Les scrijadjes Louwis Baidjot.
Des blantches cigognes a foûjon.
Si on cåzot in pô dl' èclipe !
L'abé Martin ére curé d' Cucugnan. Bon coume lu pwin, franc coume l'ör, il inmot ses djans coume in pére.
Il årot sté l' pu eûreû des oumes, et Cucugnan årot sté in paradis su tère si les Cucugnanès lî avint fwêt in pö plêji. Mê, i nn' astint bin lon…. !!!
Les aragnîes fiyint leus twayes dins l' confèssional ; lu djoû d' Pâke, les ostyes dumèrint dins le fond du cibwâre. Les djans frèkantint pu vite lu cafè ku l'èglîje. Les fames n'arètint nin d' glawiner su l' dos des ôtes ; les oumes travayint l' dimadje, putot k' d' aler a mèsse ; les djon.nes courint drî les hâyes avu les couméres, et dj' a passe !
Les prônes a messe, person.ne nu les choûtot et nosse pôve curé astot bin dusnorté, loû ki priyot l' Bon Diu du n' nin l' lêchî moru duvant k' i n' ûje ramon.né al bèdjrîe tous ces måcroyants la d' Cucugnan.
Fåt crwâre k' il savot sû s' î prinde avu l' Bon Diu, ca l' dimadje d' après, cand il è monté al chêre du vèrité, il avot sa ptite idéye.
Mes fréres, dit-i a-z atakant, vous n' alèz putète nin m' crwâre, mê, çu nute-ci, dju m'ê trouvé a l'uch dou Paradis. Sint Pîre m' è vnu ovru a m' dijant :
- Tins, don, vla l' Curé d' Cucugnan ? Cè k' i gn è ki n' va nin ? Vous n' m'ôz nin l'êr dins vost' assiète anute! Nu dmèrèz nin sul soû ! Intrèz dlé mi, dju srans mî a kwète pou cåzer.
- Bin, bon Sint Pîre, vous ki tnèz l' grand lîve et la clé, vous m' dîrîz bin coubin k' z' ôz d' Cucugnanès ou Paradis ?
- Dju n' pus rin vous rfuser, don, l'Abé, assîèz- v' ! Dj' î vons wêtî.
Et vla Sint Pîre ki s' mèt' a nanchî dins les ridans après les lunètes. I dovure lu lîve et cmince a l' foyter à malounant: Cucugnan, c' est bin ça don ? Cu… cu… dj' î arivans. La, dj'î sans : Cucugnan !
- Bin, mu pôve curé, z-alèz yèsse décu ! Wêtèz vous minme ; la pådje est toute blantche. Nin ène âme ! Nin in Cucugnanès.
- Mê, c'est nin possibe, don Sint Pîre ; dju m' doutos bin n' a wêre trouver, mê cand minme, nin iynk, c'est in pô fwârt ! Vous n' trouvèz nin, vous ? Oh, mon Diu, mon Diu, ké maleûr ! Mê, vous v' rindèz compte. Nin iynk, nin yène. Kèsku dj' ê bin polu fwêre ou Bon Diu pou z-èsse aflidjî insi ? Mi k' es leu Curé dpwis kinze ans ! Dju n' a rvins nin, ca dju n' a rvins nin !
Alons! Alons, l'Abé Martin, nu v' foutèz nin la tiêsse ou meur pou si pô. Vous n' a plèz rin, don ! Si v' n' a trouvèz pont, cillé, c'est bin chûr k' i sont ou Purgatwâre pou fwêre leu ptite carantin.ne. Moutô k' on les va vèy ariver du d'ci pô.
Mê , grand Sint Pîre, s'i sont ou Purgatwâre, pèrmètèz k' dju les vaje wâr et lzî cåzer, pou wêtî d' les rmète su la drète vôye. Vous n' plèz nin mu l' rufuser !
Bin chûr ku non, m' fi, tchåssèz vite ces solés la, ca les tchmins sont mwês, da ! La, c' est bin ! Asteure alèz-z-a pa ç' tchumin ci ; continuwèz tout drèt jusk' ou grand uch a mwin drète. Vous wârez bin, il est plin d' nwâres crwâs pa ttavå. Vous n'åréz k' a toker. On v-z ovurrè.
Et vou m' la vôye, pa in niche tchumin, in pazê, putot, plin d' ronches et d' chôdriyes, avu partout d'es tayans et d'es mouchètes ki n'arètint nin d' piker, des vipéres ki chouflint s'les costés et des grandes dugnêsses ki m' grètint la figure. Dj'ê tègué, savèz, pou-z ariver ou grand uch a mwin drète, dju n' vous dit k' ça. Et mu vla a bèrdoûchî pou k' on m' ovure.
Kîski toke insi, don ?
C'est mi, l' Curé d' Cucugnan.
Du kwè ?
Du Cucugnan, CU – CU – GNAN . Vous n' counichèz nin ?
Ène minute, ku dj' wête lu botin.
Ou dbout d' in moumint, vla in grand nwâr anje ki s'amon.ne a l'uch et m' fwêt inter ou bûrô. Ene grande clé d' diamant lî pindot al çinture.
Assièz-v' la. Dju nn' ê k' pou ène minute.
Et crac, et crac, voulla ki continuwe a grèter la plume dins s' gros lîve, co bin pus gros ku l' çî d' Sint Pîre. Pîs al fin, i rlûve la tiêsse pou m' dire :
Kèsk'on vint fwêre avå ci ? On-z est piêrdu ?
Nin ttafwêt, bel anje, c'est Sint Pîre ki m' avoye pou sawè si z'ôz des Cucugnanès ou Purgatwâre.
Dès cwè.. k' vous djèz ?
Des Cucugnanès, des djans d' Cucugnan, cwè, dju sus leu curé.
Ah ! l'Abé Martin, si dj' tins bin.
C'est ça, tout jusse !
Et voulla rkèru dins s' grand lîve et foyter les pâjes : Cucugnan, c'est in C û in K.
Bin in C, don !
Adon, dit-i a rpurdant bin sn' alin.ne, dju n' wès nolu avå la. Pont d' Cucugnanès ou Purgatwâre.
Bin, èyusse k' i sont dabor, s'i n' sont nin avå la ?
Bin, ou Paradis, hin, l' Abé. Eyû k' vous vlèz k' i srint ?
Bin, la k' dj' a dvins !
Et après ?
Bin, i n' î sont nin non pus! Jour du Diu, Maria Dèi, ké afwêre ! Pont la- hyôt, co pont cillé ? Mê, adon ?
Gn è pont du rméde, la Curé, c' est k' i sont à l' anfiêr !
Ouye, ouye, ouye, bel anje ? Sinte Crwâs, Jésus, Fils du David ! Coumint est-ce possibe ? Sint Pîre nu m' årot nin dit l' vrêy… ? Siè pourtant, … dju n' ê nin oyu l' cok tchanter … Ouye, ouye, ouye, coumint k' vous vlèz k' dju vaje ou Paradis si mes Cucugnanès n' î sont nin ?
Choûtèz bin, la, l' Abé, si vous vlèz nn' awè l' kûr nèt', vnèz k' dju v' mousture, purdèz l' pazê ku vla et courèz ossi vite ku vous plèz jusk' ou grand uch a mwin gåtche. Et i m' è rclô l'uch ou nez.
Lu tchmin k' i m' dijot, c'ére in pazê plin d' roudjes çades ki brûlint les pîds. Co chance d'awè les savates du Sint Pîre. Ene tchaleûr la ddins ; dju m' apîtos a tous bouts d' tchamp. Co bèle chance ku dj' nê nin bèrouyî. Des tours pou-z èsse grèyî su place ! Dj'avos la tchmîje ki colot, les goutes du souweûr mu tumint du front. Dj'ére prèt' a tumer court d' alin.ne cand dj' vu l'uch d' å lon. En' uch, ène portriye, putot, on-z årot dit la gueye d'in four !
