwèrou à v'ni chal mu rassåver è ç' pitit cwårtî rèscoulé, cåzî foû dè môde, à cori du tos lès tins d'ô manèdje à l'ôte ? D'acwêrd, dj'inme bé çou k' dju fê. Mins, ç' n'èst né vrêmint çou k' dju voléve. Dj'a bé stu oblidjêye d'inmer çou dj'a fêt. Nuwance ! I-n-a lôtins d' çoula. Trinte ans. Come lu tins passe... I m' sôle ku c'èsteût îr. Aprame aveu-dje oyou m' diplome d'infirmiére ku lu scale, là k dj'aveû fêt mès-ètudes, mu ric'manda ad'lé ô grand docteûr ku féve dès foû målåhêyès-opèråciôs à l'ospitå d' l'ûnivèrsité, èt ku cwèréve eune êdeûse du prumîre fwèce duha-t-i. Èt come dj'aveû stu - ku djèl di co mu minme - prumîre du m' promociô, dju fouri l' cisse k'ô lî èvoya. Lu hazård, lu peur hazård.

Èle su drèsse. Èt r'djowe lu sin.ne du si-intrêye å chèrvice dè profèsseûr.

Pawoureûse ku dj'èsteû, dô ! Po èsse duvins mès p'tits solés, ça, dju l'èsteû. Dju n' loukîve ku mès bètchètes. Dju n' wèz'reû né djurer ku dju n' lu a né fêt 'ne sèrviteûr. Dju m'è sovin, come si c'èsteût îr. Il èsteût d'vins ô grand burô, tot blanc, avou 'ne grande finièsse qui d'néve so tote lu valêye. Ô grand ome, avou ô grand blanc vantré. Pus d'ô mète ûtante. Intrez, mam'zèle, mu d'ha-t-i avou 'ne si doûce vwès ku dj'ènnè fouri tote mouwêye. Cwand dju r'lèva lès-oûy, dju fouri d'vant eun-ome bråmint pus djône ku djii n' m'aveû mådjuné : aprame åtou d' trinte-cék ans èt dédjà profèsseûr. Èt avou çoula, ô fwêrt bèl-ome, avou 'ne tièsse tote crolêye èt, d'vins lès-oûy, eune loukeûre d'eune téle doûceûr ku dj' creû bé ku m' coûr a blamé por lu duspôy ci djoû-là. Mins volà : il aveût 'ne feume, il aveût dès-èfants. Dju n'a ré dit. Dj'a catchî mès sintumints. (Sospîr) Èt c'è-st-insi ku dj'a duv'nou s' collaboratrice, su prumîre assistante, su dreût brès´, lu cisse k'i n' su poléve pus passer.

Èle va vè l'årmå èt prind ô gros lîve, eun-albom´, là k'èlle a rachou tos lès-årtikes dès gazètes ku djåzît d' lu.

C'èst k'ô 'nn'a fêt dès-opèråciôs, dès transplantations cardiaques. C'èsteût novê du ç' tins-là. Lès gazètes ènnè djåzît. Èt l' té-ès-èf. Èt l' tèlèvûziô. Ås cis kèl kèstionît, i d'héve todi ku s' rèyussite, c'èsteût l' rèyussite d'eune èkipe. Èt i n' måkéve måy du m' mète èn-avant.

Èle toûne lès pådjes.

