Noyé 2000 al Ronsaut

(Jean Goffart)

 El cortèdje dès Raspes

 Lès djèyants d'èl Ronsaut

 Gn-a d'èl nîve

 Lès jwèyeûs compagnons

 Lès amis d'èl Grand Place.

  Nowé pou deûs maujos

 El boulome di nîve

 El nîve

El cortèdje dès Raspes

  Lès-èfants vont s'fén maquîyer

Tèrtous èst prèsse pou s'è d-aler.

V'là qu'èl cortèdje ès' mèt en tch'min :

Lès djins vèn'nut di tous lès cwins

Et l'ambiance cominche à monter;

A côp seûr, dji pou vos l'assurer :

Qu'ça fuche lès grands ou lès-èfants,

Is sont èvôye en trîyanant.

Arivès ène mîyète pus lon,

Nos sayons ène saqwè d'bon :

Qui ça fuche in bol di potâdje

Ou in vêre di vén qu'on pârtâdje

Sins compter l'brotchète di pèchons

Ou l'chope di bîre qui nos buvons

Amon l'fârmacîyen ou l'librére,

Nos v'là avou bran.mint d'èspwêr.

El timps d'dîre ouf èt nos 'stons d'djà

A z-atraper l'flambau rolà,

Pou nos r'trouver en compagnîye

Dès rwès mâdjes èt dès jwèyeûs drîyes

Qui finiront pa s'èr' trouver

Dins l'sale asto du Père Nowé

Qui ratind pou distribuwer

In djouwèt à sès protédjés.

 

Refrin :

Dins l'coron, gn-a d'l-animâcîyon

Et on d'è pâle dèdjà bén lon.

Quand nos 'stons dins l'cortèdje dès Raspes

Pus rén-au monde ènn' nos trècasse.

Dins l'coron, gn-a d'l-animâcîyon,

Et lès djins djouw'nut l'djè à fond.

Dins lès Raspes arive èl Nowé :

In bon momint on va passer!


Jean GOFFART

Lès djèyants d'èl Ronsaut

In djoû, n'rafale di nîve

Rachoneut d'in côp d'bîje

Deûs nouvias par'wècîyns

Vouwès à moru d'fwin.

C'èst qu'is s'wèyît voltî

Nos deûs boulomes insi :

Is n'savit pus s'quiter

Enn' pinsant qu'à s'in.mer.

Quand ariva l'bia timps,

L'ome ratcha dins sès mwins :

Dès-èfants arivirent

C'èsteut là leû désir.

En sadjèsse lès-èfants

Dins l'coron s'pourmwin.nant

Vinrent à doner leû nô :

Raspi èyèt Raspo

Refrin :

Lès djèyants d'èl Ronsaut

El pèd'nut di bén waut :

Boulome Raspes di quate mètes,

Raspounète su roulètes.

Lès djèyants d'èl Ronsaut

El pèd'nut di bén waut :

Folklôre va onorer

Sins ratna èl Nowè.


Jean GOFFART

Gn-a d'èl nîve

Di l'èstwèlî, èl blanc nos vént,

Et rad'mint on choûte èl radio.

Ene boune coutche arîve à claper :

Trop taurd pou d-aler au rèsto.

Au pîd dès tèrîs trîyanant

Lès-èfants èchêne sont st-eûreûs

En cachant d'yèsse preumî pa-d'vant.

Pou vîr èl blanque couvèrte qui tcheut

Ah rén qui dès bèlès souv'nances

Dji n'dimande qu'à r'vîr lès-imâdjes

Tout en m'dijant qu'à l'astchèyance

Natûre a in bèl èbalâdje.

Mins quand dji sondje aus vîs djins

Dji m'dis qu'en rèflèchissant bén

Qu'is duv'nut d'meurer dins leû cwin

Faureut n 'saquî pou s'd-ocuper.

Wéte èl nîve s'a djoqué di tchére

Dji n'èva nén m'raculoter,

Mins bén profiter di prinde l'ér

Pou admirer no blanque biaté.

Di l'èstwèlî, èl blanc nos vént.

Refrin :

Gn-a d'èl nîve, gn-a d'èl nîve

I fét blanc d'ssu lès vôyes.


