|
|
Charles Massaux, écrivain et journaliste radio Châles Massåd, scrîjeû èt gaztî o posse. |
|
|
|
Charles Massaux, écrivain et journaliste radio Châles Massåd, scrîjeû èt gaztî o posse. |
|
Dresséye:
Dins les dèrins djous d' sètimbe 1335, one bèle grandè djonne comére vineûve foû d' on grand batia din l' pôrt norvejyin di Tonsberg. C' esteûve Blanche, li fiye do comte Djan d' Nameur et da Mariye d' Artwès. Sacants djoûs pus tård, èle divneûve li feme da Magnus Erikson, rwè del Suwede et del Norvèje. Li 24 di jun è 1336, Blanche esteûve couronéye.
On n' a jamês compris l' intèresse d' one union inte li rwèyåme di Suwéde-Norveje et l' Comtî d' Nameur. Di c' timp la, les mariadjes d' amour n' estinne nin fêts po les rwès. Min li culture et l' francès lingadje astinne fwârt reputès. Li prumêre resconte s' aveûve passè din l' comtî d' Flandre, al cour di Gand ou å tchestia di Wynendale, li måjone da Mariye d' Artwès. A m' chonance, come sovint, li mariadje aveûve sitî arindjî po des consideråcions politikes.
Après sacantès annéyes di boneûr, li rwèyåme di Suwéde a passè pa on bin nwâr vicadje. Des maleûrs di famile s' ont vnu coumachî a des arokes politikes, et ossi one fameuse minéye di pesse. Blanche et Magnus avinne pièrdu deus tot djonnes èfants. Li nwâre pesse a wîdè des viyes [villes] ètîres. Blanche, après 28 ans passès ås costès da Magnus, a moru è 1363. Des ans et des razans, les istoryins scandinaves ont lèyi del rinne Blanche l' imådje d' one feme fwârt bèle min ossi fwârt lèdjêre. I djint minme ki c'esteûve leye li cåze di tos les maleûrs do payi.
A Nameur, come el Suwéde, on aveûve rovî Blanche, min è 1936, li djonne princesse Astrid a-st arivè di Suwéde po marier li prince Leyopol. Elle a divnu li rinne des Beljes. On gaztî suwèdwès vinu a Brussèle pol mariadje, a fêt l' conichance di nosse soçon Féliss Rousseau, on istoryin, et i lî a aperdu k' el Suwéde, on tchanteûve co ås èfants one viye tchanson consacréye a Blanche: "Rida Ranka". Li tchanson a stî rmètuwe è francès.
Rida Ranka.
"Chevauche, chevauche en te balançant
Le cheval s'appelle Blanche.
Le si charmant petit cavalier
N'a pas encore d'éperons.
Quand il les aura conquis,
L'insouciance de son enfance aura disparu.
"Chevauche, chevauche en te balançant
Le cheval s'appelle Blanche.
Le petit garçon aux yeux bleus
Obtiendra la couronne royale.
Quand il l'aura obtenue
La tranquillité de sa jeunesse aura disparu.
"Chevauche, chevauche è te balançant
Le cheval s'appelle Blanche.
Un autre baiser que celui de ta mère.
Un jour te réjouira
Mais alors, la paix de ton âge viril te quittera.
Ainsi chantait pour son fils chéri, au sujet de sa destinée
En souriant à travers ses larmes,
Madame Blanche de Namur.