Cwand dj'î tûze, ô 'nn'a fêt dès-opèråciôs èssôle. Ki durît doze eûres, catwaze eûres. I-aveut cwéze, vét djints åtoû dè malåde k'ô-z-opèréve. Èt i m' voléve tofêr tot près d' lu. C'èst mu ki lî d'néve tos lès-instrumints k'i lî faléve, èt nol ôte, mu ki r'ssouwéve su frôt cwand-i gotéve, ki r'nètîve sès bèrikes cwand lès veûles èstît plins d' wapeûr... Nos-avans passé insi dès cintin.nes èt dès cintin.nes d'eûres, tot près ôk du l'ôte, à transi po l' vêye dèl djint ki nos t'nîz d'vins nos mins... Ô pout dîre çou k'ô vout, mins viker lès minmès transes èt lès minmès victwêres, ça raproche. A-t-ô jamåy tûzé à çoula : eun-ome, ou eune feume, passe bêcôp pus d' tins avou sès colègues k'avou l' cisse ou l' ci k'a marié. Dju k'nohîve mî m' mêsse ku s' feume nèl kunohéve. Èt s' fåt-i èwarer k'ariva çou k'i d'véve ariver ? I coréve d'eun-ospitå à l'ôte, d'ô payis à l'ôte, du congrès an simpôziom´ come lès djints d'hèt. I pårtihéve su syince èt si-espéryince avou tos lès grands profèsseûrs dè môde ètîr. Èt dju l'a sûvou : à Paris, à Rome, an Norvêje, duvins lès-Amèrikes... Dju l'an´muréve et dju l'inméve, sins moti... èt i m' faléve èsse binåhe insi, à l'inmer è catchète, sins k' lu-minme nu s' dote du ré. Å minme tins, lès-an.nêyes passît, dju m' sintéve fribote à migote duv'ni vîle come eune dulouhêye k'åreût måké s' vicårêye. I m' sôléve ku dju toûrnéve al vûde, avou å fôd du m' coûr dès bês sôdjes rèvolés, dès-îmådjes inmêyes ku passît come lu foumîre å vint. Dju m' sintéve vûde... sins nolu d' lîbe po fé bate mu coûr, k'åreût polou èsse lu k'pagnêye du m' vêye èt du m' vîyèsse, sins nolu po m' duner l' boneûr d'èsse mére èt l' djôye dè viker po-z-aclèver dès binamés r'djètôs... Dj'aléve so mès trinte ans èt, po l' pus sûr, dj'èsteû bone po duv'ni 'ne vîle djône fêye kumoudrêye, mågriyeûse èt cagnèsse, sins k'nohe lu pus doûce du totes lès djôyes k'eune feume pôye avu, lu seûle bone, lu seûle vrêye, lu djôye dè mète å môde eun-èfant da seune, k'èst come ô deûzinme lu-minme. Èt lès djoûs passît... dj'èsteû come duvins ô rècoulis´, sins loumîre, sins nole êreûr, sins-èspwêr...

Èle tûze. Lôtins.

Èt volà. Ô djoû, c'èsteût å Canada, c'èst sûr ki dj' m'ènnè sovin come si c'èsteût oûy, dju m' ritrova è s' lét. Duspôy adô, dju fouri s' crapôde. Kî a r'cwèrou kî ? Dju n' sé pus. Du tote manîre, c'èst Pîrô parêy : ô s'a trèbouhî èssôle. Ô-z-aveût d' l'atirance ôk po l'ôte... Èt volà ! Èt volà... C'è-st-ossi sépe ku çoula.

Èle su r'louke co è mureû. Su chève eune jate du cafè.

Dj'èsteû co djône, adô !

Èle ruvint so lès-albom´.

Mins, duspôy ci djoû-là, ké calvêre !

Èle toûne lès pådjes.