Oh ! mes afants, ké spèctake la ddins ! Pont d' rèjisse , savèz, et on n'dumande rin, da . On mousse et c' est tout. C'est å lådje coume ou cabarèt. Dju transpiros et dju tran.nos d' frèd les deus assan.ne. Les cate poÿs ku dj' ê co s' la tiêsse su drèssint tout rèdes. Dju sintos la tchår grèyîe, coume cand l'marichå fère les tchfås ! Dju n' a plos pus dins ène pufkine parèye. Et dj'atindos brêre et tchûler, des ôtes ki djèmichint ; pus lon, des ôtes ki hoûlint, d'èn' ôte costé, des djèrmints d' dânés. Ké dèsolacion d'in parèy spèctake ! Mon Diu, toudi !
Eh bin, cwè ! tu n' intures nin ? k' i m' dit in diâle ki m' pikot d' sa fon.ne ?
Non, dju n' inture nin la ddins, mi, dju sus in sèrviteur du Diu, séss' !
In sèrviteur du Diu. Bin ! kèsku t' vins foute avå la , dabôr ? Esplike- tu !
Et mi ki tran.not coume ène foye, dj' avos bin dou må d' rusponde : Bin…bin…, dju … dju vins… dju vins wâr ..., si ... si v' n' årîz nin … si v' n'årîz nin, pa des côps …, dazâr …, kékin … d' Cucugnan.
Eh bin cwè, vayant, tu dèraye . Tu duvros sawè k' tout Cucugnan est cillé. Tins, lêde cornaye, wête coume on lz arandje tes fameûs Cucugnanès.
Et dins les roudjeûrs du brêjis ki tourniyot, la k' dju wès l' grand du Blanc ki, du s' vicant, n'arètot nin du s' sôler et d' cheûre les puces a sa pôve fame –dj' ê vu la Catrinète dul Vôye du Bouyon ki coutchot al gragne avu les galants. Dj'ê vu l' Grand Dèdè ki s' fujot des mètes ou bwès avu la pårt des ôtes. Dj' ê vu la Babète du dzeu les tèts ki glanot à chårpant dins les damjèles. Dj' ê vu l' notêre, ki prustot ses sous a chéres pêléyes et haper les prés des pôves djans. Et la Jènîe, ki mètot d' l' êwe dins s' lacê. Et l' vî Flipe ki fjot aradjî les gamins et fwêre peû ås gamines et la Zélîe ki rpassot tout l' viadje al fontin.ne. Et l' cinsî doul Vôye d' öry ki n' savot lêchî ène boune a place. Et l' mon.nî du Grand Bî ki rmètot pus d' grus ku d' farine et l'Batisse dou Champète ki djunot l' couchèt dvant du l' pèzer. Et dj' a pôros co dire jusk' a mîdi.
Et les djans choûtint, a s'ruchoûrbant l' front, blancs coume des mwârts, du rcouniche dins l' anfêr tout å lådje, kî su grand-pére, sa mére, sa tante, su cousin, su frére…
Vous v' rindèz bin compte, mes fréres, ku ça n' put nin dèrer. Dj' ê tchèdje du vôs âmes, dju wête du v' såver d' l' abîme èyû k' vous filèz, la tiêsse la prèmîre. Adon, vla cè k' dju va fwêre et nin pus tård ku dumwin. Gn è dul buzougne, vous v' z-a doutèz. Et fåt aturprinde ça dins l'orde, fwêt' a fwêt.
Dumwin, dju cfèssrê les vîs et les vîyes : ç'est ç' ki pranrè l' mwinsse du timps. Mårdi, ça srè les afants : dj' årê co vite fwêt. Mèrcudi, les gamins et les gamines : ça pôrot trin.ner in pô d'pus. Djûdi, ou toûr des oumes et des djon.nes oumes : ène dère djoûrnéye. Vanrdi, ça srè l' toûr des fames et des couméres : ça c' est la grosse ovradje ; fårè chûr co bin passer la mitan doul chîje. Dju lêche lu sam' di pou l' mon.nî : a loû tout seû, i fårè bin la matinéye.
Et si tchèkin vut bin mète du sin.ne, eh bin ! dîmadje ki vint, , tout l' monde srè eûreû d' sa smwin.ne ! Cand l' grin est bon, fåt l' fåtchî. Cand l' vin est rèchu, i fåt l' bwâre. Cand l' lindje est niche, i fåt l' laver, et a grande êwe co !!!
C'est toute la grâce ku dju v' s ouwête. Amen.
Et la smin.ne s' è passé coume on -z avot dit. Tourtous è fwêt sa grande buyée. Et dpwis çu smwin.ne la, lu viadje n' est pus sté a rcouniche, c'ére duvnu l' Paradis su tère ku l'Abé rêvot. Les vîs djint k'on nn' è cåzé a des kilomètes alantoû.
Lu bon curé Martin, tout rapwêji, è rêvé kékes nutes pus tård, k'il montot les Crikwès avu tout l' viadje a pourcèssion, et k' i s' wèyot dja ou Paradis å mitan des cièrges et des boujies, a humant les nuwadjes d'ançans ki rèchint des ançanswârs ku les afants d' kûr balacint åtoû d' loû. Il avot arivé a ses fins… avu bin dou må……, i l' fåt rcouniche.
Et vla l' istwâre du curé d' Cucugnan, ku l' vî Zidôre m' è raconté et ki la tnot, loû, du s' grand pére, cand il ére gamin et k' il alint ås vatches a Bourguezîe.
Rumètu a walon d' Bayamont pa Louwis BAIJOT pou les 75 ans d' sa seûr Ida, lu 18 du fèvrî 2002.
Lu bûtî mècréant.
Tout l'monde sét bin ku l'Bon Dju, pour r'mèrci.yî les biêsses k'avint vnu vèy l'afant-Jésus la nute du Noyé èt ki l'avin r'tchôfé d'leus halin.ne, lès z-î avot pèrmis d'côzér atère zèles tins d'mèsse a mî-nute.
Dins in viadje du l'Ardène, i gn'avot in bûtî (bouvier), ossi tchiêstu k'ignorant, ki n'avot jamwês volu crwâre ça; I purdot tout ç'k'on lî djot pou dès carabistouyes. Il astot coume Sint Thomas. S'i n'avot nin vu èt nin oyu, i n'cro.yot nin èt i n'vlot nin z-a dèmorde.
Çut' idèe-la lu pourchûvot djoû èt nute èt i s'èst juré d'awè l'fin mot. Loû, ki n'pratikot wêre, su foutot pas mal dul mèsse a mî-nute. Il è don tûzé k'il îrot passer sa nute du Noyé dins su stôle èt k'i sôrot insi d'kwè k'i r'toûrnot.
I s'è don catchî drî in tas d'paÿe èt il è atindu k'on soune a mèsse. Èt ossitot mî-nute, nosse bûtî è tindu l'orèye.
Et vla kul bû èt la bourike s'ont mètu a raconter:
- Cè k'dju frans d'mwin, êh!, dit-i l'bû.
- Dju l'sés bin, la, mi, dit-ile la bourike.
- Kwè, êh!
- Dj'îrans mon.ner l'bûtî al çumintîre !
Lu bûtî, tèlmant sbaré d'atinde ça, è sté pris d'ène tèle vèssète, k'i nn' è moru sul tchamp.
Èt c'èst insi ku l'land'mwin, on z-atèrot l'bûtîki n'vlot crwâre a rin.
