Tchétchénie: un peuple oublié:

Tchetcheneye, co toudi des ptits k' on spotche !.

Les guêres, c' est coume les biêsses såvadjes, gn è des cîes k' ont wèt bin dou djoû, come les biches et les ciêrs. Si on-z a touwe kékènes fû des tchèsses, bin d' azârd si on n' su fwêt nin apicî pås gârdes.

Pî, gn è des biêsses ki n' rèchèt k' dul nute et ki vikèt din les tèréyes, t' es come les tassons [blaireau], les tèchons k' on dit a Bèrtrès. On les pôrot dzingnî [décimer] tourtous et k' on n' è sårot ddja rin.

Lu Cossovo, c' astot la prèmîre sôrte. In côp k' l' OTAN è cminci a bèrdoûchî su les Serbes, les gaztîs ont sî (ont chû, coume on dit a L' Foret) et les warachriyes des Serbes ont sté moustréyes å monde ètîr.

La Tchètchènie, c' est la deujime sôrte. Et les Tchètchènes, c' e-st in peupe pâr supotchî, sondje la Zabèle Istagaraga, moutè ène Basse (basque) du France, avu in nom parey. Nosse Zabèle, don, c' e-st ène gaztîre k' è rascovru les deus guêres du Tchètchèniye. Al prumîre, 1994-1996, ille î è sté dupu d' 20 côps. Nin dandjî d' dire k' ile ne cåze nin pou n' rin dire. Et d' mète toute ses souvnances su papî din in lîve ki vint d' rèchu a l' Harmattan " Tchétchénie, un peuple sacrifié " , in peupe oûte-duné, abandouné.

Kî çki l' è lêchu la, hatche et matche (abandonné lâchement) ?

1.- Les Russes, pou cmincî, k' ont yu sougne, dudpî k' il ont avayi les ptits payis dou Côcâze, la in gros siéke, du lêchu toutes les margayes couver, sin jamwê vlu dusfagnî ces payis la. Puto tunu avu onk conte du l' ôte pou l' supotchî, come après la prèmîre guêre du 1994-1996, ûsk' il on-st amontè in gouviènmint ki fjot avu les Russes.

2.- Leus propes mwêsses tchètchènes pou continuwer, mwintes du zès toudi, ki n' tûzèt k' a s' aritchi tins dul guêre, tout vindant des fuziks û a passant du canabisse du l' Afganistan.

3.- Roviyîs ossi pås payis muzulmans, leus frés du rlijion. Pasku les Tchètchènes, c' est nin les Palestinîs. I sont lon, don, ... et c' est des blancs !

4.- Mês co pu vite roviyîs pa tous les payis du Coûtchant, paski cet-ci vlèt fwêre bèbèle ås Russes, pou polu martchoter avu zès.

Dud la, les toûrsiveûzriyes des djins èvoyis pa l' Ûrope pou-z aler rcouniche les camps d' rèfudjîs. Cand ça è cminci pa s' sawè tous tchamps tous payis (pattavå), ku les Russes rudinguin [battaient comme plâtre] les refudjîs dins onk des camps, lu Consey du l' Ûrope è dmandé pou-z aler vey cwè.

Pou s' bin fwêre vey pås Ûropèyins, lu Vladimir Poutine è dit k' ây: lu Consey î plot bin aler. Mês duvant l' voyadje des inspecteurs, les Russes ont yu sougne du monner vôye tous les prijnîs k' avint sté ringotés [battus, maltraités], du rmète ou camp ttafwêt a couleur et d' î ramonner des nouvês prijnîs bin rlîs [triés sur le volet] et co scolés pou zès dire ou dèlègué tout çku les Russes avin anvîe du lzî vey raconter.

Al rèchuwe du camp, in groupe du djins s' avin ratrouplés pou vnu dvizer avu l' messadjî d' l' Ûrope. Ene bèle ocâsion pou loû d' oyu èn ôte son d' clotche ! Croyèz v' ku çti-ci è fwêt arèter l' câr pou-z aler copiner avu ces djins la ? Santèz bin ! Ça n' årot nin fwêt plêji å Russes, don, camaråde ! Valot mî passer oûte !

Dins s' rapwârt, on put lire ku, ostant les Russes ku les Tchetchenes, avin måtrêté les civils.

Zabèle, lîe, cand ille atind ça, monte a sminces [s' emporte] du nn oyu des parèyes. Pou 200 rapwârts du zingladjes pås Russes, èva-t èle, gn è in seûl du plûzadje pås Tchètchènes. N' alèz nin sondjî ku les djins s' årin tê, don, s' i nn gn årot yu oyu. Ca les djins d' avår la nu wèyèt nin si vlati k' ça les kékes chefs du l' Armée Blantche, ki sont tout bounmint des brigandeus, la come t' ès lu Shamil Basayev. I n' wèyèt nin vlètî non pus les volontêres du l' Aternacionale Islamisse, pask' i savèt bin ku ces-t-la su batèt pou leus propes idéyes d' èn islam sin frontîre et mou a l' ascate [très à l' extrême bord], et chûr nin poul bin du peupe tchètchène et sa rlidjon tradicionèle avu ses sints et ses potèles.

" Pu jamwê ça ! " k' on-z avot dit co çant côps après lu peupe-supèta [génocide] dou Rwanda (1994), dul Bosnîe (1993) et dou Cossovo (1998).

Mê, coume dijot l' Omer Marchal, ûsk' i gn è des oumes, gn è des oumrîyes. I vlot dire par la, dul bassesse uminne.

C' ére lu vrêy, ou tins dou vî Bon Diu, c' est co l' vrêy asteure et ça pôrot co bin l' esse dumwin, malèreuzmin.

Lucyin MAHIN, lu 25 du Mârs 2000.

Modêye e rfondou walon.

(Back index par sujet); Alans rzè a l' edesse des sudjets.

(Back homepage) Alans rzè al mwaisse-pådje.

(Back textes en wallon commun) Ralans sol pådje des scrijhaedjes e rfondou walon

 (Back liste des articles journalistiques de L. Mahin) Ralans è sol djivêye des scrijhaedjes di papîs d' gazete da Louline Voye