Måy pus 'ne seûle foto èssôle. Ô s' dumèsfiyéve du lès gas'tîs, du lès fotografes, du lès Apaparadzi@..., come s'is-avît l' gale. I faléve fé lès cwanses dè n' né s' kunohe, du s' kubouter minme, po k'ô n' pinse né sor nos. Dîrè-dje ku dj'a sofrou lès sèt´ creûs à catchî çou k' dj'åreû volou fé k'nohe du turtos ? Dju m' kumagnéve l'åme à cwèri kumint 'nnè v'ni foû. Mins, pus´ lu tins passéve, pus´ dju l'inméve, pus´ i cwèréve à s' catchî. Tos lès ratrêts d'Årdène... èt d'ôte på, tos lès trôs pièrdous, nos l's-avans batou foû, po catchî nos radjoûs, nosse avinteûre. I t'néve tél'mint à s' réputåciô, pus´ k'ås poupås d' sès-oûy. I m'a-st-apris çou k' c'èsteût ku l' fåstin'rêye. Dj'a fêt l' djan´nèsse : i m'a-st-ac'sègné lès rûzes èt lès mintes, pace ku l'ome ku dj'inméve aveût tchûzi d'aveûr deûs vizèdjes, deûs feumes, deûs vikèdjes... Dju m'a mågriyî dusk'à n' poleûr pus dwèrmi, ni pus poleûr magnî. Dju m' lanwihéve èvôye, come si dj' souwéve so pîs.

Éle su rècrèstêye.

Dusk'å djoû ku dj' m'a rèzolou à prinde eune grande dècîziô : dju n' m'a pus ahouwé du nou dandjî. Dju n'a pus fêt astème à ré : èt dj' m'a r'trové grosse... grosse du lu. Èt hayèt'mint èco. Ossi vite dit, ossi vite fêt. Pus vite fêt ki dit, minme. Mô Diu, ku dj'èsteû binåhe... Eun-èfant ! Eun-èfant da lu !

Èle su tint keûte. Èle sôdje. Pwis, èle su mèt´ èn-alèdje, èle su dusmantche minme.

Dju côtéve k'i sèreût tot côtint, fîr dè vêy ku nosse amoûr, por mi an tout cas, n'èsteût né k'ô houhou, ku dj' poléve, por lu, duner l' mèyeû d' mu minme, mu d'ner à lu, mu d'ner tote à lu, lî sacrifiyî tote mu vêye... Boubièsse ku dj'èsteû... Cwand-il l'a sèpou, dju n'a måy vèyou eun-ome s'èpwèrter come i l'a fêt. I s'a èmôté come ô lècê. I m' lès-a dit totes. Il-èsteût tél'mint d'mantchî k'i n' su poléve kumêstri. Il a stu dusk'à m' dîre, lu, lu docteûr, ku dj' n'aveû k'à... l' wèster èvôye...

Silince

I-n-a, asteûre, pus d' vét-ans d' çoula. Dj'a pris mès clic et mès clac èt dj'a corou èvôye... come eune voleûse. Dj'a cwité l'ospitå, dju m'a rindou duvins ç' cwårtî pièrdou, dju m'a mètou à m' côte... Dj'a-st-aclèvé m' fêye, tote seûle, dè mî k' dj'a polou. Èt dj' m'a fêt roûvî... Pinséve-dju... Ni volà-t-i né ki, aprame mu fêye s'aveût-èlle mètou à s' manèdje, ki, lu minme samin.ne - i-n-a dès droles d'atoumances tot l' minme - lu minme samin.ne dô, volà k'i raspite... come ô mwêrt ki, tot d'ô côp, s' mètreût à raviker. Volà dô, come s'i n' s'aveût ré passé, k'i m' tèlèfone : Dj'inm'reû bé du v' riveûy, m' duha-t-i tot séplumint. Lu, ki n' s'a måy dumandé çou k' dju duv'néve, si dj' vikéve co minme, ki n' s'a måy tracassé po sèpi si dju l'aveû oyou ou nèni cist-èfant-là, k'a miné s' vêye come s'i n'aveût d' keure du mi ni d' si-èfant : Dj'inm'reû bé du v' riveûy... Po toumer du m' maclote, ô pout dîre k'il a rèyussi s' côp : pus paf ki mi, dju moûr... Èt i voléve minme tot fî dreût mu v'ni veûy chal, è m' cwårtî... Ahote là, a-dj'dju dit ! I n'a måy oyou d'ome chal èt ç' n'èst né oûy k'ènn' årè, né minme vos. Mi djîsse, c'èst m' djîsse ! Dju n' té né camatche, mi. I m'a tél'mint dusmantchî ki dju lî åreû d'bité dès grossîr'tés...