Anonyme, Presse-Annonces, 24 Décembre 1971, Rapontiyî a walon pa Louwis BEDJOT lu 17 mars 1998.
Dins lu Coutcouloudjoû n° 35 du mwès d'jwin 1998 ,dj'ans cåzé dès calandriyis, du l'année 2000 èt dès années a cawète (bissextiles). Anute, dju vörins bin vous aturtunu dul muzère du timps.
Ça pôte (part) toudi du ciel èt du rwêtadje du solê èt dul lune. Bin dès siékes duvant Note Sègneûr, la croyance atribuwot ås divinités lu rtour dès sêzons, lu l'vadje du solê èt dul lune tous lès djoûs, lès mouv'mants dul mér, lu voyadje dès stwâyes (étoiles) èt lès figures k'iles dèssinint dins l' firmamant.
Lu " gnomon ".
Lu voyadje du solê markot dès ombrîres su tère èt les oumes ont sondjî du lès m'zèrer.
Lès pus malins ont planté in baston, (lu " gnomon " an françès), su in tèrin plat an plin solê, èt ils ont chû (suivi) l'ombrîre ku l'solê fujot al tère. A fjant dès r'markes su tère, ils ont polu dètèrminer (pou bin cåzer) la pösicion d'l'ombrîre èt sa longueur t'ô dulon dul djournée. A pårtant (en partageant) la ligne d'ombrîre d'ène djournée, is plint sawè dins ké moumint du djoû k'ils astint. A m'zèrant la longueur du l'ombrîre, is counichint la yöteûr du solê èt insi la sêzon k'on astot . Dj'ê sté l'prèmî sbaré cand dj'ê apris ku les " missions Apollo " su la lune, i gn'è nin bin lontins, s'ont co siêrvu dpus d'in côp du bon vî " gnomon ".
Dijans a passant ku lès pîres luvées, lès menhirs, lès align'mints, la pôsicion dès pyramides ruspondint ås min.mes bèzwins. Dijans ossi ku lès vîs datint ça du 600 ans duvant J.C. ; on sét asteûre ku c'èst bin pus vî, chûrmint bin 3.000 ans duvant J.C.
I n'astot bin chûr nin possibe d'èsse fwârt précis, mês ça siêrvot dja s'lès travôs pou moustrer ås ovrîs k'il ére timps d'travayî, du fwêre la pöze û d'araler.(de retourner chez soi, de finir le travail).
Lès savants, zès, s'ont siêrvu du gnomon pou prouver ku la tère ére ronde èt k'ile toûrnot ; ils ont polu z-a m'zèrer l' tour èt l'rèyon. Dju n'va nin vl'èspliker. Vous trouvrez la formule pa dzou.
Lu cadran solêre.
Pou fwêre dès pårts dins la djoûrnée, i falot bin les compter ; mês coumint fwêre ? Lès pus savants, ki comptint su leus dèts (doigts) n'alint nin pus lon k'dîje èt c'ére bin jin.nant ca on n'plot divizer 10 ku pa 2 èt pa 5. I falot don trouver yôk ; ils ont sté in pö pus lon k'dîje… Onze, ça n'alot wêre mî; ils ont don sayî 12 ; èt la, ils ont vû ku 12 su plot côper a 2, a 3, a 4 èt co a 6 ; èt ku d'ène öte costé, a pårtant du 12, on alot a 24, 36, 48 èt 60. Après 5 millénêres, on vind toudi dès boutons, dès èpingues du sûrté èt coubin d'ötes afwêres al douzin.ne.
D'après lès sêzons, lès djoûs créchint û dèclinint. Lès eûres alint don suivant èt on s'a n'è contanté bin longtimps. Les oumes vunint don d'invanter d'in costé, in système du comptadje bin pratike èt d'l'ôte costé, ils avint duscouvru lu cadran solêre.
C'èst a rpurdant çu vîe idée la, ki datot du 4500 ans, k'ou XVI° siéke, on z-è cminçî a compter les djoûs a 24 eûres, lès eûres a 60 minutes èt lès minutes a 60 sugondes.
So z'öz in djoû l'ocâsion d'aler à Pajala, an Suwéde, (c'èst 70 km å nord du Cèrke polêre èt l' solê î loût a l'esté 24 eûres su 24 ; c'est l'solê d'mînute), vous î waréz la ruwe solêre, in cadran rond, avu in grand gnomon orianté su " l'Ètwale polêre ", èt t'ôtout 24 pikèts ki markat lès eûres. Coume calandriyî, dès pavés (365) ki markat tchèke djoû d'l'année. Çu ruwe solêre la, a vèy lès imådjes, dot fwêre dupus d'50 mètes du diamète. On l'è strimé lu 5 julièt 1996.
La clepsydre .(örlodje a êwe).
Pou les payis k'avint bramint du solê, i n'a falot nin d'pus, bin ku, pou la nute, ça s'complikot putot.
Asteure k'on z-avot ène rèfèrance avu lu gnomon èt l'cadran, i falot s'arandjî pou fwêre parèy sins solê. A fwâce du tûzer, on s'è dit ku du l'êwe ki court tout douçmint pörot fwêre l'afwêre. On è don pris in potikèt plin d'êwe avu, ou fond, in ptit bûsê ki lêchot couru l'êwe al douce ; on è wêtî d'in costé lès rpéres du cadran èt on lz è rpwârté sul potikèt, a fwê (au fur et à mesure) k'l'êwe s'ègoutot. La " clepsydre " û hörlodje a êwe vunot d'èsse trouvée èt l'principe a-n'è sté rut'nu pou marker (graduer) lès potikèts dès lampes a wîle (huile) èt lès bougies.
Lès Grècs su siêrvint dul clepsydre pou apêtchî leûs politikîs du cåser trop longtimps ; dju m'dumande poukwè k'on z-è abandouné ç'pratike la ?
La clepsydre siêrvot ossi a mète dès ôtomates an route, coume la cîe ku l'calife du Bagdad è ofru a Charlemagne an 807. L'ampreûr du Japon s'a n'è vû ofru yène du 10 mètes du yöt (haut) dins les années 1090.
Amon les Arabes èt lès Européins, des clepsydres fwârt rafinées ont dèré jusk'å XVIIi° s., cand on z-è invanté l'ôrlodje mècanike.
Lès sabliyîs.
Cand on cåze dul muzère du timps, on sondje bin chûr ossi ås sablyîs ku tout lès cîs ki coûjat ène û counichat (que tous ceux qui cuisent un œuf connaissent). A pårt lu fèt k'i falot lu rtoûrner souvint, i n'coustot pont d'matiére èt il astot d'èn précision assez jusse. An 1492, Christophe Colomb l'utilisot pou couniche sa pösicion. In marin lu r'toûrnot a fwêt k'il ére voude èt i comptot lès côps. Dju n'sés nin si c'èst ça la cåze, mês il è parvunu an Amèrike cand min.me. Deux cents ans pus tård, dins lès scoles des Flandres, ils avint co dès sabliyîs pou calculer lu timps des examens èt des egzercices
Les örlodjes.
Lès prèmîres örlodjes counues datat du XIII° siéke . Iles martchint bin souvint sins cadran, avu ène seûle aguwe (aiguille) k'ène tchèdje pindûe a ène cwâde fujot toûrner. I fåt dire k'i gn'avot nin grand tchöse du jusse la ddins ; c'èst pou ça ku, mågré l'örlodje èt l'èchapmant k'on vnot d'trouver, on wårdot (conservait) a costé lu bon vî cadran solêre. On s'dumande si, ou dèbut, iles nu siêrvint nin putot a mète lès clotches dès èglîjes an route, pasku c'ére toudi ås èglîjes k'i gn'avot ène örlodje
Lès Chinwas, k'ont souvint sté dès dvançis pou bramint dès cayèts ont dvu ratinde lu XVII° siéke duvant d'couniche l'örlodje ki lz î è vnu d'Europe. C'èst dvè cès années la ku lès örlodjes a balancîs ont arivé èt in pö après è vnu lu rsört a spirale. On vnot d'fwêre in grand progrès k'alot pèrmète du raptiti lès örlodjes èt d'fabriker lès prèmîres montes.
