astok u d' astok [advierbire]

1. ki n' bodje pus, ki n' sait pus bodjî, aspoyî so. Metoz li schåle astok conte li meur. Li schåle est d' astok, on pout monter dso. Dj' a dmoré astok dins l' fås tchmin. L' ouxh est astok: loukîz s' i gn a nén ene pirete padrî. Nos n' dimorrans nén ene munute d' astok tant k' on n' nos årè nén dné çki nos vlans. rl a: e rake, a roke; rl a: astoker; rastoker. F. immobilisé(e), bloqué(e), à ne rien faire, calé(e), coincé(e). >> l' ôrlodje est astok: elle est arestêye. rl a: tini astok, aler astok, vini astok.

2. ki n' sait pus rén dire. Li ptit did mon Hérin ? Il a dit l' prumire sitrofe di s' rima, pu il a toumé astok. Li cmere a dmoré astok: ele droveut l' boke mins nén moyén d' fé rexhe on mot. F. à quia.

3. (d') a costé. Si vs avoz dandjî d' mi, dji so astok. A l' escole do travay d' astok, On n' vos aprind nén-z a viker, Oyi, sorviker, c' est ddja bea ! (A. Gauditiaubois). F. à proximité, voisin(e). >> l' ome d' astok: li vijhén.

4. disconte (po des cayets ki s' tchokèt). rl a: vini astok, aler astok. >> astok ! c' est l' pus roed ki dogue ! u: astok, vî stok: dijhêye cwand des djins s' bukèt. >> toumer astok avou: rescontrer des djins k' on n' vôreut nén. Dj' î a toumé astok avou les vijhéns. F. se faire accrocher par. 5. a fond, fer, foirt. I ronfele astok. F. fermement, fortement. >> bouxhî, luter astok: bouxhî, luter d' totes ses foices. >> serer d' astok: serer, siplinctrer ene sakî, ene sacwè, propmint u imådjreçmint. F. serrer de près. >> cortizer astok, u: frecanter d' astok, u: hanter d' astok: esse toltins avou l' minme kimere, cortizer po l' mariaedje. F. faire la cour assidûment. >> travayî d' astok: travayî fer. F. sans désemparer, d'arrache-pied, avec ténacité. >> èn ome d' astok: a) on foirt ome. b) on vayant, on coraedjeus. F. énergique. >> èn ovraedje d' astok: èn ovraedje bén fwait. F. du bon boulot. >> doirmi astok: doirmi come on sodoirmant. F. dormir comme un loir. >> djouwer astok: a) djouwer sins s' djoker. b) djouwer seré. I djouwe astok: i doet fé 15 po wangnî. >> waitî d' astok: riwaitî sins baxhî les ouys. rl a: carwaitî. F. fixer, regarder fixement. >> esse d' astok, u: si sinte d' astok: esse presse a l' atake, a l' ovraedje. rl a: adrame. F. être en forme. >> shuve d' astok: shuve di tot près. rl a: shût-cawe.

6. toplin. I n a des fruts astok ciste anêye ci. F. à foison.

7. d' astok: al cawêye. Il a vnou troes cwate djoûs d' astok, et pu on n' l' a pus veyou. Dji dmoréve sitampé låvå des eures d' astok. Dj' åreu doirmou des ans et des razans d' astok. rl a: en erote, å long. F. d'affilée, de suite, pendant.

Disfondowes: asto, astok.

Etimolodjeye: etroclaedje di "astok".