Les Fables de Jean Lafontaine en wallon de Charleroi, adapatées par Léon Bernus.Les Fables de Jean Lafontaine en wallon de Charleroi, adapatées par Léon Bernus.
Deux vi baudets, comme dè jusse qu'estint d'Binse,
Rottint sû Châléroét, tout seû, sain leu baud'lî.
Iiun kerchi d'sâbe, i n'in pinset né moinse,
Laute kerchi d'liards, tout fier chuvet padri.
Si bin qué s'queuwe d'estet toute rette,
I strichet sés orayes! i fiet sonner s'guerlot!
Du tienne dè Lierne, lés zév'la à l'coupette;
Ca dallet comme su des roulettes;
Mai arrivét dain l'fond d'Goblot,
Deux rattindeux vude nu du Bot!
I strindèt à leu guette!
I sautelle nu su l'sin qu'a lès liards dain s'malette,
On li prin tout! in li r'darant in coup chabot,
In bon coup d'pîd dain s'vinte, in coup d'baston su s'tiesse,
A mitant desmoulû, i leye nu là l'paufe biesse,
Qui jumissèt in réclamant s'camarade,
Pou co l'rapogi qui li dit:
"Choûte bin: si t'avèt sti kérchi,
"D'in vi sàtche dé sauvlon comme mi,
"Vi coûsse, tu n'srèt né si malade.
Nia rin d'si bia qu'iesse ritche, d'avoët in bia impoèt,
Mais si ça toûne maù! gare la bombe!
Chéyet, vo stét moin q'rin! et d'vin vô sti n'saquoèt,
L'solia vint lûre à costèt d'l'ombe
C'est qué l'sin qui chai d'haut,
Pou toudi s'fai brâmmin pu d'mau.
In coirbau estét r'cheu bin long dain l'bot d'Gozée,
In t'nant dain s'betche in crà stoffet;
In R'nau qui l'avet chû in sintant v'ni l'vénée
Estet d'lé l'arbe eiét li d'set:
"Bonjou Jàque? Bonjou vi stoûmaque,
"Bin comme vôs estèt bia avèt vo noû casaque,
"c'est s'tenne belle piesse, et j'vourét bin wàgi,
"Q'vo l'lavet fai keude pa n'saqui,
"Et si vô voéx est s'taussi bonne,
"Qué l'estoffe dè vo maronne,
"Vo poulèt concouri, avet Colas Boéron!
La d'sus l'coirbau si fier qué s'tiesse in d'vènèt sotte
Pou li chanter n'chanson,
Vout drouvu s'bètche ét leyë chaire ess' bourlotte!
"Choutèt bin c'lesson çi woé m'fi:
"I nia toudi moéyin d'rascoutte enne bonne bouchie,
"In ingeusant in sot qui vout chouter n'vintrie:
"Faut iesse dé bon conte, mai j'coès,
"Q'ça vaut bin in crâ stoffet!
L'paufe coirbau scoubaret in li même ess'disèt:
Quand on m'tirera co n'pareye guette,
Les pouyes diront su dés crossettes.
Morale
Si vo choutèt toudi lés geins,
Toès quarts du tins on vo fout d'dain.
In leu n'avèt qu'lés ochats eiét l'pia,
Faûce que l'gèue des chins estèt bonne
No leu rinconte in doque, t'taussi cra qu'in jônne via
Qu'estèt pierdu par là et qui cachèt s'mogeonne!
Li foute enne trampe eiét l'mingi,
C'est ainsi qui v'let aringi,
Mai i fallét toùrsi n'miette,
Eiét l'mântin vo l'liaurèt p'tette,
Foutu n'roulée dé permission!
V'la l'leu qu'intame conversâtion,
Li fait bin complimint su s' grêce.
Oh! achoute bin: "si tu v'let, séce,
"T'pourrét bin iesse t'taussi cra qu'mi, respond ti l'chin,
"Leye là tés bots! ça n'té vaut rin,
"Drolà vô stèt tertoous minàbes,
"Vos stèt sètches comme dés misérâbes,
"Et pou vo soulagi, i vô faut crèvé d'foin!
"V'léz mingi in bouquét, poû vo rimpli vo vinte,
"I vo faut radmoin vô disfinte!
"Choute mé, vin avèt mi, et t'sra brammin mioeu d'moin
"Oyi mai, disti l'leu, i faua bin q'tu mousses,
"S'qui m'faura fai drolà, pou mi gangny mes crousses?
"Presquét rin, disti l'chin, agni n'miette les geins,
"Qui vourînt v'ni printe nô nargeins
"Joûer avét l'z'éffants, erléchi l'moin dé t'moèse!
"Et pou tes poènes, tira soki dain n'caisse,
"Tu mougneras dé l'pansée, du foète et du boudin.
L'paufe leu bréyèt, fauce qu'il estét contin!
Pou l'preûmi coup dé s'vie, i dallét iesse à s'auche.
I vout rabrassi l'chin, fauce qu'il estét binauche
Mai i voèt du momin, qui d'allèt l'rabrassi,
Qu'les poeyes pa d'zous gohii, éstint tout arachis!
"Leye in pau vire, quoèsque t'a là pou n'rogne?
"O, ça c'n'est rin! - T'és pourtant tout scôrchi?
"C'est s'tenne petite saquoè? S'qu'on t'aurét foutu n'brogne?
"Taiche tu n'woète né? - Aurêt-ce esti cochi?
"C'est p'tette ell' plasse dé l' chaîne, ousque j'su alachi!
"Alachi, disti l'Leu, ét n'vasse né ousqué t' vout?
"Né toudi! S' qué ça t' frèt dé l'poène?
"Si bin qu'pou mougni l'soupe échenne;
A c'conte là jé n'vou né, et t'pou dire que j'min fout.
Là d'su, l'Leu prin ses jambes à s'palle,
I fout l'camp dain les bots, et copu roèt qué n' balle.
Morale
C'est pou vo dire Françoët: qu' avoê s'liberté,
On s'fout co bin d'iesse rit'che! on aime mioeu l' pauvreté.