Lès chronomètes.
C'èst su lès mérs ku la mzère du timps purdot lu pus d'importance. Si la latitude astot assez êjîte (aisée, facile) a trouver, lès captin.nes avint bin du mô pou trouver leu longitude.
Ène fatale èreûr arivée an 1707 a l'amiral anglès Cloudsley Shovel è amon.né la piête (perte) du 4 navires èt 2000 marins, dulé lès îles Scilly û Sorlingues, å S.O. du l'Angletère. Lu gouvernement è adon dmandé a Newton de trouver in moyin d'limiter l'èreûr a in dmi dègré, a pö près 30 Km ; il ofrot pou ça la valichance du 5.000.000 du nôs francs. Il è falu atinde 1764 pou z-awè in chronomète (lu n° 5) ki n'dèrayot ku du 5,2 sgondes de longueur (1850m.), su in voyadje du deûs mwès.
Lu qwartz.
Dju raprotchans nost' èpoke (1930) pou vèy lès örlodjes a qwartz, prinde lu rlês (relais) dès rsôrts. Lu qwartz dène dès dustchèdjes élèctrikes réguliéres ki permetat ène précision 10 cöps pus fwâte ku la mèyeuse dès montes a rsörts (1 sugonde tous lès 6 ans) . La prèmîre örlodje a qwartz èst du 1930 èt la prèmîre monte du pougnèt èst du 1970.
L'atôme.
A pårtu du 1958, on è trouvé l'örlodje atomike ki, lîe, avu lu Césium 133, nu s'brouye ku d'ène sugonde tous lès 3000 ans.
Avu tout ça, on è polu alér s'la lune èt co pus lon, monter des indjoles ki tournat alantou dul tère, mês ça n'è nin apêtchî lès trins d'awè du rtard , ni lès filantes sutwâyes d'awè in djoû d'avance !
On n'è nin co fini d'aprinde !
Dins l'Cout … du mwès passé, dj'ans tapé (jeté)in cöp d'oûy su tout ç'ku l'oume avot trouvé pou mzèrer l'timps.
I gn'è co pourtant yôk a dire sul cadran solêre.
Si yink û l'öte du nös lîjeus sondjot z-a fwêre yink, û don bin s'i nn'avot dja ptète yink, èt k'i s'avise de volu l'controler avu sa monte, i gn'è bramint des chances pou k'i sûje dènorté (perdu, désorienté)ou dèbut.
La lojike vörot ku l'ombrîre du solê, a midi tapant (eûre du solê,) mousture toudi l'Nörd, in pö pus coûte du djanvî a jwin, in pö pus longue du julièt a déçambe (pou in cadran a plat, èt l'contrêre pou in pindu).
Ça s'comprind, pisk'a c'moumint-la, le solê èst jusse ou Sud.
Or, i s'fwêt ku ç'n'èst l'cas. Dju m'èsplike.
Si, in cöp û deus par sumwin.ne, a midi tapant, eûre du solê, on pöse in ptit cayô û on fwêt ène rumarke ou dbout d'l'ombrîre du gnomon, (bâton fiché en terre ou tige du cadran solaire qui projette l'ombre du soleil) on va vèy , ou dbout d'in timps, ku l'ombrîre gangne s'incline) in pö a drète û in pö a gåtche d'après la sêzon.
Ou d'bout d' èn'an, on z-ôrèt dèssiné la figure ku l'ombrîre è fwêt su ç'timps-la.
Çu figure la, c'èst ni pus ni mwins k'in 8 ; la crole du dzeus èst pus ptite, la crole du dzous, pus pansue. Tout ça dèpand èyu k'on s'trouve su la tère.
Vous plèz l'vèy su l'dèssin k'èst pa dzous. Les 2 croles du 8 su rdjontat dvè 15 d'avri èt dvè l' 2 sètambe, lu solê passant sul zéro, cate cöps par an, lu 2 sètambe, lu 26 déçambe, lu 15 d'avri èt l' 15 du jwin.
Lu cadran, du ç'maniére-la, marke ostant les mwès ku lès eûres.
A chûvant (en suivant) l'ombrîre sul 8, pou ostant k'on la wête a midi pètant, eûre du solê, on put êjîmint (aisément) couniche lu mwès k'on z-èst.
Nin pus bièsse ku ça ! Èt pourtant, i fåt co wêtî si on z-è in cadran pindu û pösé. S'il èst pindu, le dzeu du 8 atake a l'iviêr, a nn'alant s'la gåtche. S'il èst pösé, lu dzeu du 8 marke l'èsté, a z-alant ç'cöp-la su la drète.
Ça, c'èst pasku dins l'pindu, lu gnomon duschind èt dins l'posé, il èst planté dins tère.
Kè ç'ki put bin amon.ner ça ? Bin, c'èst l'fèt' ku l'acse (axe) dul tère èst pantchî, k'ile toûne su lîe minme, in pö coume ène toupyie èt nin toudi parèy su l'ècliptike (dans l'espace, cercle imaginaire parcouru par la terre dans son périple autour du soleil) k' ile fwêt åtoû du solê ; dès cöps, ill' avance, dès cöps, ile rutådje, (retarde) tandis'ku la monte fwêt jusse 24 eûres su in djoû.
La tère, lîe, fwêt l' tour du solê (360°) su 365,24219 djoûs, don nin tt'afwêt in dègré par djoû. Coume s'ile patinot in pö. C'èst ç'kart du djoû la ki fwêt k'tous lès 4 ans, on nous rmèt in 29 du fèvrî . La rawète ki dmère su ratrape tous lès 400 ans, coume ça va yèsse lu cas an 2.000.
Coumint tûzer a tout ça, sins awè dl'admirâcion èt du rèspèt pou l'Grand Mwêsse, l'adjinsneû (metteur au point) univèrsèl k'è mètu tout ça a place. S'il a n-è sté capâbe, on put lî fwêre confiance, il put co z-a fwêre dès-ötes !
Louwis Bêdjot, Grêde - 27 du djanvî 1999, divins: Coutcouloudjoû l° 41 & 42.
Des blantches cigognes a foûjon.
Lu spèctake est si rare ku dju n' såros m' apêtchî d' a cåzer.
Dj'astins l' 24 d' aousse duvè 7 eûres al nute, cand iles ont arivé. Il avot fwêt ène bèle djoûrnée, lu solê n'ére nin co coûtchî et sa lumîre dorée rusclatichot su nös tèts(toits) Iles s' avint abatus (avaienbt atterri) in pö dvant dins ène putite pature, al tchèsse ås mizrètes (souris des champs) û ås foyons (taupes). Pis, on l-z è vu ariver sins brut, bin påjîr'mint : ène vintin.ne du blanches cigognes rukèrint les hyôts tèts et les potôs d'èclêradje pou s' ruspöser.
Ké bê tablô du vèy su tchèke måjon, deus, trwas et minme 4 grands ojês blance et nwârs, alignîs su la crèsse des tèts, avu pa des côps yène û l' ôte ki tchandjot d'måjon , d'in vol påjûre, lant, silancieu et cåzu majèstuweu.
Les djins ki les rwêtint dvant les uchs n' a ruv'nint nin. On plot criyî, les tchins plint bawiyî … rin n' î fjot. Iles continuwint leu prandjîre (sieste), a nous wêtant d'in rgard si doû k' on årot dit k' il astot cåzu souriant.