Èle tûze.

Àl fé dè côte, dju m'a lèyî à dîre. I m'a invité å rèstôrant. Dj'a dit awè. Èt c'èst oûy.

À pårti d'asteûre, èle su va moussî po sôrti. Ci n' sèrè k'eune côvôye éte lu tchambe à dwèrmi, lu såle du bagn èt l' colidôr. Èle su va sovint r'loukî è mureû.

Dju voreû tot l' minme vèyî l'êr k'il a, asteûre, lu ci ki m'a dit ô djoû : Chaskeun´ sès problémes. Vos l'avez volou. Vos l'avez bé volou. Asteûre, i fåt fé avou. I m' l'a falou fé tote seûle, awè ! I-n-a lôtins d' çoula. Dju so portant mèrviyeûse dè sèpi çou k'èst duv'nou. Kimint a-t-i polou viker cès vét-ans sins mi, adô ku, mi, i n' s'a né passé ô djoû ku dj' n'åye né tûzé à lu ? Èt dju n'a måy volou mète eun-ôte à s' plèce.

Èle sôdje.

Mins, kumint m' va-t-i veûy, lu ? C'èst ku dj'a dès crèt'lês, là, åtou dès-oûy... èt l' forçale dè hatrê, là, èlle a kékes pleûs... èt mès tchifes ku r'toumèt...

Èle su fêt sès oûy.

Çou k'i fåt fé, à mi-adje, po réparer des ans l'irréparable outrage : c'èst cåzî dè pordjètèdje, hin, çoula. Dè neûr so lès påpîs, ô côp d' crêyô so lès sorcis, eune gote du bèle-dame duvins lès-oûy...

Èle s'arèstêye.

Ni dîreût-ô né k' djèl vous andoûler ?

Èle su r'sêzit.

Nèni, çoula ! Mins il inméve tant mès-oûy, lu doûce loukåde k'us-avît, duhéve-t-i, si clére, si franke, come eune êwe si clére k'i s'î åreût vol'tî nèyî.

Ô tins.

Duhéve-t-i.

Èle su fêt 'ne bèle tièsse.

Èt mès dj'vès k'ôt dum'nou tot tchènous. Eûreûs'mint ku l' cwèfeûse s'ètind à r'mète dèl coleûr là k'i fåt, à fé dès croles cwand-i dum'nèt fènèsses...

Èle mousse èl tchambe. Rinteure avou totes sôrs du moussemints. Lès mèt´ duvant lêye. Su r'louke è mureû. A totes les rûzes po tchûzi.

Si dj' mètéve çoula ? ... Nèni... Pus vite çoula... Dju n' mu pou dècider. Ku va-t-i dîre ? Ku ratind-i d' mi ?

Èle su r'louke du d'vant, pwis è héfèsse.

Ènn' a bråmint à mi-adje ku n'ôt né sèpou wårder leû lègne come mi. C'èst k'is-inmèt bé lès feumes dèfilêyes, dê, lès-omes. Sûrtout cwand ô mèt´ al môde dès top modèls supèsses come dè fi d'årca... Èt come lès-oûy toûrnèt avou l' môde...

Èle su mousse du piyâne à miyâme. Èle ruvint à chake côp so l' sin.ne avou 'ne sacwè d'ôte.

Mins dju m' dumande çou ki m' tchôke à m' gålioter d'eune sufête manîre ? Volà k' dju m' surprin à m'atitoter come si djèl voléve prinde duvins m' hèrna....

Èle su ratûze.

Nèni, çoula. Ç' n'èst né vrêye. Dju n' vou né. Ci n'èst né po çoula... Mins l' ci ki tint ô pôk à lu, il inme du s' mostrer so s' pus bê costé ! Å vrêye, dju lî vou mostrer ku dj' m'a polou sètchî foû du spèheûr tote seûle, sins lu...

