chuchloter (codjowaedje) [v.c.]

1. dire åk tot bas, po k' on n' etinde nén bén. Li viye ôrlodje mi fjheut tot l' efet d' ene beguene, chuchlotant ses påters dins l' cwén (G. Bernard). Clodene lyi caresse ses mashales e chuchlotant "Pôve viye tchitche !" (F. Barry). I m' ont dné ene decoråcion tot m' chuchlotant: louke a ti: c' est on clå d' waxhea (L. Demarche). On dit eto: suziner, maltoner. F. chuchoter, souffler, sussurer.

2. dire (ene sacwè), sins l' trop espliker, mins avou l' apinse k' on va shuve vos idêyes. C' est l' modele comunisse, li ci des Etiopyins et des Tanzanyins, li ci des socialisses francès et bedjes k' avént chuchloté ås Houtous (L. Mahin). F. chuchoter, suggérer.

Etimolodjeye: viebe fwait sol brut "ch"; loukîz a: chîler.

| chuchlotaedje [o.n.] no d' fijhaedje et no di çou k' est fwait (accion eyet si adierça) pol viebe « chuchloter ». F. chuchottement, chuintement, suggestion.

| chuchloteu, chuchloteuse u chuchlotresse [o.f.n.] li ci (cene) ki chuchlote. On dit eto: onk (ene) ki dit des bassès messes. F. chuchoteur, instigateur.