Yène du zèles, maleureûsmint, è tiré ène mwêje cåte. Ile s' avot pözé su in potô du hyôte tansion (15.000 V.) Cè ki dvot ariver è arivé. Cand ill' è volu s'alver , les êles ont buké les fils et la malereuse è grèyî su place. (Des spécialisses l'ont vnu rkêr. Ile avot sté baguée an Almagne, parèt-i.)
Pîs, lu solê è bachi, l'ombrant è vnu et dj'ans dvu lêchî dwârmu les grands ojês.
Lu landmwin å matin, il a dmèrot co kékènes su ène måjon û l' ôte, tins k' les ôtes dujunint dins les tchamps. Duvè 10 eûres, iles su sont rassannées al minme pature, pî on lz è vu s'alver et pourchûre leu route.
Dj'avins sté gâtés . Espèrans k'iles nous åront pwârté chance ! Putète k' après l'iviêr, il arivrèt amon ynk û l'ôte in bé gros poupon bin rouzlant.
Ca, ça siêve a ça ossi, les cigognes !
Louwis Bêdjot, al gare du Grêde 26/08/00, divins: Coutcouloudjoû l° 62.
Èritîs dès Trévîres (Trêves est djondant), lu payis vèjin è counu ås III° et IV° siékes, ène longue tèrmène du civilizacion romin.ne. On z-a wèt co la trace dins la Gôme èt l' payis d'Arlon, avu lès villa, Montôban, Torgny èt tout l'rèsse.
Lu vrê skèpiadje (la naissance) du Lucsambour rumonte a l'anéye 963, cand SIGEFROI, Comte des Ardènes è tchandjî kékes boukèts d' tèrin pou in ptit båtimint û putot in tchèslet (û ène tchèstèle) fwârt duslâbréye djondant ène parfonde ravine, k'on wèt co anute a Lucsambour. On loumot ç' place-la lu " Lucilinburhuc ", k' è duvnu avu l' timps, la vèye (ville) du " Luxembourg ".
Cåzu 400 ans å long, jusk'a 1443, lu Lucsambour, k'avot bin créchu, è dmèré s'prope mwêsse, pou duvnu par après ène dutchyie dl'Ampire Jèrmanike. Il è fourni su ç' timps-la, mwintes rwas èt ampreûrs al Bohème.
Du 1443 a 1815, Lu Lucsambour è fwêt partie d'nös provinces èt il è counu coume nous z-ötes lès ocupâcions ôtrichiène, èspagnole èt francèse.
C'èst kul putite tcchèstèle avot duvnu, å long dès ans, ène citadèle si rcrinduwe, k'on la loumot " la Gibraltar du Nörd ". Et ça a fjot bwârgnî mwintes.
Il è falu la râclée du Napolèyon a Waterlo èt l'Congrès d'Vienne du 1815, pou k'la France, l'Angleterre, la Prusse, l'Autriche èt la Russie sondjinje ( sins nous l'dumander) a fwêre in nouvê payis åtou dul forterèsse : la " Grande Dutchyire du Lucsambour " èt a rassan.ner nös provinces beljes avu lès Olandèses de Wyême Prèmî.
Lu Rwa d'Olande, ki n' a ratot wêre, è oyu l'toûr du s'fwêre noumer Grand-Duc du Lucsambour a tite pèrsonèl , a tûzant bin k' in djoû, i su l'foutrot al potche.
Ça n'è nin apêtchî lès Luxos du nous d'ner in cöp d'mwin, cand i nous è falu tchèssi lès Olandès an 1830.
Dès Olandès, zès, ki n'avint nin volu rcouniche noste indèpandance, ont volu su r'vindjî an 1831. Il è falu adon lès Francès pou nous aspaler, (pasku ça lz arandjot). Al fin, lès Olandès n'ont ployî k'an 1839, après k' lès grands nous ûjinje oblidjî (nous aient obligés)a lzî lêchî aler la rive gåtche du l'Escaut, lu Limbourg olandès èt la Grande Dutchyie. Dju payins co les vierlètes ! Dju vus dire ku dju payins co la muzike, coume al dicôce)
An 1919, on z-è bin sayî d' lès ragritchî, mês bèrnike ! Pourtant, a costé d'tous les Aliés, nôs södars avint bin combatu 4 ans d'asto èt on s' fiyot ku …, pa dès côps,… an rcounichance … Hélas ! On n'è jamwês vu lès ptits pèchons chiker lès gros !
Cèst don an 1839 ku l'trêté d'Londes nous è r'hapé la Grande Dutchyire a z-a fjant la proprièté pèrsonèle du Rwa d'Olande (il vnot d' bin advercî s' côp).I nous ont rsatchî tout l'payis ki cåzot almand, a pårt Arlon ki dmèrot belge t'a cåzant luxambourdjwas.
D' û vint ? Du ç' ku lès Francès ont prètandu awè ène vöye dirèke ki r' loyot Lîdje al France, sins passer sul tèrin jèrmanike. Ène vîe abitude du Moyin-Age , d'awè dès tchmins ki n'passint nin s'lès tères du sègneûr vèjin.
Cu n'est k'an 1867 ku l' Lucsambour è låtchî la ligue jérmanike pou duvnu in pays " perpétuellement neutre " èt çu n' èst k' an 1890 ku lu Rwa d' Olande è rmètu la souvrin.n'té du payis al branctche prèmîre des Nassau (lès Nassau-Weilburg) , k' est co toudi a place ou Lucsambour. On n'est nin parint pou rin !
Bin pus tård, tout ça è sté rouvî, cand lès 3 payis s'ont rmètu assan.ne pou fwêre lu " BENELUX ", lu prèmî djèrmon d' l' Europe.
L'istwâre va pa dès côps drole !
************************
Dju m'a vöros du n'nin dire deus mots d'èn' oume du payis k'è fwêt bramint pou noste indèpandance.
Dju vus cåzer du Etienne-Constantin DE GERLACHE, k'è vnu å monde ou tchestê d'Biourdje ( dulé Bèrtrès) an 1785, pou moru à Ixèles an 1871.
C'è sté yink du nös prèmîs rkesteûs (défenseurs, qui réclament), cand il è falu mète lo hola ås égzijances olandèses ( pårtadje dès places a l'Ètat, cåzadje olandès pa t'tavå, lu muzlèt ås gazètes èt lès lwas s' lès scoles – protestantes èt catolikes).
I rèclamot dja an 1825, a sayant d' atirer lès libèrôs avu loû, mês il è falu 1827 pou k' i s'î mètinje. Lès hyöts (la bourgeoisie) vlint s'atinde putot avu lès olandès, mês lu peûpe n'a vlot pont.
Il è falu lu dèr iviêr du 1829-1830 èt l'avolée dès pris pou k'on nn'ûje su sô èt k'on nn'arive al révolucion.
C'est co nost' Etiène-Constantin k'è pris la tiêsse du nosse prèmîre " Chambe dès Rprèzantants an 1831-1832, pou duvnu adon prèmî mwêsse dul Cour du Cassacion, in posse k'il è tnu 35 ans å long.
Ène öte counichance ku dj'ê rtrouvé , c'est in cèrtin d'Olimart, scrîjeû du Prince Henri des Pays-Bas. I signot avu l' Prince lu Trêté du Londes du 1867, ki confirmot la Grande-Ducthye.
Vous v'raplèz l' istwâre du Böhan… èt du d'Olimart d'adon ! Lu monde èst ptit … !
Louwis Bêdjot, divins: Coutcouloudjoû l° 45.
Si on cåzot in pô dl' èclipe !
