Dessinadje da Benoît Lallemand.

" Pùrnez-m' sù vosse djèron, ö, bobone, èt s' mù racontèz co ces istwâres dù vîyès sörcîres la, coume ène vayante. "

Lù grand-mére, avù s' vwas ki röguiyot coume ène vîye târtèle toute sokêye, apougnot - poul cantrime cöp? - lù conte doul Grîje dù Palijû, lu cile k'on djot k'avot paké avù l' diâle. Les djins dou Fråmont avint fini pa z esse hodés doul vèy rùpasser ou fin mitan d' leû viyadje tous les mårdis doul vesprêye, k'ile rùvnot d'awèr sùté vèy sù bwêchèle à Anlè. Paskù l' lonnmwin, ç'astot toudi l'arafe: tous les cés k'avint måsgrougné sù s' dos lu smwinne dù dvant atrapint ène mizére û l'öte. Söye-t-i k'in vèchå lùzî vnot stranner leûs lapins, söye-t-i k' leûs pouyes crèvint doul pèpîye; ûdon k' leû bûre nù savot vnù; ûcobin k' leûs afants ramassint des peûs. In bê djoû, il a-n ont yù plin l' dos, èt pou ène vèce må toûrnêye, il ont houtchî les jandârmes. Lù vi brigadî, ki counùchot bin l' Grîje, n'astot nin trop à sn åje. I n'è rin trouvù d' mî kù d' dùner l'ouvradje dù ramasser l' macrâle à deûs djönês d' Bouyon, ki vnint d'esse sùtikés al brigâde dù Palijû. I paret k'i n'avint jamwês rin fwêt d' bon a scole, èt k'i n' valint nin ène pètèle dù gade. Mês leûs péres, des grands mossieûs d' Bouyon, avint des poûssants pùs höt. I fjint d' leû nez, nös deûs zigomârds mågré k'i n'astint nin co rsouwés padrî les orèyes. C'est k'in Bouyonî, ça n' sù moutche nin dou pîd. Ço n'est nin dol djote, sapinse lù Fåminwès. Il avint sté cmandés dù rascwède lu Grîje à l'örîre dù Bernåbwès, ou réss doul Tchapèle Morê. Pour zès, çù n'astot k'ène pitite kerwêye k'i comptint radmint rwastter. I n' sù doutint nin dù ski les ratèdot. "

A ç' moumint ci d' l'istwâre, lu grand-mére avot l' zine dù rprinde alène. Ille apiçot l' cocmwârt, sù voûdot ène cassètêye dù tène cafè, èt s' gordjot ddins à ptitès goulêyes. Pûs ile ratakot:

" Tout d'in cöp, voula l' Grîje ki s'amonne pyim pyam, lù nwâr châle sù les spales, èt s' baston d' toudi al mwin. Ile lù picot dins tère dùvant lèye, peûr dù s'afagnî dins in frèchê. Cand ille è yù sté arivêye djondant les deûs jandârmes, rouf!, vou les la ki zouplat djùs dou hoûrlê ta bwâlant:

- Håw, lu Grîje! Djù vnans pou t' foute al gayole. Tù n' nous chaprès nin, séss, çù cöp ci. Boudje d'ène pate èt djù t' câssans l'öte! "

 Èt il avançat l' mwin pou l'apougnî. I n'avint nin co yù l' tins d' drouvù l' boutche pou poûsser ène tchîpe kù zoup! voula l' vîye fame sùpitêye dîj mètes padvant, èt d' coutinùwer sù tchmin mou påjîrmint, avù s' baston ki sintot dins les örmûres. Là, wê, nös deûs gabloûs dârer à grandès ascåchîyes poul ratraper. Mês tchèke cöp k'i l' comptint apicî, ile lùzî chipot fû des mwins coume ène anwîye. I n' l'ont toudi jamwês seû raclöre, la, c'est mi ki tùl dit. Inocins catwaze, va! I n' counùchint nin co les toûrs dou Mèchant. I n'î astint nin co, la, al taye ås fréjes. Èt les djins dou Fråmont ki canlint sùl dos doul Grîje ont co toudi yù leû bûre ki n' vinot nin, cabin k'il årint yù toûrné toute lu chîje al manike dou bûtê. Èt ç' n'astot in pö kù d' jùsse, d'ayeûrs, pûskù les brâvès djins nù hapint jamwês pont d' mwês sörts.

- Tù n'ès nin peûr des cayets d' macrâlrîye, hê, twè, mù ptit mouchet?

- Têss kù nèni, alèz! Si dj' rascontùrro jamwês ène sorcîre, djù fro m' sine dù croû sèyance tùnante, èt l' diâle nù wazrè toudi jamwês m'adùzer.