Avou l'êr du can´dôzer.

Ré n' m'èspétche dè d'ner ô bô côp d'mowe, èdô. Èt pwis, dju lî vou sûrtout fé sinti tot çou k'il a pièrdou...

Ô tins.

Po dîre lu vrêye, dju fruzih à l'îdêye ku djèl va r'veûy. Dju n'sé né co çou k' dju lî va dîre. Dju so come... cwahe, là. Dju m' dumande bé çou ku m'a tchôkî à lî dîre awè cwand-i m'a invité. Lu curiôzité, mutwèt. Dju n' so né curieûse portant... mins dj'inme bé d' sèpi. C'èst tot. Èt pwis, il a fêt ramôter å djoû tant dès sov'nances...

Èle ramasse lu cabas k'èle su chève po sognî sès malådes èt s'apôtêye à 'nn' aler.

Puski c'èst dit, è-bé c'èst dit ! Dj'îrè å radjoû k'i m'a d'né. Dju n' roûvêye né mès pratikes : deûs pikûres à fé... Pwis : k'i vasse come i s' vôye ; i n' mu pout todi ré ariver d' må.

NEÛR

Èle rinteure. Tape sès moussemints chal èt là. Bodje sès hôts solés.

Dju so come ô pô hinêye, là, mi ! Fåte d'aroutinèdje, dandj'reûs ! I-n-a si lôtins ku dj' n'a pus mètou lès pîs d'vins dès si grantès mohones : ô rèstôrant avou cék fortchètes èt treûs steûles sorlô ô lîve dès grantès glotès gueûyes... Ô pout dîre ku ça m' candje dès fritches èt dès mosses d'amô Bouboule. Èt dès manîres, dô... ku dj'aveû roûvî... Dès djins pus' ki chèrvûles : eune sakî po prinde vosse pal'tot, eun-ôte po-z-atchôkî 'ne tchèyî duzos vosse cou, èt dès caramadjôyes, dès mirlifitches èt des houp'tatas... Ô-z-a bê dîre : c'èst dès chimagrawes, tout çoula ! Mins, du tins-in-tins, ça fêt - kimint dîre ? - ça v' fêt... racatchô tot-avå. Sûrtout cwand-ô s'a d'vou afêti, duspôy pus d' vét-ans, à magnî l' crosse pus sovint ku l' milète dè pan. Ci côp-chal, dju pou dîre ku dj'a magnî so tos mès dints... Minme si ç' n'èsteût né po çoula k' dj'èsteû là, dju m'a tot l' minme ripahou tot m' sô... ku dj'ènn'a come atrapé l' broûlant, là !

Èle va vè l' côtwêr, vûde eune poûre duvins ô vêre, mahe duvins avou ô kulî. Èle lu beût.

Là ! Ça va mî !

Ô tins

Dju v's-åreû rik'nohou inte mêye : c'è-st-insi k'i m'arin.na tot-z-arèstant s' blinkante vwètûre ad'lé mi. C'èst sûr, dô, k'u m' duvéve ruk'nohe, pusk'ô s'aveût d'né radjoûr à ç' moumint-là, è cisse plèce-là ! * Prindez plèce +, dit-st-i co. Èt i m' duha minme : Ô s' f'rè ô bètch tot-rade, cwand n' sèrans arivés. I-n-a 'ne téle flouhe du vwètûres ku dju m' va sètchî foû vôye å pus rade. Ô s' f'rè ô bètch tot-rade ! Bé, n'a nou risse : n' volà-t-i né, mu di-dje, k'i dècide dédjà por mi ! Mins dju m'a têt. Èt dj' m'a côtinté dèl rawêtî è cwèsse. Mô Diu, ké bê ome ki c'èst co ! Come i s'a bé wårdé : eune bèle pê tote hålêye come s'i riv'néve dès spôrts d'iviêr, dès spès dj'vès tot crolés come à vét-ans, aprame kékes gris å tinre dèl tièsse, èt sès mins, dô, sès bèlès fènès mins so l' volant du si-ôto, sès mins k'ôt fêt tant dès miråkes, avou mi, pwis sins mi...

