Sinnète

Ah ! Les djonnes d' anute !
Le pére, Edouard, lit sa gazète. La mére, Auréliye, rèstind.
Aurèliye: Onz eures ! I n' sant nin co lèvè ! Comint est-i possibe dè trinnè o lit ka des eures parèyes ! I dvrint zesse honteûs !

Edward: Nè vnèz nin co cmincè a bèrdèlè ! Djè lîs ma gazète et dj' ê bèzwîn d' trankilitè ! Alors, rèpassèz, et têjèz-v' !

Aurèliye: C' est ça ! Vôs afants rintrant a cink eures å matin, i s' lèvant a mîdi, mossieu lît sa gazète, et i fårit kè mi, bonasse, djè n' dèjeûche rin ! Bin dj' vôri bin vey ci lale !

Elle va vè l' uch et crîre bin fwârt:

Aurèliye: Est-ce kè vz alèz boudji, û i fåt k' djè monte ? C' est nin des manières, hin, ça !

Elle rèvint a si rpassadje. Sè-n ome la rwête a fjant hossi s' têsse.

Edward: Cè n' est nin a v' mâvrant et a breûlant kè vz arivrez a åk ! Wårdèz vosse calme et cåzèz jantimant, put-ète bin k' i v' choûtrant !

Aurèliye: C' est ça ! Soutnez les et i finirant al prîjon !

A c' moumint la, gn è Florent, k' intère a tnuwe du jogging, tout a-n afêres.

Florent: Moman, dûskè vz ôz mètu mu ticheurt do Standârd ? Vos ôz rnètiè mes afêres dè fotbal ? Djè n' rètrouve pus m' wåkman ?

Aurèliye: On dit bondjoûr cand on s' lève ! Si ça continuwe inla, ça srè co vite bonswâr kè v' dîrez !

Florent: Bondjoû, mman, bondjoû, popa !

Aureliye: et pont d' esplicåcyions inla ?

Florent: Cè n' est nin d' ma fôte, da, man. C' est Marie-Eve ki n' vut jamês rèvnu cand djè lî di !

Adon, la Marie-Eve ki s' amonne, è pêgwâr, toute dèstchåvurnêye

Marie-Eve: Kîsk' è volu rpassè bwâre un vêre avu les ôtes o Stûde ? C' est mi chûrmint ?

Aurèliye: Alèz un pont vey drî l' uch si vos n' ôz rin roviè, vos !

Florent coûrt voye, sul tins k' Marie-Eve rabresse ses parints

Marie-Eve: Bondjoûr, moman ! Bondjoûr popa !

(a sûre)

Jean-Claude Rigaux, inédit, saynète produite pour les concours de récitation wallonne

Accent de Floyimont: ô se prononce très nasalisé (on)