- Z astèz mou hârdi, la, vouzötes, les zwârs d'anùte! Nouzötes, djù chitins ttaleûre al marone - söf respect - cand nosse vîye mére - lù Bon Diù sn âme! - nous racontot des paskêyes inla.

Èt tchèke cöp. lu grand-mére achèvot s' racontadje insi:   

- Mês i gn è candminme kékin kù tù dès nn awè peûr: c'est l' Pépé Crotchet. Nù vas toudi jamwês trinner dé les vivîs, û åddùlon des bîs, û sùl bwârd dù toulminme kéne êwe ki coûrt û ki dwame. Minme dé l' vî pwiss, ca ç' vèråt d' goudi la s'î vint co bin rmète à l'anùti.

S'i wèt des ptits afants avårla, i les apice avù s' crotchet èt i les nèye. "

C'esst insi kù dùspûs est ant tout ptit, lù Mårtin dou Cwabjî avot oyù cåzer des sörcîres èt dou Pépé Crotchet. Ç'astot in ptit afant coume les ötes. Anfin, cåzù coume les ötes, ca c'est ddjà toulminme in pö dròle dù vèy èn afant ki n'è pont d'âdje sù plêre az öre toutes les chîjes des cayets d' macrâlrîye û des contes dù leûps warous. Pou dîre lù vrê ûsk'il est , su grand-mére ki lî racontot ça, ç'astot brâmint lèye ki l'avot alvé. Mardjo dou Cwabjî l'avot yù est ant co coumére. On n'è jamwês seû trop d' kî, mês on sondje kù ç'astot d'ink des fådeûs k'avint atùrprindù l' cöpe doul Plinne des Minîres çùte anêye la. In bèl oume, ma fwè, mês poul cåzadje, in vrê bû d' fagne. I paret - mês on n' l'è seû k'après - k'i n' drouvot l' boutche kù cand on cåzot d' fames, èt ç'astot toudi pou rdîre lù minme sùpot: " Mi djù dis k'i fåt samer cand l' tère esst amoureûse. "

C'est nin pou ça, l'amoûr, ça prind coume lu chite ås vês. Il avot bel bin tchöké des baloûjes al tiêsse doul Mardjo mês cand il è seû k'ille avot sté djondûye, i l'è lêchù pou dou pwâve èt dou sé. Mâria Dèyi! Ké vîye k'il è monné, lù vî cwabjî, cand il è couprindù kù s' bwêchèle ratèdot! On dit dins l' viyadje kù c'est brâmint ces toûrmints la ki s'ont rtapé sù s' keûr, ca dùspûs don, on è bin veû k' ç'astot èn oujê poul tchèt. Èt coume d'èfet, i n'è nin passé l'iviêr. Il è nn alé après l' Nouvel-an, coume s'i n'årot nin yù vlù vèy l'afant k'è skèpiyî in pö après l' Tchandeleûse.

Lu Mardjo n'è jamwês veû fwârt vlatî sù ptit valèt. C'est l' vîye mére k'è atùrtùnù l' pâpâ, èt l' rafacher cate cöps par djoû, èt s' rawayî doul nùte cand i pîlot, èt lî fwêre des kiloûs dins s' pitit bîrce cand il avot l' tins long. C'est dandjreûs pou ça k'il inmot si témint nn aler fwêre lù gâté dins l' chou doul grand-mére. I nn avot d' kère, don, lou, k'ile lî raconte sù les diâles èt les nûtons, èt les deûs macrâles Magrite èt Zabèle ki montint à tchvå sù leû ramon pou nn aler danser à mêynùte dùvant l' rotche ki pwate co leûs noms. Il astot dùlé s' bobone, bin adolmidjé, èt ç'astot tout. I l' choûtot èt i s' rafiyot k'ile lù rassèrache sùconte dou s' gavêye avù toute lu fwace ki dmèrot dins ses vîs brès, mêgues coume des trikes d'awèr trîchner leû vîye dèrante.

****************************************************************

Mårtin avot dèdjà wit ans, asteûre, èt il avot intré al grande sùcole. Ç'astot co rin, ca l' mwêsse couprindot fwârt bin kù l' pitit n'a plot rin d'esse in baståd, sapinse les canleûs. T'a-n åros yù des cés k'i gn è ki l'årint mètù tout seû sù ène randjîye èt s' lî dùsfinde dù djouwer avù lz ötes. Ç'astot l'aladje insi, la, dinltins. Mossieû l' cùré avù, k'avot sté mou vayant pour zès. Il avot cåzé poul Mardjo al coustîre, ki l'avot bin volù prinde coume êdante. Èt i lî avot minme dùné in ptit gangnadje dù rawète ki lî fjot bin dou bin. Ç'astot naler souner à messe èt rnètiyî l'èglîje lù lindi. Ça fjot dagouner kékes mougneûs d' Bon Diù - savèz bin, don, çù sörte dù djins la ki vlat z esse pùs catolikes kù l' pâpe -. Mês l' cùré lèzî rdùlot l' poy tanawète a prêtchant sù Marîye Madlinne ki s'avot rpinti, èt kù l' Bon Diù avot passé l' loke sù ses pètchîs.

