båcter [v.s.c.] 1. taper on ptit côp d' ouy, tot dmorant catchî, på trô d' ene båkete, boutans. Ci n' est nén bén di båcter dins l' måjhon des djins. Li sori vént båcter å boird di s' trô. (F. Deprêtre & R. Nopère). F. épier, espionner, reluquer. 2. comincî a s' mostrer, tot cåzant d' ene sacwè k' esteut muchyî. Li pikete do djoû, c' est on bea moumint: li solea vént båcter tot ptit belmint (D. Heymans). Mes chalotes comincèt a båcter (Deprêtre & Nopère). Dji souwe tot, dit-st i, tot rxhorbant les crolés poys ki båctént foû di s' gavêye å lådje. Li ponte do ptit nenè vineut båcter å boird di s' discolté; li vî ome end a pierdou ses berikes (Rasgoutadje). Li bontins båcteye, les bråyes di tchet cmincèt ddja a flori (F. Deprêtre et R. Nopère). F. apparaître, poindre, pointer, commencer. Franwal: ahåyant po: montrer le bout de son nez. Disfondowes: bocter, baucter; Etimolodjeye: viebe fwait sol no "båkete" (riloukî pal båkete). Coinrece Årdene nonnrece, et aschates walon picård. | båctant [addj.] ki brike ene miete. On ptit pepion båctant o mitan des poyaedjes; dji n' aveu måy rén veyou d' si bea (Rasgoutadje). F. saillant, légèrement proéminent.