Bin dvant les mâjes dul Epifanîe, ki chûvint la stwâye du Noyé, l'oume avot dja bramint d'agrès (intérêt) pou tout l'adjinsnadje (programmation) du caroutadje (parcours) du solê, dul lune, des stwâyes, des planètes. C'est si bê, d' vèy coume tout ça toûne bin rond !
In vî maçon, tout hapé pa s' mustî, nu djot-i nin in côp, a lvant la tiêsse å hyôt : " Ku c'est bê, don, la voûte célèsse, gn è nin in jwint ! ", …..loû k' a fjot tout' djoû.
Toute la syince atasléye (accumulée) å lon des siékes n'è nin arayî (freiné) lu rkèradje (recherche) des pus parfonds screts du monde.
Ku ç' sûje la NASA, les Japonès, les Indyins, les Anglès, les Francès û les Russes, tourtou alouwat in pakèt d' cwåres pou sayî d' dèfini ène kèsse û l'ôte k'è trêt ås asses (astres).
Fåt bin dire ku ça n' est nin fwârt åjî. Gn è co wêre d'arpanteûs (géomètres) k'ont mzèré jusse, ni la tère, ni la lune, ni l' solê. D'abôrd, est-on chûr ku tout ça est bin rond ?
. Mågré k' les indjoles (ordinateurs) duvnat pus afiyantîes (précises), ossi bin yink ku l' ôte ont bin des rûses pou mète tout ça å clér, tèlmint i gn è des paramètes k' i dvat adjinsner, avu in bê pakèt d' chifes duri la virgule.
C'è k' i rcounichat tourtou, c'est k' i lzî fåt souvint coridjî leus carculadjes (calculs), pou s' rawè in pô du sgure (d' équerre, d' aplomb). Nu lz-î a vlèz don pont, s' i lêchat passer ène volante sutwâye û si l'èclipe dèrive du kékes sugondes. Lu Grand Mwêsse k' è tuzé et ki fwêt toûrner in tél caroussel dpwis ostant d' timp est pûs capâbe a loû tout seû ku nouzôtes tourtou assan.ne, et i va co noul moustrer ou mwès d' awousse.
Coumint k' ça va, ène èclipe ?
Dins ène èclipe, i gn è trwâs asses (astres) å djeû : lu solê (±1.392.000 km du lådje (diamètre) = ±109 coôps la tère, la tère (±12.756 km du lådje et a d'abôrd 150.000.000 km. du solê) et la lune (±3.474 km du lådje et a ± 383.000 km dul tère) I gn è telmint d'adîre atère zès, (ils sont si différents) tant pa leu masse ku pa leu pösicion, k'on n'sårot z-a fwêre in dessin al chåle (à l'échelle).
Si on rprèzantot la tère pa in rond d' 4 cms, lu rond dul lune frot 1,1 cm du lådje et duvrot z-èsse a 1,20 mète du rond dul tère. Lu rond du solê årot loû, 4m 36 du lådje et su trouvrot a 468 mètes dul tère. Vous v' rindèz compte ???
Lu solê est 400 côps pus gros k' la lune, mês ossi 400 côps pus lon, c' est pou ça ku, dul tère, on les wèt ossi grand yink ku l' ôte. Cand yink passe jusse duvant l' ôte, lu cî du padrî est tout catchî.
L' èclipe du lune arive toudi al plin.ne lune, et l' èclipe du solê, toudi al nouvèle lune.
Ça vut dire an gros, k' i fåt ku l' solê, la tère et la lune sûjinje d'abôrd su la minme ligne, et k' la lune catche a pô près l' solê, û l' contrêre.
La plin.ne èclipe (totale) du solê (û d' lune) nu put s' vèy ku dins ène ptite lingète du tère k'est an plin dins l' ombrîre dul lune (û dul tère), don èyu k'on put vèy la lune catchî carémint tout l'solê (û la tère catchî la lune). C'est ç' k' arivrèt lu 11 d'aousse dins l' Nord et l' Est dul France, djondant la Province du Lucsambour, dussus ène lårdjeûr d' a pô près 100 kilomètes. Dins nosse payi, ça srèt l' cas pou ç' k' è dzous Bouyon, s' la carte. Les eûres pou Bouyon , a nost eûre d' èsté :
dèbut : 11h 08m 14 s - maximum : 12 h 27m 16 s - fin : 13 h 49 15 s
plin.ne èclipe : du 12h 26m 47s a 12h 27m 46s.
Ké caroussèl.
La tère (et a pô près les planètes) toûrnat alantou du solê toudi su in minme plan (coume s' ile toûrnot a plat su ène tåle). Si la lune toûrnot parèy alantou dul tère (sur le même plan), i gn årot ène èclipe du solê a tchèke nouvèle lune et ène èclipe de lune a tchèke plin.ne lune. Admètèz ku ça dvanrot in pô soyant.
Ça n'put må d'ariver, ca la lune dèviye in pô (± 5° 9'). On pörot don dire k'a tchèke lune, ile fwêt in dmi-tour ki monte jusk' a 6 dègrés duzeu la tåle et l'ôte dumi-tour, parèy pa dzous. A tchèke côp k' il passe a raze dul tåle, don k' il côpe lu plan solê-tère, on dit k' ile fwêt in neud, yink a montant et yink a dchindant Atère les deus, c' est la ligne des neuds. C' est nin co ça ki frot les èclipes, pisku la lune put bin toûrner alantoû dul tère sins jamwês catchî l' solê.
Pou compliker les afwêres, la lune, ki nous a n-è dja djouwé dz ôtes, toûne a dèrivant in pô a tchèke lune. I s' fwêt don ku les neuds avançat in pô tous les djoûs, a fwêt k'u l' panchadje dul lune toûne, si bin k'in neud fwêt in tour su ±18,6 anéyes a dèrivant du 19,354 8° par an). On pôrot rmète ça a in cèke du vèlo ki toûne su loû-minme a tumant.
C' est ça ki fwêt courayî la lune pa ttavå l' ciel (se déplacer de façon irrégulière) et k' i fåt k' on ratinje ±18,6 anéyes pou la rtrouver al minme place.
Pou k' i gn ûje èclipe, i fåt ku l' solê et la tère sujinje su la minme ligne ku la cîe du neuds dul lune, et tout ça, jusse ou moumint dul nouvèle lune. Onz est adon dins la boune tèrmine, kwè ! (période).
Tout ça rind dja les éclipses bramint pus cazuèles (incertaines). Pou l' çî ki dot lz adviner dvant l' côp , gnè co ène masse d'ôtes condicions ku dju n' mu sins nin capabe du vz èspliker.
Tout ç' ku dj' pus dire, c' est k' dins tout ça, la tère toune ossi in côp par djoû et ku dire k' on pôrè vèy l' èclipe a téle û a téle place su tère est pus malåjî k' i n' san.ne.
Cè k' i gn è a vey.
Dèrant la prèmîre eûre du l' èclipe, on n' wèt nin grand tchôse. Lu solê do z-èsse catchî ås deus tiérs, pou k' on s' a rinje compte. Après ça, lu cårtî d' solê su rastrètit d' pus a pus juska duvnu in fin trêt toudi abôblichant et fwârt dandjreu. La cruwe lumîre du solê s' a va ; ile fwêt place a ène douce clêrté ki vint du dzous du ciel, coume cand l' solê va s' luver û s' coûtchî.
Adon, l'ombrire dul lune è arivé dins l' ciel et su tère, a 2.186 km/h = ± 610 mètes al sugonde et la plinne èclipe atake. Cand la nwâreur est la pus fwâte, jusse ou mitan d' l' èclipe (ça n' dère k' ène minute û deus, å mî), on n' wèt pus ku l' rond nwâr dul lune avu, alantoû' ène clêreur (lumière diffuse) k' on loume "couronne solaire" Les astronomes, zès, rukèrat les bôrades (projections) du feu ki rèchat du solê.
