Cisse pådje ci, c' est ene årtchive do pordjet motî (cnoxhou dizo l' rahouca R11) k' esteut-st elodjî so Wikipedia divant di divni l' Wiccionaire.

Pådje : Motî:penitince
Date : 2007-08-21T16:13:20Z
Uzeu : Karima
Messaedje :
URL : https://wa.wikipedia.org/w/index.php?oldid=104005

[wikicôde]

penitince [f.n.]

1. sacwè k' ele n' inme nén, k' on oblidje ene sakî u ene biesse a fé u a subi, pask' ele n' a nén schoûté. Li penitince del plake egzistéve dins totes les scoles do tins k’ ele fijhént pårteye des moustîs avou les cours dinés pås moennes (E. Pècheur). Cwand gn aveut nén po foumer ene cigarete, c' ît l' pus grande di nos penitinces(L. Sohy). On dit eto: punicion. F. punicion, châtiment, sanction, pénitence. >> aler e penitince: dins les scoles, dinltins, aler dins l' cwén, po on scolî k' a fwait ene biestreye. >> måjhone di penitince: måjhone la k' on reclôt des cis ki dvèt esse punis. On bea djoû, mi toû vna; dj' aveu fwai piede pacyince a m' mame, ele mi hapa på pougn, mi moenna disk' a l' ouxh del måjhone di penitince, et m' î vola fé intrer foirceymint (H. Forir). On dit eto: penitincî F. maison de redressement, pénitencier.

2. (pus stroetmint) målåjheye sacwè kel priyesse vos dmande après cfesse, po mostere ki vos rgretez vos petchîs. Po vosse penitince, vos diropz troes påters et troes åvés. Ti vas a cofesse, ti fwais penitince, on t' pardone et, franc batant, ti rcominces (J. Schoovaerts). I m' dimeure co del boune simince Ki djômeye la, å fond di m' cour; Dji l' a spårgnî po m' penitince Et po vos dire: pårdon, signeur (R. Tabareux). Djihan-Batisse bateut tot l' payis do Djordan; i pretchive on bateme di penitince po dmander pardon po les cometous petchîs (sint Luk, ratourné pa J.M. Lecomte). F. pénitence, repentir, expiation. >> fé penitince: a) si priver di çou k' on inme bén, po-z aveur des advintaedjes dins si croeyance rilidjeuse. F. faire pénitence, se mortifier, se repentir. b) si priver d' aler coûtchî avou ene feme (avou èn ome). Avou les femes, i saye di rire; Mins nerén, i n' a nén l' manire; I n' les såreut ddja adawyî, I n' a nén l' badjawe d' on pårlî; Ey eto, i fwait penitince (I. Buttitta, ratourné pa J.L. Fauconnier). F. faire abstinence, être en manque. >> dilivrer l' penitince: pardoner, escuzer. Racwitez nos mariminces, Come nos dlivrans l' penitince Ås cis ki nos ont fwait tourmint (påter (pater noster), ratourné pa A. Laloux). F. pardonner, excuser.

3. sacwè k' abroke sor vos, et k' on n' inme nén; sakî ki vs è fwait vey. Dj' a må mes agaeces, k' i tchoûle li vårlet ::Taijhoz vos ! Vos n' estoz nén l' mitan d' on målåjhey" respond Noyé tot berdelant dins s' båbe : " C' est ene penitince avou lu " (Y. Paquet). Tins d' Tossint... Penitince ! Grigneus tins avou ses cirs coleur poûssire, avou ses crouheurs et ses froedeurs (P.H. Thomsin). On dit eto: rascråwe, pûne. F. calamité, catastrophe.

| penitincî [o.n.] måjhone di penitince po les cis ki sont codånés et ki n' ont nén co 18 ans. F. pénitencier.