Pou dîre lù vrê, ça n'alot in trop må, cwè. Mês sù nosse pöve tère, lù cé ki n'è pont d' mizéres a ratind.

Èt coume d'èfet, l'anêye d'après, c'est l' grand-mére ki n'è pùs seû hay. Pourtant, ille avot co sté rèvèrante jùsk'adon. Djù n' vous ê nin co dit k'ille astot strùpiyîye. Ayi, ille astot bossûye dùspûs estant toute djönète d'awèr sùté pwartù sù s' dos des satchêyes dù grin pùs grosses kù lîye jùsk'ou molin d' Wézelvå, deûs eûres lon. Ç'astot ddjà ène fâmeûse trote, la, vouzötes. Èt pûs ç' cöp la, c'est lîye k'i falot co k'î rvache lù sùrlonnmwin pou z aler rkêre lu mönêye. Mågré sù strùpiyadje, di-dj', ile vinot co bin à pont al mwåjon: ille atùrtùnot l' fû, ile molot l' cafè, èt si l' rime lî pùrdot, ile sù mètot à rchèrer tous les cwîves èt cafroyî les assiètes dù stin.

Lu pöve vîye djint astot dèdjà mêgue coume in clå d'avance. Mês dùspûs çt iviêr la, ç'ùnn astot pùche. Pöve djint k'avot toudi mizériyî toute su vîye! Ille è nn alé tout bê doûsmint, coume ène tchandèye arivêye à s' coron ki s' dùstind a fjant ène pitite bleûwe flame. Ène pitite flame ki vùt d' toutes fwaces blamtiyî jùsk'ou dêrin moumint.

C'è sté lù ptit Mårtin k'a-n è sté fin dzörniyî. Il è sayî d' fwêre lù fwârt, lù gamin, èt ratnù ses låmes tout l'atermint dèrant. Mês cand on z è sté al çùmintîre, lù pöve afant n'a plot pùs. Doulmint k'on z è yù passé les cingues dins les pougnêyes dou wachê poul dùchchinde ou trö, i s'è mètù à brêre à sèyês èt à sèyês.

Dùspûs don, ça n'è pùs sté dou tout l' minme a scole. Il astot hagnûle coume in tchin rtraké. Al nùte, i wachotot ène minùte dins ses dvwârs dù scole, èt pûs, hay èvöye avå les tchamps èt les bwès, la k'i catoûrnot jusk'al nwâre nùtîye. Tù n åros yù dit in vî leûp mérseû, k'è sté ctchessé fû doul yêde, èt ki bat les campagnes sins vnance ni alance.

******************************************************************

IV

In bê djoûr a l'anùti, kù s' mére vinot d' rariver dud mon l' coustîre avù ène banslêye dù mousmints à rakeûde û à rassercî doul chîje, vou l' la ki rmousse al mwåjon coume in fonnet, mitan wîclant, mitan tanflant, mitan tchûlant: " M...m...momo...moman, moman! Lù Pé... lù Pépé... lù Pépé Crotchet! ".

Lu mére avize ses solés-galotches - ç'astot des vîs solés rùsmèlés avù des smèles dù bwès - k'astint tout adag'nés avù doul böje. Ile couprind k'il avot co sté trinné après l' Fwè û les Fagnes Mariyète. " Pitit arnôje, di-st-ile, ûskù t' t'ès co sté stiker pouz esse acayté inla? Tù m' frès dâner ca tù m' frès dâner."

Cand l' gamin è yù sté ène miyète rapåjté, i s'è splikî:

" Dj'asto ki pèchot ås tchacås dins ène basse padrî les Barakes. Tout d'in cöp, al toute vesprêye, dj'ê veû ramichî yåk dins les djonkês. Djù compto kù ç' n'astot k'ène rinne û in cwâctrê. Mês après, ç' cöp la, i gn è rèchù fû des yêbes coume ène nwâre mwin plinne dù crawiyeûs dèts. Pùs k' chûr kù ç'astot l' Pépé Crotchet.

Lu mére è wêtî doul rapwêri coume ille è seû. Pûs, cand il est rùsté in pö trankile, ille lî è co bin rùcmandé dù n' pùs aler röler dé les bîs, les gofes èt les vivîs.

