|
|
Avou deus soces did mon les coûtchantrèces (avec deux troupes ouest-wallonnes) |
|
|
Avou deus soces did mon les coûtchantrèces (avec deux troupes ouest-wallonnes) |
Avou « l' Equipe » eyet « Walon dvant tout » di Djerpène
C' est sovint åjiye, cwand on dvize di soces di tèyâte è walon, di sawè d' èwousse k' èle créche. Pou ces djins la, loyis a leus corons, a leus cortis, on hamia, çu n' est nin l' viladje. Chamborgneå, çu n' est nin Boufiou, co mwinsse Tchèslet.
Adon dji n' sé nén si dji pou dire ki Djerpène compte trwès soces di tèyâte è walon, cåze ki si « l' Ekipe » djouwe vormint a Djerpène, « Walon dvant tout », li, monte ses pices a Gougnies, èyet « Riyons èchêne » a Joncret.
Trwès soces pou 11.779 abitants ! Eyet i s' trove co des grigneus pou dire ki l' walon lingadje compte pou du bure! Mins tot comptè tot rabatu, come li dit Pierre Faulx...
å prix k' èl bure cousse, çoula n' est nin dèdja si må di compter pou du bure.
Di pus, ci mwès ci, Djerpène va stomaker branmint di ces grigneus la. Deus di leus soces, « l' Ekipe » èyet « Walons dvant tout », montnut inne revue oudoubén in cabaret-tèyâte, tot çoula fiant pus di 100 djouweus èyet musicyins dissu sène.
Les 7, 8. 9, èyet 14,15 èt 16 di mârs, l' Ekipe djouwra al sâle des di Djerpéne « Djerpène å fil du tins »... inne revuwe di 12 tåvias, tote ètire escrite pa Michel Robert. Nos avans vèyu yinne di leus rèpèticions, èyet dji vos pou assurer ki çoula sra du spèctake des grands djous.
Pinsoz: deus Djerpinwès, avou inne chike di lindmwin d' pintcousse si lèynut èpwarter dissu in agayon ki leu fé visiter leu viladje dispu les romains to passant pa les espagnols, li vizite da Napoléyon èyet li rmise do drapia al djonnesse di Djerpène. Djusk' a... Si vos vloz sawè si on les rtrove å djou d' ådjourdu, vos n' årez k' di les aler vir.
« Djerpéne å fil du tins », c' es-st ètou li rmètadje è walon di mêsses-tchansons francesses, avou des texes ki n' ont pus rin a vir. Bin seûr, avou l' prumîre version, adon ki çu ki Michel Robert èyet s-n ekipe volinne fé, c' èsteut di nos fé passer in bon momint. Assurémint. si vos estoz Djerpinwès, sacants clignètes, des apartés come on direut è francès ou mia des privates jokes vos frans bin rire.
Mins Michel Robert a sti assez malén ki pou arandji s' rvuwe pou tertous. Ki çoula fuche dins « Djerpéne å fil du tins » ou dins l' cabaret tèyâte di Gougnies, çu k' i gn' a d' plêjant, c' est l' banslêye di djonnes ki montnut dis sus les plantches. Dj' enn a veyu dupus d' vingt.
Gougnies, pou fiester ses 10 ans, a decidè di djouwer inne pice d' in ake, « Li fêyeu d' mirakes » avou inne dizène d' efants. Adon, totes les djins k' avinne dedja djouwè dins l' soce dispu 10 ans ont sti rachonnêyes pou djouwer inne fåve ou tchanter inne tchanson Dupus di 60 soçons. Ces tchansons ci srant bin des viyès erguèdènes, ki branmint des djins conèchnut: « Li Ptite Gayole », « Lolotte », « Dins les Ruwéles »,... èyet k' i pouront tchanter echène mågré ki çu n' si lomra nin in ca-baretoké.
Gougnies vos invite a fiester ses 10 ans avou « Walon dvant Tout » les 22 eyet 23 di mârs 1997.
Djan-Pîre TONDU, divins: La dépêche de Wallonie, 133 n° mars 1997
(Back page présentation théâtre wallon) Hay ervoye sol pådje divantrinne do teyåte e walon
