Ebin cwè, Anjèle ?

Scrijheu: Lucien Somme

Trope des Rèlîs Namurwès

Esinneu: Charles Fourny

Djoweus(es):

Li pice: on seul djoweu: Gui Brosteau

Li cåbaret (prumire pårteye): Lucien Metten, Bernadette Malherbe, Genenviève Glineur, Jean Boulanger, Bernard Polet, Michèle Wilmotte.

Pus djonnes djoweus(es): (cåbaret): Sophie Daphné (17 ans), Xavier Baufay (14 ans), Tiphaine Malchair (13 ans), Valérie Pierrard (15 ans), Julie Fagot (6 ans)

Mwesses-tecnicyins: Jean-Marc Leclerq, Pascal Dizier.

On côp d' uy sol cåbaret:

"Ebin cwè, Anjèle!", c' est l' nom do cåbaret-teyåte k' a stî mètu dsu pî a Nameur les 17, 18, 24, 25 et 26 d' octôbe 1997. On-z a dvu fé deus rprezintåcions did dpus po plu mostrer åzès djins on spectake come gn aveut co jamês pont yeu a Nameur.

Jamês pont yeu do pwint d' vuwe do janre. One prumêre pårtiye fête di tchansons, sketches, fåves, rimias. Avou des djonnes èt... des mwinss djonnes.

One deûzyinme, k' esteut one pîce di teyåte da Lucyin Somme, li Presidint des Relîs Namurwès.

One pîce d' asteure su les problemes d' asteure.

Jamês pont yeu do pwint d' vuwe do l' kalité. Ci cåbaret la, c' e-st Ane Fourny kè l' a adjinsné.

Elle a tûzé a tot et a tertos: ås djonnes, ås vîs, ås grigneus, ås bons vicants, ås cias k' ont dandjî d' rire et ås cias k' inmnut ostant yesse muwés [émus].

Gn a yeu des djins d' tot l' payi k' ont vnu, minme d' Arlon, et minme di Brussèle!

Et dji n' so nin d' Marseye!

Come cwè, nosse walon, il est co bin vicant, et nos nn avans dandjî.

Chantal DENIS, èn escluzivitè po nosse wêbe.

On côp d' uy sol pîce et åtou del pîce

"Oyi, oyi, djel sé ben k' il est set eures ! "

Voci les prumirès paroles da Françwès. Cichal ratind après Anjele, ey el va ratinde tote li pîce. Tot rawårdant, i s' met a s' cåzer a liminme, et c' est ça ki l' pîce raconte: comint ki cit ome la di 75 ans voet si veye pa l' ådvins.

C' est li deujinme côp ki li teyåte e walon nos met sol sicanfår [sur scène] on ome ki dvize po li tot seû tote ene pîce å long. Li prumi côp, ci furit "Sodi Hozete", da Albert Maket. Ene pitite diferince: dins ci pîce ci, gn a a on momint dnè li vwès di si cosyince ki vent djåzer avu Françwès Goûrmet.

Ci Françwès Goûurmet la, c' est l' Gui Brosteau, on ome di 39 ans ki "vike 25 eures par djou pask' il est arädji på teyåte". Il a, enawere, amontè si prôpe trope di teyåte (e francès). C' est li ossu k' est prezinteu di l' emission "Al bawete" å Tchenå C [Canal C].

I n' a churmint nen fwet disparexhe [ne pas dé-paraître = ne pas donner une mauvaise impression à] li pîce sicrite d' ene mwin d' mwesse pa Lucyin Some, ki c' esteut mutwè si prumire saye come sicrijheu d' teyåte.

Schoûtans lu nos dire li minme si sintumint so si prumire esperyince d' on cåbaret walon:

" C' est tot rwêtant travayi li ptite soce d' Anjele ki dj' a compris li rcete d' on cåbaret walon.

Po cminci, vos prindoz ene djint capåbe di si fé schoûter, tot veyant voltî lz ôtes. Si possibe ene comére: gn a k' zels po-z awè l' tour.

Vos cachoz après des djins ki l' walon pôreut rachonner. Po ben fé, il e fåt di totes les ådjes: des båcheles, des gamins, des coméres et des omes. Des djins ki n' sont nen la po s' vini mostrer, mins tot simplumint pol plejhi di fé ene sacwè echonne.

Adonpwis, po les acteurs, c' est li pus malåjheye. Fåt aprinde. Fåt reciter. Fåt s' etinde dire k' on va trop rade; k' on n' creye nen fwärt assez, ki ci n' est nen insi k' i fåt mete ses mwins uben toûrner si tiesse. C' est tot djusse si on n' vos aprind nen a fé ene mawe u vos dner on consey po rabressi a môde di djint. La l' neud, di-st i l' soyeu.

A costè d' zels, gn a tos les cis k' on n' voet nen mins ki boutet djusk' a totes les eures : l' electrike, li muzike, totes les indjoles k' i n' fåt nen rovyi. les papis a rimpli et dji n' sé d' tot cwè...

Et å grand djou, onk come l' ôte, il on leu keur ki tocteye tot sondjant a tot les rwêtants et les rlukeuses, k' ont vnu ren k' por zels. Totes les rujes k' il ont yeu, a c' moumint la, ele sont refaceyes. On fwet todi li diâle pus lêd k' il est.

I nelzi dmeure ki li plejhi ... d' avu fé plêjhi a tos les rwêtants et les rwêtantes.

C' est çula li teyåte.!!!"

Riscrit å lére [à la lecture] do livret del riprezintåcion, adjinsnè pa L. Somme

 Alans rzè al maisse-pådje

 (Back page présentation théâtre wallon) Hay ervoye sol pådje divantrinne do teyåte e walon