" In bê djoû, i t'î vêrè apicî. I n' fåt nin rîre avù ces cayets la! "

In mwès pùs tård, ttafwêt astot dèdjà rouviyî. Duspûs sacwants djoûs, i gn avot vnù des grossès walêyes dù gùrzês, les bikets d'avri, sapinse k'on les loume. Les hapeûs d'êwe - ç'astot les cés ki vlint d' toutes fwaces rêwer leûs prés après les lavåsses, èt s' naler haper l'êwe ou vèjin ta dùsbrôlant s' bâradje -, les hapeûs d'êwe, di-dj', astint an route toutes les chîjes. Gn a-n avot yène dù böjrîye, djù n' vous di k' ça, sùl dùzous des prés doul Djêrline, ki sont mèyùs fwârt a tiêne. L'êwe ki vnot djùs, fû des bîs d' rêwadje èt des bîchons èt k'avot ranêwé l' pré, ile dùmèrot dins des ptitès gofes dùvant dù rgangner l' mwêsse-bî.

Lù ptit Mårtin avot st èrité d'ène vîye pwêre dù botes doul cinsresse des Batis, kù l' Mardjo î alot co bin fwêre kékes kerwêyes doulmint k'i l' rùkestint. Ké n aplåsse, toulminme, çù ptit Cwabjî la! I n'avot rin trouvù d' mî kù d'aler brechler dins les pèchotiss doul Djêrline, soi-disant pou vèy si ses botes nù poûjint nin. Il astot la ki pestùlot flitch flatch dins l' brölî, èt tout d'in cöp, i tape ses oûy sù des ptits tchiniss, coume des trawe-pî, ki grèvissint dins l'êwe. Èt pùss k'i rlouke après, pùss k'i lî sanne k'i créchat, k'il atrapat des crawiyeûs dèts, cate sù tchèke pate, avù ène nwâre pê pou les rapåmer.

Lù Mårtin è dmèrù in moumint aclawé, coume afagnî dins l' warbîre. I s'årot bin volù såver vöye, mês ses djambes nùl vlint nin choûter. Il årot bin volù criyî, mâs i gn a vlot nin rèchù in sâké kwîk fû dou s' gârgasson. Al fin, il è clös ses oûy, il è bwâlé in cöp co pîre k'in vê k'on stranne, èt il è rabizé ou viyadje à grandès hazêyes, atout s'apîtant dins les hoûrlês èt dins les örmûres des tchèrètes. Il è rarivé pùs mwârt kù vike, avù les pougnets stokés, les gngnos mùsdris, lu figùre toute kùchèrêye. Su mère lî è tiré ses sokètes toutes frèches èt, poul rachandi, ile lî è voûdé ène pitite goute dù blanc pèket, k'il è bèvù a trimpant in sùk dùdins. Pûs ile lî è co stouné l' minme sermon, dù n' pùs s'aler tchöker dùlé les choûrdants, les bûs, les fontinnes èt les êwes.

I gn è rin yù à fwêre. In mwès pùs tård, çù rastot l' minme coumèdîye. Lù gamin astot ki rwêtot les aragnes d'êwe, les damjèles èt les rougnes d'êwe ou Wézèmwârin. Çù cöp ci, i. l'avot veû rèchù fû d' l'êwe avù in pèchon atùr les dints. Il avot co toudi veû ses witt crawiyeûs dèts avù l' nwâre pê ki les rdjondot, èt les deûs cros dins s' gueûye. Lu mére, lu Mardjo, nù savot pùs cwè. C'est k'ile n'î croyot k'à mitan, la, lîye, à ces contes dù nûtons èt d' pépés crotchets la. C'est pou ça k'ile n' årot wazù nn aler trouvù in rbouteû pou s' valet ca ille avot peûr dù pèter d' rîre à s' nez. Ttafwêt n'ègzistot dandjreûs kù dins l'idêye da Mårtin, coume ène sörte dù sondje ki l' pùrdot pa cöps, cand il astot addé l'êwe. I valot co mî n' pont fwêre dù cèrèmonîye, èt d' jùsse dùsfinde dù toutes fwaces ou gamin dù co nn aler pourmonner dins ces frèchès places la.

Çù djoû la, lu mére è monné in dèrö d' tous les diâles, ta promètant fessêyes, ratoûrnêyes èt ploûzêyes s'ile lù rpùrdot co à z aler baloûjner l' long des êwes. Dj'åros volù k' z årîz oyù l'ahoûlrîye k' ça è fwêt ç' chîje la...