Jean GOFFART

Lès jwèyeûs compagnons

In tracteûr, ène tchèrète

On sént woù-ç'qu'i faut mète

L'crèche viquante, lès sujèts,

L'bèdot èyèt l'baudèt.

Etou gn-a lès tchansons

Er'prîjes à l'unisson

Qui rèstchauf'nut lès coeûrs

Qu'ont yeû bén du maleûr.

In vré conte di Nowé

Qui d'vîr ès' pourmwin.ner

In sapén su lès vôyes

Et çoulà sins anôyes :

Il èst st-iluminè

Et nén à l'à pau près,

Sins compter l'moncha d'boules

Bèrloquant pa-d'vant l'foule.

Mins v'là qu'dissus l'calèche

Gn-a n'saquî qui s'dispétche :

C'èst no bon Père Nowé

Qu'èva distribuwer

A tèrtous sès cougnous

Avou s'satch su sès gn.gnoûs,

I fét insi n'clignète

Aus pouyons èt pouyètes.

Refrain :

C'èst qu'i djèle à pîres findes,

Mins toute èl jwèyeûse binde

Va s'èr'trouver en tch'mwin

Pou amuser lès djins.

Lès jwèyeûs compagnons

Sav'nut bén doner l'ton

Lès jwèyeûs compagnons

Moustèr'nut leû bon fond.


Jean GOFFART.

Lès amis d'èl Grand Place

El djoû divant l'Nowé,

Is voul'nut s'rachoner

Timpe di l'après-din.ner

El buvète i faut l'monter :

El vén tchaud coure dèdjà

Lès djins dès Raspes sont là

Is sont prèsse pou l'dèpârt

Du cortèdje en fanfâre.

L'ancîyn ôtèl di vile

Er'wéte qui drwèt ça file,

Lî qu'à t'nu si longtimps

El gôria du pat'lin.

C'èst seûr qui d'ès' wauteû

I n'f'ra nén l'mârgougneû

En wèyant tous lès djins

Acourus pa tous timps.

On mèt l'feû ausès cwâdes,

L'feû d'ârtifice ès'clate :

Prèsse à brotchi d'leû bwêsse

Pou qu'lès djins fuchent à l'fièsse,

V'là in moncha d'èstwêles

Spitant tèrtoutes pus bèles

Et lèyant l'èstwèlî

Di toutes couleûrs flori.

Refrain :

Lès amis d'èl Grand Place :

Vos s'rèz seûr lès bénv'nus

Vènèz dé nous en masse

Et bwêre in côp là-d'ssu.

Lès amis d'èl Grand place

Vos don'nut leû raploû

Vènèz dé nous en masse

On djip'ra avou vous.


Jean GOFFART.

Nowé pou deûs maujos

L'istwêre ès' passe à l'Ronsaut, à l'fén d'l-anéye, ausès coutoûs du mitan du mwès d'décembe.

El vilâdje èsteut paujère. El vièspréye vèneut d'tchére èt s'ès'tindeut dissus lès tch'mwins. Rolà, à l'coupète d'èl vôye, deûs maujos ès' drèssît bén-astampéyes, yène asto d'l'aute.

Lès djins d'èl cène di drwète avît arindji leû d'vantûre avou toutès sôtes di bièsses, tèrtoutes aus pus djolîyes. Dins l'sapén, is-avît mètu dès boules èt dès lampes di couleûrs, qui, in côp aluméyes, donît d'èl jwè à s'qu'coeûr di maujo.

L'cassine d'à costè, qui r'chèneut come ène cheûr à s'vijène, n'aveut pont d'dècorâcions, lèye : lès deûs vîs djins qui d'meurît là èstît pinsionès, èt n'avît wêre di liârds. Bén seûr nén pou z-ach'ter dès cacâyes di Nowé.

Es' djoû-là, èl maujo d'drwète ètindeut ène vwès qui disquindeut pa l'tchiminéye.

- Vos nn'avèz d'èl tchance, vous, d'awè toutes cès lumières-là qui vèn'nut vos raguéyi à l'vièspréye!

Toute èsbaréye, èle rèspondeut à l'vwès :

- C'èst l'vré. Tous l's-ans, à ç'momint-ci, dji m'sins toute noûve : dji prinds èn-ér di fièsse.

