brouheur [f.n.]
1. brouyård. C' est ene brouheur ki mousse foû d' tere et ki crope ezès fonds. Vola-st ene brouheur ki s' eleve. Li brouheur, sins nou brut, si winne foû del nutisté et si stind dzo les bouxhons (M. Frisée). Li brouheur, påjhûle, s' ewale sol fondreye (L. Remacle). Ene brouheur a côper å coutea : li Spetin vs î ratind (L. Mahin). Loukîz a : tokeu, rinåd 2. F. brouillard, banc de brume. >> t' as idêye di fé rtourner les brouheurs: dijhêye a ont k' a metou on mousmint a l' evier.
2. brouyård ki scheut, brouhene, fene plouve. I brouhinrè torade; i tome ddja ene brouheur. F. bruine, crachin.
3. (imådjreçmint) sintimint d' esse dins l' brouyård. I fåt leyî cori ses brijhes po mete ses broûheurs e coleur (P.H. Thomsin). F. grisaille. >> aveur des brouheurs e l' tiesse: aveur li tiesse pezante après ene ribote. On dit eto: aeur des ptits ouys; aveur må les tchveas.
Etimolodjeye : bodje brouh- rifwait di "brouhene", cawete -eur.