*****************************************************

...Sùl tins k' su mère beûlot èt dèjùrot, Mårtin s' sintot tout dròle. I n' brayot nin; i n'avot nin peûr; i n' rùspondot nin. I gn avot coume ène fwace ki lî montot dins s' cwâr èt ène vwas ki lî djot: " vins-î co mês nùlzî dis nin. " Dùspûs ç' djoû la, lù gamin est sté pùs trankile. I n'adùzot pùs les ötes sùcolîs pou in rin; i n' s'amwêjichot pùs cand i l'akèrint. Mês ninrin, il astot brâmint mwinss à sn ouvradje, èt toudi dins l' lùne, avù des oûy grand å lådje coume les biches ki vnat lùrter l' blamêye d'in bréjiss à l'anùti. I n' rùspondot nin cand on l'arinnot. Cùbin d' cöps kù s' mére lî è dvù dire: " Hê, valèt, c'esst à twè k' djù nn ê " poul hatchî fû d' ses sondjrîyes.

Lù sèmdi, sins k' noulù nùl söye - su mére astot al djoûrnêye amon yink û l'öte -, i s' såvot fû doul mwåjon pal rayîre doul cåve à canadas. Èt hay des guètes atùr les hâyes dou pazê dou Rouvro, jùsk'al Prêrîye, lu coûtère dù prés k'est tout dou long dou rî doul Watringue. Il î balzinot toute lu vesprêye, des cöps a wêtant d'atraper des grèvîyes dins ène boutîye, des cöps a sayant d'apicî ène trûte al mwin, û d' trouvù ène grèvisse padzous ène pîre. I gn avot jamwês pont d' fin k'i s' dècidache à rgangnî l' mwåjon. Ç'astot tout jùsse coume si ène fwace lù ratnot lù long dù çt êwe la, ki courot s' les döyes des önês èt rdjibler s' les pîres, dùvant d' mousser dins l' gargouye doul Falwâche.

Deûs mwès å long kù l' manéje è dèré. Lù gamin n' wèyot pùs l' Pépé Crotchet, mês i lî sannot k' il astot la, ascwati padrî lou. Èt ça lî fjot dou bin d'î sondjer, ca l'imådje dou s' grand-mére rùvnot toudi avù. Su grand-mére, lu seùle djint ki l' wèyot vlatî. Çù k'i rvörot tant l' rùvèy, pour lou sinte ses crawiyeûs dèts dins s' vîye sètche mwin. I gatîrot co, pou djouwer, su pê toute ratchitchîye, dère coume dou cûr, mês ki catchot in keûr doûs coume doul låme. Poucwè n' nin l'aler rtrouvù ou stwayoû, la-höt ou dzeûs des nwârès nouwêyes? Il î plot toudi bin vnù, séss, lù Pépé Crotchet. Kù ça vache coume ça vùt, k'i sondjot l' Mårtin, djù n' såro toudi ddjà z esse pùs malèreûs k' djù n' si, va.

Lù Batisse dou Bochet astot ki rwastot tout s' fournîmint d' pècheû après ène boune longue djoûrnêye. Djùl vù bin cwâre: tapèz èn oûy sùl bachåle fine plinne à houpe: twâs cate bèle trûtes, des blancs, des bârbês, minme ène lampröye, k'on dit k'i gn a-n è pùpont.

" Wêtans d' nous avancî, di-st-i dins lou-minne; sùrtout kù dmwin c'est co les Florîyès Påkes èt i s' fårè bin rassonrer al nùte pou z esse mou faråd cand on z îrè rpåcter les tombes. " Lu pèche sùl sùpale, lù banot ou brès, èt l' dossêye d'atiray dins l' malète, vou l' la k'ascåche lù pazê d' Mùssi à grandès hazêyes. Djondant l' frinne Onê, in lîve boule fû dou hoûrlê èt lî passe cåzù inte les djambes.

" T'ès toudi bin doul chance kù dj' n'ê nin m' chouflète, la, ti, pou in roussê. Djù t'åro yù striyî les orèyes coumifåt. (...) Tins, vou nous la ddjà bin ou réss dù l'ètang des Twâs Sås. " Lu place sù loumot inla à cåze des twâs vîyès sås k'astint mètûyes yène dùlé l'öte ki rwêtint l'êwe. I fjot dèdjà in pö brùne èt i brouwinot.

" Pourtant, mildjù, djù n'ê nin l' chike, di-st-i l' Batisse a s' chompiyant les oûy. Keskù c'est d' ça pou yåk k'est la ki flote inte deûs êwes. On n dîros... Godferdom dù nondidjù! T-i possibe ca t-i possibe! Bin têss k'ây, joûrdùdjù! C'est lù ptit valet dùd mon l' Cwabjî, avù s' roudje camizole. Twâs çant vingt mildjù d' nondiguète!... "

Vou l' la tossi vite rabroûyé ou viyadje åttriviê des tchamps, coume in fonnet k'årot yù l' chite. Èt ta lêchant l' pèche èt l' bachålêye dù pèchons èt tout l' sint-friskin an plan lù long d' l'ètang.