Èle sôdje.

Dju m'a surpris à m' rapinser du ç' tins-là... Eûreûs'mint k'ô-z-ariva. Tot l' passé mu r'môtéve å coûr èt m' dunéve dèl miråcolêye...

Silince.

C'èst drole, hin, lu dèstinêye ! Ké pouvwêr avans-gne so lès-évênemints ? C'èst lès-évênemints ki tchûzihèt à nosse plèce ! Èt nos n'avans k'à danser come lu mèstré sone. Tot-å côtrêre minme, cwand dj'a volou fwèrci l' dèstinêye, ô pout dîre k'èle m'a drol'dumint raspité å visèdje !

Èle tûze !

I m'a fêt sov'ni dè tins d'adô. I m'a d'bité du lådje è long tote su cårîre : lu ric'nohance k'a-st-avu dès grands docteûrs ki fît lès minmès-opèråciôs k' lu, lès voyèdjes k'a fêt åtoû dè môde, lès côfèrinces k'a d'né... Il a djåzé d' lu, du lu, tot l' tins d' lu. Tot djusse s'a-t-i bé volou sov'ni ku n's-avîz ovré èssôle, minme si c'èsteût lu l' grand mêsse èt mi lu p'tite êdante fwêrt modèsse. Adô-pwis, il a djåzé du s' mohone, eune foû grande mohone k'a-st-al campagne, du sès-èfants, k'ôt fêt dès grantès-ètudes èt k'ôt dès bèlès plèces. Après cwè, tot d'ô côp : Dj'inm'reû bé dè k'nohe vosse fêye, lacha-t-i. Dj'a måké d' m'ècroukî. Il aveût bé dit : mu fêye. Èl voléve kunohe. Dj'aveû bé oyou : i n'aveût né dit nosse fêye ; i n'aveût né dit kèl voléve RUk'nohe. C'èst tot-ôte tchwè, çoula ! Ni poléve-t-i, vormint, sôdjî k'à lu-minme ? Là k'asteûre mu fêye èst tote ac'lèvêye, i s' vout bé lèyî aler à prinde du sès novèles, pace k'i vout avu l'êr d'aveûr dès bèlès manîres... Fez rimpli m' vêre, a-dje kumandé.

Èle beût ô vêre d'êwe.

Dj'ènnè fouri tote cacame ! I m'a falou beûre deûs, treûs gros goûrdjons po m' ravu. I voléve kunohe mu fêye ! Lu ki n' s'a måy fêt nou må d' tièsse por lêy, lu ki m'aveût dit, cwand-il a sèpou k' dju ratindéve, ku dj' n'aveû k'à m' sètchî foû-marmèce tote seûle, lu ki m'aveût lèyî là come eune pôve aban.n'nêye, volà k'i voléve kunohe mu fêye, lu ki s'a k'dût come... ô coucou. Dju m'a r'ssêzi èt dju lî a dit : Mu fêye, c'èst lêy ki dècid'rè. Dju n' lî a måy ré catchî. Dusk'asteûre, èle n'a måy ricwèrou s' papa. Dju lî vou bé fé l' mèssèdje. Mins, dju v' l'acèrtinêye : c'èst lêy, èt ré k' lêy, ki dècid'rè... Né vos !

Come si dj' n'aveû né co stu assez makêye, i m'a co pus´ èsbarloufé cwand-i m'a tapé å vizèdje k'il èsteût vèf, k'il aveût pièrdou s' feume après 'ne fwêrt lôgue maladêye.

Èle ni bodje pus.