Su tère, i fwêt nwâr mågré k' onz est an plin midi ; les pus fwâtes sutwayes (étoiles) su mètat a rloûre ; lu timps s' rafrèdit fwârt (dins les 10°), les fleurs su rcloyat coume al nute, les pouyes rumontat a djoc, les ojês arètat d' chanter et su rmètat a cwète coume pou la nutîe. Tout l' monde, biêsses et djins sintat bin k' i s' passe yôk. I s' pôrot minme ku l' lumadje des vôyes su ralume.
Pîs, le solê vint rbôker; in fin rê (rèyon) pou cminci, mês k' i fåt èviter du rwêtî, ca il est des pus dandjreu pou les oûys. Tout c' k' on vint d' vèy duvant l' èclipe, on va asteure lu rvèy a l' aviêr, co dèrant ène eûre.
Cand dj' a srans arivès la, on n' årèt pus k' a ratinde la cîe ki vint.
Pou la Bèljike, i fåt rmonter a 1433 pour la dêrine plinne èclipe et dvant d' a rvèy la min.me, i fårèt co 6 djèrméyes (générations) duvant l' 25 du mey 2142.
Ça n'srèt pus pou nouzôtes !
Wêtèz a vös oûys ! Gn è du dandjî !
Si l'èclipe è-st-in fènomin.ne a pårt, la rwêtî n'est nin sins dandjî pou la vue.
Tourtou è dja vu alumer ène cigarète ou solê avu ène loupe. I n' fåt k'ène sugonde. Vous vanrot-i a l'esprit d'aler mète vost ouy al place dul cigarète ? Non, bin chûr !
Adon, n'alèz jamwês risker èn oûy durî ène lunète, des jumèles û èn aparey foto pou wêtî la lumîre du solê. Coume i n'fåt nin non pus lu rwêtî a l'oûy nu û avu des lunètes du solê, ca s' ille arètat a pô près les rèyons "ultra violets", les lunètes du solê nu siêrvat absolumint a RIN pou les rèyons infra-roudjes, minme si l'solê est catchî a 99 å çant. Lu timp d'èsse asbôbli et l'må est dja fwêt..
Sins filtre duvant les oûys, ça fwêt in må tèribe et onz è grande chance du duvnu aveûle; s'i gn è in filtre, mês k'il est måvês, on n'sintrèt rin, mês lu damadje srèt parèy.
Lu fond dl' oûy n'est nin sansibe al douleûr et c' est la k' est l' dandjî.
Lu fond dl' oûy put tout boun'mint z-èsse grèyî (brûlé), sins k' on s' a rinje compte et sins rèmission possible.
Lu mèyeu pou wêtî l' solê, mês ki n'est nin consèyî, c'est co l' vî boukèt d' carô passé coumufåt al boujie pou k'i suje bin nwâr, èt parèy partout (uniformément noirci).
On put ossi wêtî d'awè in filtre èsprès ( coume le filtre an Mylar, pou ostant k'i sûje an boun' ètat. Lu Mylar, c'est coume du fin papî d' aluminiom k'arète les rèyons infra roudjes et ki rabache la lumîre d' in million d' côps. Mês la foye est fwart dèlicate et rin ku d' la ployî put la foute å djabe. On pu z-a garni ossi ène pwêre du lunètes, mês on n' put tolèrer nou dèfåt ou filtre.
Des vêres du soudeus, les pus nwârs possibe, (n° 12-14) plat ossi fwêre l'afwêre, mês i fåt s'a êdî comufåt. Les francès cåzat du lunètes du polymère nwâr. A vèy !
Deus pwêres du lunètes du solê, ni co trwâs, ni co cate, mètuwes yène su l'ôte nu valat rin non pus.
Nin dpus k'lès filtres photos en jèlatine, les filtres " polarisants, même croisés ", les plaques du radio û lès nègatifs du photo.
Si onz è ène lunète astronomike û ôte, i fåt d' toutes fwâces (absolument) mète lu filtre duvant la lunète èt jamwês atère la lunète et lu rwêtant.
Dju m'vas v'duner ène putite astuce, ki n'cousse wêre et k' est sins dandjî :
.La manîre la pus chûre pou rwêtî l'èclipe, c'est d'prinde deus fins cartons blancs, fwêre in tout fin trô ou mitan dou prèmî, lu mète bin an face du solê, et mète l'ôte a pô près in dmi-mète pa drî l' prèmî, bin égal (parallèle) , pou k' la lumîre du solê vinje s' î marker comufåt.. Si vous sayèz l' truc, nu ratindèz nin l' dêrin djoû pou l' sutrimer et afiner vôs régladjes.
Cand la dêrine èclipe è sté visibe ås USA, onz è compté dpus d'1.000 aveûles dèfinitifs et dpus d' 10.000 ki n'ont pu rin vû dèrant chîs mwès a èn an, et l' pîs, c'est k' ilz î è dmèré yôk a tourtou. Et les cîs k'avint des lunètes du solê ont co sté pus fwârt toutchîs, a cåze ku drî les lunètes du solê, la pupile grochit, cè ki fwêt k' i mousse co dpus d'lumîre dins l'oûy. Cest co pî avu les jumèles.
Wêtèz a vous, fujèz la l'çon ås afants, dijèz l' ås vèjins ! On n' rit nin avu ça !
Tout ça est fwârt bin, on compte su in tout fèl spectake (un spectacle merveilleux) ; mês pou ça, i fåt ku l' timp sûje å clér çu djoû-la. Adon, nu rouvièz nin les ûs a Sinte Clêre. !
Les lunètes duvat s' trouver amon les opticyins. On put ossi coumander in bê ptit lîve su l' èclipe "Dans l' Ombre de la Lune" a versant 250 BEF ou compte 000-0346177-81 du l' O.R.B., Avenue Circulaire, 3 , 1180 Bruxelles a motivant insi : "Eclipse Fr".
On pu ossi awè ène cassète vidéo pou 330 BEF; ou compte n° 000-0346177-81 du l' O.R.B., avenue Circulaire, 3 1180 Bruxelles a djant " K7 Eclipse Fr.".
Al Gare du Grêde, lu 12 du mêy 1999. La ddins, i gn è du rsatchî des foyèts Internet du "l' Obervatoire Royal de Belgique". ORB
Louwis Bêdjot, divins: Coutcouloudjoû l° 46.
On n' put nin dner tôrt a Arthur ki s' plint ku l' polucion est pa tt' avå èt k'ça fwêt dja des années k'on vike avu.
Et a vèy coumint k' ça va, ça pôrot co dèrer in bokèt. C'est bin chûr ku dins toutes les consèrves d'anute, c'est plin du E du toutes lès sôrtes. Dins les E, gn è kékes potabes , mês ossi des mwês èt des fwârt mwês. Les lisses a sont counûes. A nôs fames du wêtî cè k'ile achtat. Fåt dire ossi ku tous ces E la sont rpris dins des arètés et k'on n' fwêt nin cè k'on vut avu. Lu hic, c'est d' vèy si les controles sont bin fwêts.
D'ène ôte costé, les fames n'ont pus wêre lu timps d' fwêre leu courti, û don bin, ça nulz î dit pus rin èt ttafwêt rpasse a ploûzes. Dins nôs viadjes, dj'ans co la chance ku tchèkin rutoûne co in ptit bokèt pou s'ahiver d' lègumes et d' cartouches et k' les bwates nu sont nin s' la tåle a tous les r'pas.