" Pöve gamin! t-i possibe? Abîye amon l' champète pûs amon l' mayeûr. "

***************************************************************

Ké ramchîrîye dins l' viyadje les djoûs d'après. C'est k'on z avot mètù l' gamin al morgue, èt k' l'ùch avot sté sèlé avù dou plomb. On djot k'on d'vot fwêre vùnù l' pârkèt. Minme lu pöve mére, ki n' sù savot rawèr dou chok kù l' nouvèle lî avot fwêt, n'avot nin yù l' dwat d' l'aler vèy. I gn è des cés ki djint k'on l'avot poûssé a l'êwe. Pou dîre lù vrê, i gn avot k' les oumes k'avint rapèché l' cwâr avù ène pitite bârkète ki savint cwè å jùsse. Mês l' mayeûr lùzî avot bin dùsfindù d' dîre yåk. Mês savèz bin coumint k' ça va, don. On n' dit rin èt on dit toulminme yåk. " I n' lù fåt toudi nin rèpèter, da, mês i parètrot k'on z è trouvù l' cwâr dù gamin tout kchèrådé, coume si ène biêsse l'årot yù hagné al figùre, ås mwins èt ås djambes. Èt mn oume è sté plêder amon des djins ersè - djù n' vous dîrê nin amon kî paskù ça n' sù dèt nin sawèr - mês on cåze dou cé k' ç'astot dandjreûs l' pére dù l'afant. Savèz bin, don, yink des fådeûs k' avint vnù atùrprinde lu cöpe doul Plinne des Minîres la dîje douze ans. Après i s'è mariyî avù l' bwêchèle d'in gros cinsî d'après Atrivå. Èt bin i parètrot, - mês djù n' vöro nin z a fwêre in vrê, da - i parètrot, di-dj', kù s' fame n'è pont seû awèr d'afant avù li. Èt cand ille est aprindù l' fin mot poul Mardjo; ille a-n è dùvnûye aradjîye, èt ille è djèré dù s' rùvindjî sù l'afant. Pöve gamin, coume s'il a plot yåk! Èle l'årot fwêt sîre dùspûs kékès sùmwinnes, èt ou bon moumint, il årint låtchî in tchin dressé ki l'årot stranné. Çù n'est k'après, dandjreûs, k'on z è sté foute lù cwâr à l'ètang des Twâs Sås, pou fwêre acwâre k'i s'avot nèyé. "

Èt ça ratakot d'èn öte des costés:

" I gn è co des ötes ki d'jat - mês mi, djù n'î cwâs k'à mitan - kù c'esst in leûp warou k'in sörcî è avoyî pou scroter l' gamin. Pöve pitit, va, il astot si vayant. Mês, s'i gn è doul macrâlrîye padzous ça, mi, dj'ê idêye kù ça srot pùtot l' Pépé Crotchet ki l'årot hapé ou fond d' l'êwe. Mù n oume raconte k'i wèt toudi des dròles dù passêyes dins l' böje avårla.

C'est des passêyes avù cate dèts avù des grawes èt ène pê ki les rapåme. "

**********************************************************

Lù mårdi doul ponneûse sùmwinne, i gn è arivé ou viyadje deûs nwârès limouzines avù des bês faråds mossieûs plin. Dins l' prèmîre, gn avot deûs jandârmes, pûs in grand diâle d'oume avù ène djåne gabardine k'i loumint " Coumissêre ". Pûs l' vî docteûr dù Wèlin, ki travayot dou médcin-lèjisse pou les tribùnåls. I n'avot pùs sté vnù ou viyadje dùspûs l' minêye dù plokes dùd la cink ans. Dins l' deûjime ôto, ç'astot l' Baron des Ropètes, kù ses tères vinat bètcher ås prés d' Pierzê, ûsk'i gn è l'ètang des Twâs Sås.

Il ont sté tourtous assanne amon l' Mardjo, mês l' pöve djint astot co toute sùbarêye, èt i n'ont nin polù tirer bin yåk dù lîye. Lù docteûr lî è dné ène boutîye dù drògue, k'i falot wachoter cink minùtes, pîs z a prinde ène kîrêye à cafè al nùte pou s'adwarmù. Après, il ont sté tourtous al morgue, pûs à l'ètang. Dùvè ène eûre dù l'après-nonne, il ont vnù rmarèder amon l' mwêsse dù scole.