Duvant l' mwêrt, dju n' sé cwè dîre, mi ! À cisse novèle, dj'a toumé come è 'ne blèsse ! Dju m'atindéve à tot, såf à çoula ! Ça m'a cassé brès´ èt djambes. Jamåy dju n'a sohêtî çoula à 'ne djint...Né minme al cisse k'èsteut l' feume da m' galant. Èt i m'a d'bité cisse novèle-là come çoula, cåzî come si ça n' lî féve ni tchôd ni freûd... Èt tot d'ô côp, dj'a vèyou ku dj'aveû d'vant mi 'n-ôte ome, eun-ome dusseûlé : eun-ome k'a fini s' cårîre, pusk'i, à si-adje, i n'èst pus profèsseûr, k'a pièrdou s' feume èt k'a dès-èfants rèvolés å cwate cwènes dè payis. Cist-ome-là, k'a passé tote su vêye è sam'rou dès-oneûrs, afêti à-z-aveûr totes sès djins à gngnos d'vant lu, volà ku, cist-ome-là, duvant mi, m'avise subitemint fwêrt fråhûle, tot pièrdou, tot d'wêbi, ni sèpant ni cwè fé ni wice aler... si bé ku dj'ènn-èsteû à m'ènnè fé må cwand-il a mètou s' min so mi gngno èt k'i m'a dit, dreût d'vins lès-oûy : Pocwè n' vinrîz-ve né viker avou mi ? Nos ratrap'rîs insi lu tins pièrdou... Avou s' min so mi gngno ! Come si, dèdjà, dj'èsteû da lu ! Come s'il aveût dès dreûts sor mi ! D'ô costé, dju m' féve må d' lu èt d' l'ôte i m' féve môter l' sîme èl tièsse : dju boléve d'arèdje. Né ô seûl moumint i n'a mådjuné ku dj'åreû polou aveûr eun-ome è m' vêye ; né ô seûl moumint i n' s'a d'mandé si dj'aveû oyou åhêye dè viker, si dju n' m'aveû né sansouwé l' cwêr èt l'åme à-z-ovrer po-z-ac'lèver m' fêye ; né ô seûl moumint i n'a cwèrou à k'nohe lès sintumints ku dj'aveû ou k' dj'åreû polou aveûr por lu... Duspôy lu tins... I dècidéve por mi, come si lès vét-ans k' dj'a passé duspôy k'i ma lèyî toumé ni côtît po ré...

Èle hosse lès spales come eune ku n' sét cwè tûzer.

Dj'aveû d'vant mi come eun-ome bouhî djus, ku l' sôrt n'åreût né spågnî, eun-ome d'ot'tant pus´ moudri k'èsteût bé lô du s'ènn'atinde. Èt dju m'ènné féve må, mi, ku n' l'aveû måy roûvî, k'aveû passé tote mu vêye à m' rissov'ni dès kékes moumints d' boneûr ku n's-avîs passé èssôle ; mi ki m'aveût môté l' tièsse, fêt dès-îdêyes... Volà ku l' miråke èsteût fêt : il èsteût lîbe, tot seû, èt i m' vinéve ricwèri. Po ô pô dju m'åreû lèyî aler, dj'åreû polou mådjuner lu vêye åhêye ku dj'aléve avu, lès grands-ôtéls, lès vacances å solo treûs côps l'an.nêye, dès chèrviteûrs, ô djårdinî... Tout çou k'il a, dô !

Èle sôdje.