Si on va dins les grandes boutikes, èyu k'on mougne mèyeu martchî k' al måjon, ça n'est chûr pus parèy. Pou vinde bon martchî, fåt achter co mèyeu martchî et fwêre créchu des lègumes, des froûs û alver des cokés a 25 frs. du kilo n'est possibe k'a trignôdant dins les tourtôs.et dins tout l' rèsse. C'est coume ça k'onz è yu l'afwêre dul dioxine et dul sote vatche.
Èstant dins l' mèstî, dju dos cand min.me dîre ku lu ptit mon.nî k'est sèrieu et k'è sougne du ses pratikes, n'inture nin dins ces combines la. Èt mî k'ça, i n'fwêt pont d' granulés. On put vèy dins ses mèlanges toutes les danrées ki sont ddins. Tout est moustré et c'est bramint pus chûr pou tourtou..
L'ôte afwêre ku dj' ê a dire, c'est k' les biêsses mougnat mî k' l' oume. Dju vus dire ku leu racion est calculée dins l'intèrèt d' leu santé et k' c'est justumint par la k'on dot ariver a les-î fwêre duner ène boune produccion du laçê û d' tchår.
L'oume, du s' costé, surtout l' cî ki marède a l'uch, mwindje surtout cè k'il in.me bin, sins sondjî pus lon èt c'est la k' les fames duvat rdrèssî la bâre dins leus menus al måjon.
Parèy pou les afants ki mougnat a scole. Ou ministère, on wêtrè si les pavés sont bin nètiyîs, s' i n' trin.ne rin dins les årmêres, si on n' dépanse nin d' trop, mês on s' fout pas mal du c' k' on dène ås afants, s'il ont dès bons lègumes tous les djoûs, s' i mougnat assez des froûs, s'i n' su gavat nin de coca toute la djoûrnée et n' rin mwindjî a midi.
C'est a tout ça k' i fåt wêtî. C'est nosse comportemant k'est bin souvint a rvèy.
Louwis Bêdjot, divins: Coutcouloudjoû l° 48.
[séisme]
Din l' Cout n° 49, dj'ans vu k' nosse boune vîe tère astot co plin.ne de vie et k'ile nous l' ramèmorot tanawète, cand il lî purnot l'anvie du stiêrni (éternuer).
Ça li arive co souvint et dju vons a cåzer in pô.
C'èst kwè, in seyisse ?
C'est lu k'chuyadje (ébranlement) brutal dul sucwâce tèrèsse (écorce terrestre) k'intèrvint can des fwârçadjes intèrnes su trouvat libèrés d'in plin côp dins les profondeurs dul tère. I plat z-èsse du 3 sôrtes, à sawè :
Pu bas k' ça, gn è pupon d' seyisse ki dèmarat.
Il arivat cand les plakes su gugnat (s'entrechoquent) û don bin can lu magma a prèssion ou mitan dul tère rumonte dins les volcans.
Les ondes sismikes.
Les ondes ki provnat des seyisses sont du 3 sôrtes ossi :
L'ètude des seyisses.
Les sismografes arèdjistrat su papî les scousses, min.me fwârt fèbes, ki lzî parvunat. L'eûre d'arivée des deus trins d'ondes , les P et S , les ransègne su la distance et su l'importance du seyisse.
Å pu k' les ondes sont duscalées, ( dju vnans d' vèy leu difèrance du vitèsse), å pu lon k'est l' mitan du seyisse.
Les dègats et lu nombe du victimes sont souvint fwârt importants, surtout si la scousse su fwêt sinte din des culots fwârt peuplés, avu des båtimints nin toudi capabes du rèsister a des fwâces parèyes. C'est pou ça k' les djans nu rintrat pûs al måjon, peu d'èsse raclôs dzou les dècombes et k'i lodjat dvant l'uch.
Pou mzèrer la fwâce du seyisse, on su siêve dul chåle du Mercalli, ki va du I a XII, et ki mzère les dégats survenus.
I, c'est on n' sint rin ;
II Kékes djins å rpôs plat sinte in pô yôk, surtout al coupète des hyôtes måjons ;
III Bramint sintat yôk dins les måjons et les lampes balançat ; mês rin a l' uch ;
IV Gn è co d'pu ki sintat yôk et les vites, les plats et les assiètes boudjat. ;
V Les djins adwârmus su ravèyat, les uchs clakat, les åbes balançat , les ptits cayèts boudjat d' place ;
VI Tout l' monde sint yôk ; i fwêt drole martchî ; les cades su duspindat et l' plafounadje su find ;
VII Les djins ont du må a dmèrer campés ; les autos s'mon.nat må et les brikes cuminçat a dusvaler ;
VIII Les tchåfeus ont co pu d' må a piloter, les måjons sins bêcôp d' fondacions boudjat fwârt, les ôtes, mwinsse, mês les brantches des åbes su brîjat ;
IX Gn è des gros dègats a toutes les måjons ; les måjons sins fondations tchandjat d' place ; la tère su crèvåde ; les conduites chèrat
X Bramint des måjons sont dustroûtes ; des ponts ossi ; gn è des èboulmints ; les êwes su dustournat ; les astantches (digues) chèrat ; la tère su crèvåde co d'pu et les rays du chmin d' fiêr su twardat.
XI Gn è pus grand tchôse ki tint, ni måjons, ni routes, ni ponts ; la tère glisse et i gn è des èboulmints ;
XII D' abôrd t' tafwêt est dustroût ; la tère gondole et i put tumer des grands pans d' rotche.
La deûjime chåle pouz èvaluer les seyisses, c'est la chåle du Richter, ki va du < 3.5 a + 8.
< 3,5 On n' sint rin, mês les sismografes ont arèdjistré la scousse ;
Du 3,5 a 5,4 On sint la scousse, mês i gn è pont d' dègats ;
Du 5,4 a 6 Les bons båtimints rèsistat, les ôtes, bramint mwinsse ;
Du 6,1 a 6,9 Put fwêre bramint d' dègats, 100 kilomètes alantoû.
Du 7 a 7,9 C'est in tran.nmint d' tère " mâjeur " ki put s' sutinde assez lon ;
Pa dzeu 8 C'est in fwârt grand seyisse, ki va su r'sinte su des çantin.nes du kilomètes.
Payis a seyisses.
Les seyisses sont les pu courants dins les pâyis ki sont s' les bôrds des plakes, èyusku la prèssion est la pu fwâte. On put don cåzer dul cinture du feu du Pacifike, des dorsales du fond des ocèyans, dul Méditèranée, du l'Est du l' Afrike, du l'Hymalaya, du Japon et dul faye du Californie. Les pus grands seyisses arivant dins les payis les pu sudjèts ås volcans . Dju sondje ku l' Japon, avu 1450 scousses par an è l' pompon des seyisses. Cest pa l'ètude du tous les tran'mints d' tère, k'onz arive a couniche lu ddins d' nosse tère.
Dins les pus tèribes seyisses counus, les pu catastrofikes s'ont passé an Chine :
Les raz d' marée.
Can la tère tran.ne duzou les mérs, a grande parfondeur, on n' sint rin su l'êwe, mê les ondes, a raprotchant l' rivage, purdat ène fwace tèribe, ki dène lu djoû a ène lame du fond ki put awè s' la côte, ène yôteur de 30 mètes. Avu bin chûr toutes les destruccions possibes et imajinabes. Onz è vu, an 1960 in tran'mint d' tère du Chili antrin.ner ou Japon et a Hawaï, in " tsunami " û " raz de marée " catastrofike.
Fåt nin co nous plinde dins nôs payis. Dju sans co a kwète du bin maleûrs.
Louwis Bêdjot, lu 17/9/99, divins Coutcouloudjoû l° 50.