Après l' marinde, lù mwêsse è dmandé si on pörot dùscèler l' morgue. I s'ont rwêté in ptit côp d' biêrd, d'ink à l'öte, pûs l' coumissêre è dit: " Ây, ô, vous l' plèz bin fwêre dîre ou mayeûr, èt ou cùré, èt k' ça vårot mî d' fwêre l'atermint dmwin, pou n' nin s'acramiyî avù l' djûdi-sint. Djù n'ans pont trouvù d' proûves pou dîre kù ç' srot öte tchöze k'èn acsidint. Lù gamin è bin morù nèyé, d'awèr bèroûdé dins l'êwe. Dj'ans rùlvé l' trinnêye dou s' bote sùl bwârd dou vivî. Èt pûs mossieû l' docteûr è trouvù d' l'êwe dins les poûmons, çù ki n'arive nin cand on tape a l'êwe ène sakî k'est mwârt d'avance. Lù pûs dròle, c'est k' les chèrådes èt les cùrnaches k'il est plin l' cwâr ont sté fwêtes après l' mwârt, ca ile n'ont nin sinné. Å dfêtt dù ç' pont la, nù m' dùmandèz nin ni cwè ni kesse, ca djù n'î couprind rin non pùs. "

" Pour mi, di-st-i l' Baron des Ropètes, dj'a-n ê trop veû dins m' vikêrrîye, des cayets ki n' sù plint splikî, kù dj' n'ê nin sougne dù v' dîre kù dj' cwâs al sörcùlrîye. Dj'ans ène meskine, k'alot toudi fwêre sù bwêye ou bî doul Pîrafin, èt ki l'è veû ossi, cù fâmeûs Pépé Crotchet la. Si ça n' tênrot k'à mi, tous ces fonds la ki sont st atùr mes dominnes èt les prés d' Pierzê, èt bin, i dùvrint z esse dùsfindùs pou les djins s'î pourmonner. "

**************************************************************

IX

In djoû k'il astot d' passadje, lù docteûr è rùvnù vèy lu Mardjo, èt i n' è rin dmandé. I fjot co toudi s' toûrnêye dins s' cariole hatchîye pa in blanc tchvå. I n'avot jamwês pont vlù d'öto, mågré k'i s'a-n årot bin plù payî yène. Lu Mardjo astot dùvnûye mêgue coume ène fwâchète, èt toute sùblarîye, k'on årot yù dit ène mwate. Avù les rmédes kù l' docteûr lî è dné l' deûjime cöp, ille è rmonté tout doûsmint l' raviêr. C'est nin pou ça, les djins dou viyadje astint brâmint mwinss hinniveûs kù dvant avù lîye. In maleûr n'arive jamwês tout seû, mês lîye, ille n unn avot yù dù pùss kù s' pårt.

Pou n' nin l' lêre toute seûle a s' mwåjon, lu cinsresse des Batis lî avot dné l' tchambe dou s' dêrine gamine, ki vnot dù s' mariyî l'iviêr dù dvant. Lu cinsresse, ç'astot ène grosse roujlante djint, ki riyot dou matin al nùte. Ile dijot toudi: " Våt mî rîre kù brêre, don: lu chinêye est pùs bèle. Ille pùrdot l' Mardjo pou s' bwêchèle, èt on pùt bin dîre kù c'esst à cåze dù lîye k'ille è sté chapêye.

Ou viyadje, lù vî mwêsse dù scole è splikî l'afwêre: kù l' gamin s'avot nèyé mês k'on n'årot seû dîre dûsku les cùrnaches k'il avot su l' cwâr dùvnint. Adon, les djins ont sté chûr kù ç'astot in toûr dou Pépé Crotchèt. Co pùs vite pöy kù l' Baron lou-minme, èn oume ki dnot toudi l' pîce ou curé pour lou fwêre dou bin dins l' viyadje, lù Baron avot dit k'ène mèskène da sinne l'avot veû d' ses propes oûy. Adon, i s'ont mètu à vinde tous leûs bokets dou fond d' Pierzê. Mês cand ç'astot al håsse, i n'alint nin, t' sans bin. Les ètrandjîrs avint oyù brûtiyî pou l'afwêre dou ptit Mårtin dou Cwabjî, èt gn avot noulù ki djot bêcöp dssùs. Al fin doul vante, t'avos toudi in ptit oume k'arivot coume avù des fins solés. Ç'astot yink k'on n' counùchot nin avårci, mês à vèy ses mousmints, i vnot chûrmint doul vîye. Il abwardot al vante jùsse sùl fin, i mètot in pris nin trop mwês, èt l' boket lî rùvnot. Mês, i n'a fjot rin, èt les tères rùtoûrnint à trîche avù des gngnêsses èt des sîzons plin. Çù n'est k' chîs sept ans pùs tård k'on z è veû les cés dou Tchestê k'î vnint tchesser ås coks dù broûyîres èt ås rålês d' dùgnêsses. I paret k' ç'astot l' Baron k'avot rachté ttafwêt. Les djins n' savint nin d' trop s'i n'avot nin toûrsivé pou z awer ces tères la.

