Cisse pådje ci, c' est ene årtchive do pordjet motî (cnoxhou dizo l' rahouca R11) k' esteut-st elodjî so Wikipedia divant di divni l' Wiccionaire.
Pådje : Motî:houzår
Date : 2008-06-18T22:56:34Z
Uzeu : Lucyin
Messaedje :
URL : https://wa.wikipedia.org/w/index.php?oldid=134208
houzår u houzård [1] [o.n.]
1. ancyin sôdård a tchvå, rilomé foirt waeraxhe; end aveut e l' årmêye otrichyinne, tins k' il estént el Walonreye (18inme sieke), eyet dins l' årmêye da Napoleyon. Ti, copere Djuråd, par azår, Est çki t' n' as nén peu des houzårs ? (J.C. Benoît). N a yeu on redjimint d' houzårs di kihatchî (Motî da Forir). Mi dierinne afwaire fout l' prijhe ki ns avîs avou les noers houzårs; des bons sôdårs, savoz, ki n' bodjèt nén pus k' des rinnåds (D. Salme). Cwand il ont yeu tot veyou des ptitès såles di dzo, avou les mousmints des gurnadîs, des houzårs, des lancîs, des dragons et dji n' ti sai d' tot cwè, il ont monté les montêyes po vey li panorama (L. Mahin). Loukîz a : oursea. F. hussard. >> boere come on houzår: boere bråmint (del gote) et raddimint. On dit eto : come on trô. Et Djam paya l' gote ås catoize fesses et a leu viye macrale di mere; li viye låma s' vere come on houzår (M. Hicter). >> end a plin l' pupe d' on houzår: dijhêye tot mostrant si mwin drovowe, volant dire k' on vs li pôreut fote e vizaedje come on fotreut voltî ene berlafe a on houzår. >> si poirter parey k' on houzår: esse bén poirtant. F. "être en superforme". >> camizole° di houzår. >> taxhete° di houzår.
2. (pa stindaedje) feme k' est come èn ome, ki n' a peu did rén. Cisse feme la, c' est on fir houzår; ele mi fwait sogne (Motî da Forir). Twenete, c' esteut on vî houzår. Loukîz a : cozake, dragon, djindåre. F. "mégère".
3. (vî mot d' cinsî) croupete avou shijh djåbes al tere et ene tchape. Les vårlets fwaiynut des houzårs a campagne (Motî da Gilliard). Loukîz a : sôdår, dijhea. F. "dizeau". >> covrou houzår: dijhea avou set djåbes al tere, et troes djåbes come tchapes.
4. sôre di moye di djåbes. F. "meule".
| houzårdé [o.n.] pwin avou ene miete di raboulets, mins moens ki l' botyî pwin. F. "pain mi-gris".
Hongrwès "Huszár" (vintinme, pask' on sôdår so 20, el Hongreye do 16inme sieke, esteut evoyî al cavalreye. [2]
hoûzaur, hoûzâr, houzâr, ouzâr.