Djan-Pol II.

Vous dmandèz kî ki vut scrîre yôk sul pape Djan Pol II ki vint d' nous cwiter l' samwine k' èst oûte.

C' est ène ovradje ki m' san.ne bin dèlicate, ca ile supose k' on pwate in djudjmint su les accions d' èn oume, sins couniche les parfondès rêzons ki l' ont monné a adji coume il è fwêt.

Djan-Pol II n' è lêchî personne indifèrant. Lon d' la.

I fåt dire k' in pontificat si long ku l' sinne, dins in monde ki n' arète nin d' boudjî, n' è nin sté d' nature a lî faciliter la bzougne.

I n' fåt nin rouviyî ku l' Pape est l' dèpositêre du l' ansègnmant du Christ, cè ki l' oblidje a pourchûre ène vôye du continuwité, et k' i dot, dins l' minme timp, s' adapter ås progrès (!!! in bin grand mot) d' in monde en plinne évolucion. Mês çu monde la, loû, n' unn' è d' kère du l' anseignmant ku l' Pape est tnu du spåde a traviêrs lu monde. Å contrêre, c' est putot lu matérialisse lu pus duslachî ki prime, avu, a l' arire-plan : les sous, lu plêji, lu tchèkin-pour-loû, la guêre, lu spotchadje des pôves et des ptits.

C' est dire ku la bzougne du Pape n' est nin des pus êjîtes.

Dju vus bin ku l' anseignmant du Crisse ruprèzante l' idèyal k' il avot rêvé pou l' umanité, et k' I dot bin s' rinde conte ku bin pô srint capâbes dul réyaliser tout seûs, dul façon k' Il avot souwêté.

C' est bin pou ça k' a costé des contrintes imposées ås oumes pou-z awè leu salut, lu Signeur, pou ls aspaler, lezî apwate sa divine Mizèricôre et su pardon. C' est la l' espèrance ki vint rafwarcî la fwa, l' idéye du Pére ki passe duvant l' idéye du Djudje.

On dot ossi sondjî a l' èducacion k' è rcî l' Pape dins s' djonne timp. I vint d' in payis catolike, pou cmincî, k' è soufru lontins des guêres, du l' ocupacion et k' è subi la dominacion d' in réjime ku dj' ans yu la chance du n' nin couniche.

Lu ståradje-djus du comunisme, c' è sté, an prèmî, l' ovradje k' i dvot rèyussi, la ku tous ls ôtes avint capouné. Et il î è parvunu, sins guêre et sins dusbrôler s' payis et les ôtes k' astint dins l' cas.

Dju sondje ku, vu l' influwance k' il è manifesté adon, c' ére dja assez pou-z a fwêre in grand pape.

A costé d' ça, il è sû profiter des avancîes dul comunicacion pou parcouru l' monde et prêtchî partout lu racomôdadje (réconciliacion).

S' i n' î è nin parvunu du côp et partout, gn è co toudi personne pou-z ôser prétande anute ku ç' k' il è fwêt du s' vicant, n' årè nin co des consèkances dins les mwès et les anéyes ki chûvat.

A costé d' in monde ki rouspète su tout, ki vut awè ttafwêt du côp, sins s' ocuper du vèjin, nu croyèz vs nin k' i falot bin kéke pårt in arayoû [frein] pou tnu l' èkipadje su la vôye ?

Gn è yu bin chûr, kékes cayets k' on n' comprind nin co asteûre. Purdans in pô paçiance duvant d' volu dire di tote fwace k' il è oyu twârt.

Pou l' Pape ki va chûre, gn è k' a souwêter k' i sûje lu mèyeu monneu possibe pou noste atèléye.

L.Baijot, 10/04/2005.