El maujo d'drwète s'aveut bén rindu compte qui c'èsteut s'vijène qui lî d'viseut, maleûreûse, pace qui sès djins n'avît pont di liârds, èt qui, pou yeûsses, èl vîye n'èsteut nén fôrt aujîye.

El pauve maujo aveut l'coeûr gros. Ele n'ôseut min.me pus d'viser à s'vijène.

" Dji m'sins toute nûwe! " pinseut-èle.

I tchèyeut d'èl nîve. Dès tchandèles di glace disquindît du twèt d'èl pauve maujo mérenûwe. A tél pwint qu'on-aveut dins l'idéye, en passant d'vant lèye, qu'èle brèyeut!

El lèd'mwin matin, lès djins dès deûs maujos brouch'tît l'nîve qui rascouvreut leûs trot'wêrs.

- Hé Djan, dit st-i l'ome d'èl maujo d'drwète, vos v'lèz saquantès boules? No fîye ènn'  a co rapôrtè ayîèr. Et dès guirlandes ètou, gn-a pa-t't-avau l'maujo!

" Dji vous bén! " a rèspondut l'aute, anoyeûs.

Ene dèmîye eûre pus taurd, il atatcheut lès guirlandes ausès fènièsses, èt i d-aleut min.me quer l'vî sapén stitchi au guèrnî, pou l'gârni avou lès boules.

El gnût d'après, lès deûs maujos èstit toutes jwèyeûses. Mins gn-a yène qui l'èsteut bran.mint d'pus. Ele a chuflè à l'orâye di l'aute :

- Qwè-ç'qui ça pout fé, si dji n'd-é nén ostant qu'vous. Wétèz come dji seûs bèle. Wétèz come mès décorâcions lûj'nut aus-îs dès djins qui pass'nut. Wétèz come dji r'glati avou toutes mès bèlès couleûrs. Wétèz come dji seu st-eûreûses. Wétèz come...

Eyèt l'pètite maujo s'a èdôrmu...


Jean GOFFART A/IV/12.162


El boulome di nîve

I fèyeut frèd. On-èsteut au mitan du mwès d'mârs. I tchèyeut d'èl nîve dispûs n'boune samwène. El sèm'di après-din.ner, deûs djon.nes gaviots avît dècidè d'fé in boulome di nîve.

Et c'èst bén botès avou dès gros solés, deûs péres di tchaussètes, un djîlèt, ène èchârpe, in passe-montagne, èt dès grossès moufes, qui nos deûs-ârsoûyes sont st-èvôyes à l'uch'.

Maugré leû djon.ne âdje : cénq èt sèt ans, lès deûs fréres cominch'nut à rouler ène boule, bran.mint pus grosse qui yeûsses.

El boule finîye, is s'èr'mèt'nut à d'è fé ène deûzième, qu'il a falu stitchî au-d'z-eûs d'l'aute. Pou çoulà, il aveut stî rèqui di d'mander in côp d'mwin à maman.

El pus deûr èsteut fét. Mins is-avît co dandjî d'leû mére. On n'p'leut l'lèyî insi, faleut l'abiyî. T't-ossi râde dit, t't-ossi râde fét : in vî tchapia du grand-pére dissus l'tièsse, qu'a stî féte lèye, avou ène cârote pou l'néz, dès gâyètes pou lès-îs, èt dès bouquèts d'pétrâles pou lès-orâyes. Gn-aveut ètou dès boutons t't-au long dè s' boudène, dès bouquèts d'plantches avou dès vîyès moufes pou lès bras. Et il èsteut fini.

Mins qu'il èsteut bia! Lès gamins d'èstît fiêrs. Djusqu'à-ce qu'i cominche à disdjaler, ène samwêne pus taurd.

Lès deûs gamins n'savît qwè fé pa-d'vant leû boulome di nîve : ç'st-i-ci comincheut d'djà à suwer dès goutes come dès p'tits pwès. I d-aleut fonde! On n'p'leut l'lèyî insi!

El vijin arive à ç'momint-là. I vindeut dès frigidéres èt dès grandès-ârmwêres aus boutchîs èt aus grands boutiques. Wèyant l's-èfants pa-d'vant l'boulome, i 'splique aus parints :

- Is sont v'nus dîre ar'vwêr à leû boulome di nîve, d'vant d'd-aler coûtchî.

