Ça fét asteûre ène miyète di pus d' vint´ cénq-ans qu' l'Institut è-st-a dalâdje. Après ostant d' tins, pôreut valu qu'on n' uche nén l'abitude di fé s' mèstî èt dèl fé comufôt! Mètu su pîs ô mwès d'octôbe 1974, l'Institut è-st-ène cougne di sèrvice culturél qui boute ètou a studyî l'istwêre dèl vikérîye, d'ayêr èt d'ôdjoûrdu.
Pou lèyî lès djins trouvér leû bouneûr, on-î saye di rascoude, di ramonç'lér, di mète bén a place èyèt co d'ôrdér toutes lès cougnes di documints qu'ont ´ne saqwè a vîr avou l'istwêre - li cène di nosse tins - dèl province di Biella, dèl plin.ne di Vercéil èyèt du Vô Sesia.
On cache d'abôrd a prézintér l'antifachisse, li Rézistince èyèt lès mouv'mints d's-ouvrîs èt dès payisans.
L'Institut done in côp d' mwin a tous lès céns qui vôrît studyî l'istwêre, mète su pî dès spitch, dès conférinces, dès rèscontes, dès scoles di pèrfècsion'mint. I fét dès cassètes vidèyo, dès lîves èyèt ´ne gazète qui rèche trwès côps l'an.
C'èst vrémint sbarant tot ç' qu'i-gn-a ôdjoûrdu a l'Institut: dès cints èt dès miles di documints, dès miles di lîves, dès cints d' gazètes di toutes lès cougnes èt co ´ne contrèmasse di vidèyos.
Toutes lès-ârchîves, li bibiotèque, li "multimédiatèque", lès-informâcions, lès-èspôzicions sont la pou rinde sèrvice ôsès p'titès soces d'amon nos-ôtes qui bout'nut avou l'Institut, dès scoles, dès soces culturéles, dès mésses di scole èt dès profèsseûrs, dès cacheûs ´yèt dès scolîs dès wôtès-scoles: ostant dîre a tous lès céns qu'ôrît d' l'agrè pou l'istwêre di nosse cwane di payis.

L'Institut a ètou branmint boutè su ç' qui s'a passè dins d's-ôtes payis (émigrâcion, guêre, Résistance, evnn), an mètant su pî dès rèscontes di scolâdje, an publiyant dès lîves èyèt saquants-ârtikes (qu'on `nnè pout d'ayeûrs lîre roci su l' Site) èt an scrîjant dès tècses a loyéns dinamikes (hypertextes).

(Ratoûrnâdje da Stéphane Quertinmont, Sècrètariat d' Paul Lefin, Ûnion Culturéle Walone)