C'èst ku dj' m'åreû lèyî aloûrdiner, dê, si dju n' m'aveû sov'nou du tot çou k' dj'a èduré duspôy ku dj' m'a r'trové tote seûle. Èt pwis, su min so mi gngno... su min so mi gngno... I m' fièstîve come ô fièstêye lu kême d'ô dj'vô po l' mêstri. C'èsteût roûvî k'avou l'adje ô d'vét dumèsfiyante èt k'ô n' su lêt pus côter dès galguizoûdes come eune madrôbèle k'åreût 'ne tièsse du houlote. Nôna, dju m'a rindou côte ku dj' m'aveû fêt d' lu eune îmådje trop bèle po èsse vrêye : dj'ènn' aveû fêt ô grand ome. Èt tot d'ô côp djèl vèya hêre èt grigneûs, djèmihant èt barbotant, avou dès roumatikes ou dès-ôtes mèhins, èt s' kidûhant rapôrt à mi come ô... propriyètêre. Mins volà, dju n' so da nouk, dju m'apartin à mi tote seûle. Èt pwis, nos n'avans né sûvou lès minmès vôyes. Ô manèdje come lu ci k'i voléve èmantchî ni poléve èsse k'ô manèdje raplaké avou lès bokèts du çou k'ô n'aveût né minme sutu capåbe d'adjansner èssôle. Ô manèdje come lu nosse n'areût stu k'ô måva manèdje du badasses. Èt, come dit lu spot, ô manèdje du badasses, cwand i tome i casse. L'ome k'èsteût d'vant mi n'èsteût k'eun-ètrindjîr, l'ètrindjîr k'aveût tofêr sutu.

Èle va vè lès-albom dè tins passé.

Ô n' duvreût jamåy cwèri à r'vèyî lès djins k'ô n'a pus vèyou duspôy eune tchoke. Ô s' fêt dès-îdêyes, ô rambèlih´ sès sov'nis... èt ô r'tome du fwêrt hôt cwand l' hazård vis fêt rèscôtrer lès cis k'avou l' tins vos-avez fêt pus bês k'i n'èstît.

Èle sôdje.

Nôna. Tot côte fêt, çu n'a né stu 'ne bone djoûrnêye. Dju l'aveû è l'åme : lu lê-m'è-påye ku dj'aveû è coûr mu féve saveûr ku dju n' duvéve ré ratinde du bô du cisse djoûrnêye-chal. Èt ç'a stu bé vrêye. Volà co 'ne vûziô k'ènnè va. Dj'a côpé coûrt à nosse radjoûr. Cwand nos r'veûrans-gne ? a-t-i d'mandé. Dju lî a rèspôdou k'à mi-îdêye, i valéve mî, por lu come por mi, k'ô n' su r'veûye pus. Èt dj' m'a såvé.

Ô moumint.

I-n-a dès djoûs comme çoula : cwand-i k'mincèt må, c'èst po tote lu djoûrnêye. Come eune sôr du fatålité, là !

Lu tèlèfone sone.

Ah ! C'èst vos m' fêye ! Vos-avez dèdjà sayî du m' soner ? Awè, dju m'a stu porminé al vêye, po prinde l'êr... èt m' candjî lès-îdêyes, là ! Tote seûle... awè ! Nôna ! Ré d' noû... Nôna. Vrêmint ré... Èt vos ? Eune grande novèle ? Dju deû m'achîr ? Oh-oh ! Volà, c'èst fêt ! Èt cwè, dô ? Vos v's-alez racrèhe ? D'eune pitite crapôde... Vos savez dédjà çou k' c'èst. Èt tot va bé ? Loukîz à vos, dô, m' fêye, sûrtout lès prumîs tins, èdô ! Èt dju sèrè l' mårène. Ku dj' so côtin.ne ! Ku dj' so côtin.ne ! ... Dihez : èst-ç' ku djèl porè wårder... du tins-in-tins ? Awè ? Mins, d'acwêrd ! Ossi sovint k' vos volez, vos l' savez bin ! Ni roûvîz né dè passer por chal, èdô ? Dumin, awè... À d'min...

Èle racroche.

Volà ku dj' va duv'ni grand-mére... Grand-mére, c'è-st-ô bê gråde, hin, çoula ! Tos côtes fêts, cisse djoûrnêye, c'è-st-eune bone djoûrnêye... Dju troûve, mi...

Lu teûle tome.