Mês, djint-i, i gn è in Bon Diu. Si c'est lou l' cåze dù toute çùte amwintchrîye la, i l' rùpayrè toudi d'ène façon û d' l'öte. Èt dins kékr anêyes, i gn årè pùs noulù ki pwatrè s' nom. Ca:

X

Lu djönète, dandjreûs ène sùtùdiyante d'ùniv, s'ascroupa sù in vî sto, hatcha sù ptite calputrèce fû doul potche dou s' satch à dos, èt s' mèta à taper.

" Lù vingt-chîj dù jùlett, 2006. Dj'ans coutinùwé à stùdiyî les passêyes dù loute dù ç' nùte ci. Ile dùvnat des nikêyes N3 èt N4, ki s' rùmètat ås böres B18 èt B18'. Noste abayîye sù l'êre dù stramadje d'ène nikêye sù rasgùrdit tchèke cöp.

Mês l' pùs bê d' tout, dins l'ouvradje d'anùte, c'est k' dj'ê sté plêder avù in vî oume dù Viance, ki m'è raconté des dròles dù cayâts. Sùl cùmasmint des anêyes 1900, kù s' grand-pére lî racontot toudi, i gn è yù sacwantès djins k'ont morù droldùmint dins les tères k'asteûre, c'est l' RALWÊL (lu Rèzerve poul Wårdadje doul Loute dou Höt d' l'Êwe-dù-Lesse). I gn a-n è bin yù twâs cate. Mês l' vî oume avot pùs vite souvnance d'in ptit gamin d' Transine dùvè 1910, èt dou vî Baron des Ropètes dùvè 1920, jùsse après l'öte guêre, sapinse zès. On les rtrouvot mwârts avù des cùrnaches plin l' cwâr.

Adon, d'après les ochês rtrouvùs dins nös foyadjes, i gn avot des loutes griblé dins les fonds d' Pièrzê èt jùsk'al Pîrafin.

C'è sté dandjreûs inla jùsk'al grande guêre. Après, dj'ê cåzé avù des vîs pècheûs. Èt, dijans dùspûs 1950, i n' s'ont jamwês plindù pou des damadjes dins les pèchîres. Ni oyù dîre k'ène biêsse î årot vnù ås pèchons. Èt i n'ont jamwês pont veû d' passêyes lù long des vivîs. C'est dazârd l'anichtadje des bîs pås êwes dù mwåjon k'è aspêtchî l' djönladje des loutes. Après 1960, les êwes dù mwåjon ont dùvnù plinnes dù chimicrîyes. Z öz yù ossi lù rplantadje des fagnes k'astint sùl montant des fonds d' Pierzê èt k'alint jusk'ås troufrîyes dù Glêreûse: Rèbèfwè, Nargåfwè, Djerbêfwè. Ça fwêt kù l' sörte doul loute dù l'êwe-dù-Lesse - ène sour-sùpêce nin coume les ötes, brâmint pùs grosse - årot chûr disparètù pou dou bon s'i gnårot nin oyù l' RALWÊL. "

Èt in pö pùs lon, sùl minme diskètêye (lù diskète è sté rtrouvûye lù lonnmwin dé l' cwâr doul sùtùdiyante), on pùt co lîre:

" Djù vins dù rlîre in papî da Pastoret dins l' " European Journal of Viral Anthropozoonosis " sùl sinsiûlisté des biêsses-à-tètes ou vîruss dù l'aradje. Lu loute est yène des sörtes dù biêsses-à-tètes les pùs sansìbes, èt ile fwêt toudi ène foûme sùrdêvante. Ille atrape ène fwace nùzoume, k'ile pùt minme touwer des rnåds èt des singlers.

Dins tous les cas, cand on rfrè l'avîrance des djins k'on z è dandjî poul deûjime mitan d' nosse sùtùdiyadje, i n' fårè nin rouviyî in stùdiyant d' zolojyince, co pùs rade yink k'esst adiêrcî sùl cùdûjince des mougneûs-d'-tchår.

I fåt d' toutes fwaces ène kîre sù l'adûjance des loutes.

I fåt wêtî d' couprinde tous les pondants èt les djondants dù leûs rapwârts avù les djins; s'ile les atacat, cand èt poucwè? Ca djù n' mù sin pùs trop chûre avårci, la, mi! "

*******************************************************************