L' apiçadje et l' moûdradje da Djuliye et Melissa

Pus jamês ça !

Savoz bin cwè, soçons, dj' a fêt come tot l' monde: cand dj' a ètindu al radio et ki dj' a lî dins les gazètes çi ki s' a passè avou Juliye et Melissa, dj' a yeû one frède suwêye dins l' dos. Et on momint, dj' a frumji d' peû tot tuzant: "et si ça åreûve sitî mi ptite Mariye"

Dins ces cas la, on sondje: "Djè l' åreûve dins mes mwins, djel sitronne, ou bin djel pins, dj' ennè fê des ptits bokèts a mète å bègnteu. Mins kîsk' a tchî on stron parey et ki n' l' a nin rascouviè don... ! "

Adon, dji m' a rpris, come tot l' monde tot tuzant ki dji n' a nin l' drwèt di må sondjî, ki di s' lèyî aler al hinne. Pus c' est s' lèyî rtchêr å rang d' ces pourcias la k' asteûre on lz a eureûzmint mètus å trô. Tot tuzant, dj' a rwêti totes les djins k' ont vnu apwârter des fleûrs, on nounours, one lårme, ki s' ont vnu mète a dgnos, ou fè on sine di crwès, po-z êdî les papas et momans da Juliye et Melissa a pwârter l' leûr, di crwès. Dj' a rwêti, et dj' a oyu come vos ôtes, soçons, one tèripe pwinne ! Cwè ? Es-st i bin possibe k' i gn eûche ostant d' mèchanstè dsu tère ? Oyi, et portant, on l' saveûve bin k' c' esteûve possibe ! Sins rmonter a Hitler et a ses camps, on a vèyu mwints côps su 5 ans, des Serbes djouwer å fotbal avou des ptits èfants Bosniakes, et les taper å lon come des fayès balons. On a vèyu des ptits èfants å Rwanda, couru è brèyant tot lèvant el êr des brès sins mwins, pask' on lzî aveûve råyi d' on côp d' hèpiète. Adon, on-z a frumji ossi. Mins cwè fè ? C' esteûve si lon d' nos ! et nos mêsses ki sont si malins, n' ont nin seû espêtchî ça ! Adon, come des ptites djins, on n' aveûve rin dit, on aveûve bachi l' tiesse et ravaler nos pwinnes come on mwês ratchon k' on n' wase fè nnaler.

Mins vla ki l' diâle a trovè one place ossi èmon nos-ôtes, dins l' tiesse di sacants Walons, et dins l' cayô k' il ont al place do keûr !

Adon les djins d' nos djins ont boudji ! I n' ont nin seû dmeurer a rin...a rin dire...a rin fè ! Ci côp ci, i ont boudji, come des signeûrs, sins hinne, et sins criyî, djusse avou one fleûr, on mot, one priyêre one pinsêye... Come s' il årinne volu ramonsler on tél moncia d' fleûrs, di bontè, di biatès, di djintiyesses, po ki ça feye disparèche d' on seûl côp, tote li mèchanstè do monde. Come po rdjèter nos åmes d' awè apris k' èle plinne, kékfiye yesse si mannètes, les rdjèter des lêdès spitûres k' one dimeye dozinne di mèchants ont stårè dissu tortotes... Po rdjèter nos åmes, et rdressî l' oneûr des djins !

Pierre Dufaux., divins: Li Chwès, di sètimbe 1996