Et lorsque le roi Haakon eut acquis
Et les éperons et le royaume et l'épouse,
Il se souvenait avec mélancolie du chant de son enfance. "
Li fin do 14inme siéke a sèmè l' maleûr el Suwéde. Li payi esteûve cu dzeu, cu dzo. I fåt sawè k' è l' Europe, li produccion do fiêr esteûve dèdja bin vicante din les anéyes 500 et des, cåze k' on î troveûve del mine, min ossi do bwès pol fé fonde. Å Mwèyèn-adje, avou l' fwace di l' êwe domestikéye, les wôts-fornias si vont grandmint dèvloper. Binrade, li Waloniye va invinter li wôt-fornia lomè " meule-debout ": Les sclimbes sont mètuwes dresséyes din l' for. Li pus fwate tchaleûr va doner do fiêr di meyeûse cwalitè. Li fiêr fwardjî walon est reputè din tote l' Urope. Totes les gueres è l' Urope vont mète les årmurriyes di Waloniye al prumêre place. Min d' on ôte costè, Lidje, viè 1620, a divnu one grosse viye avou one culture bin devlopéye min ossi avou one bordjwèziye consècante bin ècårléye [à puissante assise financière].
Li guere inte l' Espagne et les Provinces Rachonéyes va foute l' industriye djus. Min l' comerce avou l' Suwéde va divnu interessant po les omes d' afêre. On i trove do bwès, do keûve, des pias, des curs, des dinréyes, et ossi del mine, et des êwes k' on pout domestiker.
C' e-st insi k' on va trover a Norkeuping l' ome d' afêres lidjeûs Louwis de Geer. I seré bin rade al tiesse d' one fabrike di canons avant di divnu li bankî di tote li Suwéde, et l' pére di l' industriye do payi.
Norkeuping, lèye, va divnu li cinte suwèdwès di l' imigråcion. Su were di timp, on-z i va trover on raploû d' Walons a tos les grès. Des buros di rcrutmint seront instalés din totes les viles. Les ovris i polnut siner divant notêre on contrat di onk ou deus ans. Li vwèyadje esteûve payi minme si l' ome i vneûve avou s' famile. Les Walons trovinne a s' lodji. Brâmint d' zèls ont yeû drwet a on boket d' tere po-z i fé leû måjone et on ptit corti.
On troveûve brâmint d' tcherbonis. Les wôts fornias come les fwadjes avinne dandji d' tcherbon. Les spécialisses walons ont doné one rèputåcion mondiale å fiér di Dannemora, din l' province d' Uppland. Li fosse di mine esteûve li prumére del bole.
Des ans et des razans d' asto, on a dvizé l' walon din les wôts-fornias et din les fwadjes del Suwéde. Asteûre, a l' uch do 21inme sièke, on i etind co des spots di nos ratayons.
On a veyu åtoû des fwadjes, des vrés viladjes walons, avou des gorlis, des maçons, des cwamjis, des bolédjis, Min ossi des vårlets, des scrijeûs, des comptabes. . .
Tos les grés del chålance estinne riprésintés, et les èfants alinne a scole.
l fåt sawè ossi ki les Walons estinne calvinisses et k' il avinne, è Suwéde, des pasteûrs ki apirdinne a leus èfants a lire et a scrire. Min l' rèlidjon n' esteûve nin fwârt importante po nos tayons, et après deûs djerméyes di djins [générations], si les Suwèdwès sont co todi sbarés avou leûs uzances, cåzu tot l' monde aveûve divnu luteryin.
Li sécurité sociale esteûve, lèye ossi, fwârt diswalpéye [développée]. Min les Walons estinne les prumis pol propruté. On s' laveûve tos les semdis din on grand bassin. Totes les coméres estinne todi rlujantes come des clås d' keûve, et leus èfants rletchis come des vias a deûs méres.
Les måjones des Walons estinne zèles ossi bin tnuwes. Tot ça a fét ki l' société walone a fwârt bin évoluwé. Les Walons d' Suwéde estinne pus ritches a brâmint des grès. Les Walons ont divnu tot d' swîte one leccion [élite] ki veyeûve les "mannets" Suwédwès did lon.
C' est l' vré ki, è Suwéde, å Mwèyèn-adje, des bins publiks avinne siti metus dsu pî, min ki les rlåcions " sins jinne " inte les feumes et les omes avinne radmint amwinrné l' sifilisse. Adon, les bins avinne siti serés, et les Suwédwès avinne dimerés bin lontimp ratårdjés pol propruté. Din les anéyes 1930, li scrijeu Lubbe Nordstom a soné l' alerte avou s' fameuse enkête.