" Come i r'ligne, dimwin, gn-âra pus rén ", réspond l'maman, maleûreûse lèye ètou, d'lès vîr come is-èstit.

El vijin wèyeut voltî rinde sèrvice. Quand, tout d'in côp, i sondje à ène acsion qui lî f'reut d'èl publicitè, pou vinde pus aujîy'mint sès frigos. Il aveut rolà ène idéye du tonwêre!

Quand lès-èfants ont stî montès coûtchî, èl vijin s'a mètu à bouter avou l'pére : i faleut transpôrter l'boulome pou l'èstitchî dins-ène grande ârmwêre frigo.

- Quand l'èsté s'ra v'nu, dj'amwin.n'ré lès fotografes. Dji f'ré d'èl publicitè avou l'boulome di nîve!

El lèd'mwin matin, pupont d'nîve. Mins lès parints ont apougni leûs-èfants èt lès-ont mwin.nè à costè, mon l'vijin.

Lès deûs gamins èstît binaujes. Durant tout l'èsté, is-ont yeû l'ocâsîon d'd-aler rinde visite à leû boulome...bén au frèd dins l'frigo. Co myeû : èl bon timps bén-avanci, is-ont vèyu leû boulome di nîve dins l'gazète. Adon, is-ont rad'mint discôpè l'foto, pou moustrer leû éro à tous leûs copins...

C'èsteut leû n-èfant qu'aveut lès-oneûrs!


Jean GOFFART

El nîve

Quand tout douç'mint nos r'véns l'iviêr,

El nîve lèye, ètou èst dins l'ér.

Est-ce ène saqwè d'bia ou di mwés?

C'è-st-ène saqwè à nos pôser.

Quand l'nîve, di l'iviêr, on n'd-a pont,

I faut qu'on èvâye vîr au lon.
Et quand i gn-a dins no payîs,

On d'mande râde : " C'n-èst nén co fini? "

Wétèz in côp lès payîsâdjes

Qui ça fuche lès bos, lès vilâdjes,

Tèrtous ont leûs blanquès couleûrs;

Gn-a qu'lès mouchons qu'ont mwins d'ârdeûr

Pou yeûsses, gn-a wêre à mindji,

Et i faut cachi d's-arindji.

On dîreut qu'lès-âbes sont st-à l'fièsse :

Is sont tout blancs dès pîds s'qu'à l'tièsse.
Lès batias sont paralisès,

Lès coûrs d'eûwe sont èdjèlès,

Insi qu'èl trafic di vwètûres

Et di camîyons : pou yeûsses, c'èst deûr.
Is stitch'nut du sé d'ssus lès tch'mwins,

Mins i faut r'cominchi souvint.
Dès céns qu'sont binaujes, c'èst l's-èfants

Qui, avou leûs parints pa-d'vant,

Sôrt'nut achids d'ssu leû trin.nau

Ou tap'nut dès boules dins l'cârau.
Is fèy'nut ètou dès glis'wêres

Mins sins s'èr'trouver l'cul à l'têre.

Lès grands djins yeûsses, c'èst tout l'contrére :

I n'lyeû faut nén r'wéti è l'ér :

Is duv'nut s'acrotchi à l'rampe

Sinon, is s'câss'nut râde in membe.

Lès céns qu'èvont aus spôrts d'iviêr,

Coulà lyeûs cousse tout d'min.me fôrt tchêre :

Is vont dins nos bèlès-Ardènes

Pou rouvyî leûs trèyins, leûs pwênes;

Rolà, is poul'nut fén du ski.
Du spôrt, c'èst bon pou n'nén grochi;

Co myeû, vos rèspirèz l'boun-ér

Ca f'ra seûr'mint pus d'bén qu'à l'mér.
L'nîve, c'n-èst nén qu'dès désagrémints,

Ca pout nos doner d'l-amus'mint,

Et i n'faut nén vièrsi dès lârmes

Pace qui toutes sésons a sès chârmes!


Jean GOFFART


Sicrijhaedjes eplaidés so les fyis avou l' åjhmince do scrijheu.

Edition en ligne explicitement autorisée par l'auteur.