L' istwâre da Jozef

In plan d' vårins

Jâcob s' aveut mariè deus côps, li prumi côp avou Liya, li deuzyinme côp avou Rachel - k' i veyeut branmint pus voltî ki s' prumêre fume, inte nous-ôtes dit.

Dou prumi lit, gn aveut yeu dîs gamins et dou deuzyinme i gn aveut deus : Jozef et Benjamin. Li pôve Rachel aveut moru è donant l' djoû å ptit dêrin. Et vla Jacob tout seu, asteure, avou s' douzinne di lustucrus. Å momint k' no-n istwâre coumince, les pus vîs sont ddja tout skêpyis; gn a minme sakantes ki sont mariès et k' ont ddja des èfants. Mågrè çoula, i travaynut, tertous achene, dins l' cinse da leu popa.

Di ces tins la, les cinsîs avént des kaylêyes di biesses a n' les sawè compter. Pou rpachi comifåt des yèdes parèyes, i falut dou tchampiâdje, et bel et bén ! C' est pou çoula k' i dvént nn aler mwints côps sacants eures lon pou rafourer leus rosses et i faleut co bén les dîs fis tous achene pou vnu å dbout di leus trouplêyes.

Pou bén comprinde çu ki va chûre, i fåt sawè k' Jâcob aveut branmint pus d' amistè pou Jozef ki pou lz ôtes, et çu k' i gn a co d' pîs, c' est k' i l' feyeut in pô trop vey. C' es-st insi k' in bia djoû, i lî aveut cor achtè ene bèle tunike a royes, di toutes sôtes di couleurs et ki cousteut tchêr et vilin. Les ôtes n' avént rén yeu, mins i avént grigni les dints et rûtyi nén pou rire, inte zels. Jozef esteut l' chouchou on l' pleut vey sins lunètes. Fåt-i dmander si çoula fieut plêji ås fréres ki chumént d' radje ? In djoû, Jozef, li-minme sins l' vlu, bén sûr, les a fêt boûre di colêre è leu...

(a sûre)

Accent du scripteur: existence du son ë dans Jozëf, achëne, et à la 3e pers. pl. ind. prés.: i travaynët

E.J. Piret, divins: Extraits bibliques, Les Cahiers Wallons, 3-4-5 1960.