Todi din l' province d' Uppland, les Walons ont bouté pol foclore. Les violoneûs ont divnu lèdjinderes L' èglîje do 9inme siéke pinseûve ki l' musike foclorike manceûve li morale et on bruleûve co les macrales!
Les Walons ont apwartè ossi di fiester Noyé, l' Sint-Djan et li carnaval. On l' fait co asteure a Gimo, li 3 di djanvî po fini les fiesses di Noyé, èt s' i pout on veuy les ptitès båchéle avou leu vizadje machuré po djouwer al macrale.
Les viladjes walons ont divnus asteûre come des cwins d' perlinadjes. Li seule fwadje walone do monde e-st a Osterbybruck. Les djins did vêla ont bramint d' respect po les viyès estalåcions.
C' é-st on boket d' l' istwére del Suwéde ki skèpiye foû del bèle bèzogne des Walons. On pout dire po fini, ki l' imigråcion des Walons e Suwéde a sti fwârt bin reyussiye. On trove des passéyes [traces] di leûs accions din tos les dominnes del societé suwèdwesse.
Charles Massaux, divins: Li Chwès do mwès d'octôbe 1996.
Vive les vacances d' èmon nozôtes !
Vacances...
On pout dire ki l' mot "vacance" met les djins foû d' zels. Pattavå, on ètind cåzer di Marok, Tunisiye, Grêce, del Jamayike, et minme di Cuba... Tot ça po yesse bin sûr di rivnu avou ene nwêre pia, min ossi di plu sbarer ses vwèzins.
Pocwè cori ossi lon cand on a des biatés d' èmon nozôtes a st uch ?
Dj' a bin l' idéye ki tos ces djins la n' ont jamês ètindu cåzer des pus bias viladjes di Waloniye come 5332 Crupet, 5340 Mozet, 5522 Falayin, Tchårdoneus, 6717 Nobressåt, 6767 Toûrgni et co bin dz ôtes: 5300 Andène, 1300 Auve, 5570 Biarin, 1420 Brinne l' Aleû, 5590 Cînè, 4250 Djêr, 5030 Djiblou, 7116 El Tchapèle 6792 Halazi, 5580 Han, 4500 Hu, 5377 Some.
Des viladjes tortos å pus bia, ås bèles pitites måjones di pîres do payi, gårniyes di fleûrs di totes les coleûrs, avou des ptits cabaret ousk' on cåze walon divant ene bone pinte di bîre d' èmon nozôtes, k' èle fuche blonde, nwêre oubin rossète.
Nos dvans yesse fiérs di nosse bia ptit payi walon, di ses êwes ki tchapotnut a l' uréye des bwès, min ossi di nosse terwè [terroir] come di ses bons prodwits. Paski tos ces djins la ki cournut bin lon après l' solia, ni coniront jamês li franke gosse d' on bon fromadje d' èmon nozôtes, avou one bone bîre d' abiye, ou li ptit vin d' Toûrgni ki dchind mia k' del låme avou one trûte fin frisse.
Vicoz walon mes djins, minme timp des vacances !
Vive les vacances d' èmon nozôtes !
Charles Massaux, divin: calindrî walon, 1998.
(Back thème tourisme) Alans rzè so les pådjes do tourisse
(noms wallons des anciennes communes) Les nos e walon des ancyins ptits bans del Walonreye
Harmonisation des graphies des textes présentés sur ce site: véci
(Back homepage) Alans rzè al mwaisse-pådje
(Back textes centre-wallons) Po raler al pådje des scrijadjes è walon do payi d' Nameur.
Sacwants scrijhaedjes di cisse waibe chal polèt esse dizo abondroets; nos les rsaetchrans foû s' i fåt.
Some texts published on this site may be affected by copyrights and eventually need to be removed in the future.
