Avu les Rlatant Tchèts du Nûviè - les Chats rlatant de Neuvillers-

" La dèrinne mission "

da Wili Rôzet, rimetu a walon pa Rêmond Mouzon, semdi li 28 di mårs 1998.

Li ptite såle del porotche di Nûviè, dilé Libråmont esteut bôrêye plinne, mågrè ki c' esteut li deujinme côp k' on rdjowéve li pîce. Des viyès djins : sacwants ; mins ossu branmint des mitan-mitan et deus rindjeyes d' efants.

Sol sicanfår (estrade) : les " Rlatant Tchèts " k' ont fwêt on djeu d' mots e francès avu leu nom: les Chats r'latant (a Nûviè, c' est des Tchèts).

Ene pîce classike avu 5 djoweus (+ onk ki n' cåze nen). Do bea walon, do rischurè å sidol [du nickel], rifwet esprès po ces deus chîjes la, a pårti del mwesse-pîce sicrîte e gåmet pa Wili Rôzet.

Li ratourneu-radapteu, l' Abé Mouzon, n' est nin on inconu å redjimint. Il a sti spotè (surnommé) l' Årtchuveke do walon, paski c' est branmint li k' a-st enondè tote l' activitè do ravicädje do walon dins l' Mitan-Luximbork, copurade li trexhelreye (branle-bas -trèchulriye, trehèlrèye) po spåde li walon e scole. Si cinte di documintåcion, li CIDWEL, e-st on modele do djinre, et vos y pôroz trover tot çu ki s' a scrit sol walon e l' Province do Luximbork " et les contrées voisines ".

Rivnans al " dèrinne mission " : on adjint do sconte-sipionadje, Blêze Blantchåd (Djan-Ives Golinvå), a decidè après 34 missions, di si vni rmète a l' årcwè (à l' abris) dins li måjhon di ses vîs parints. Zabèle (Mareye-Pire Binet), ene nozéye pitite crapôde li l' voeyeut voltî, dispu tote djonne, parvent a disgritchî on radju (décrocher un rendez-vous) avu li, et a haper si prumîre " vreye " båjhe (baiser).

Mins ça n' va nen tot seu, come di djusse, l' Adjint 329 e-st on djan-comère (Casanova, coureur de jupons). La k' ene djint huke li mnuji Efrem (Djåkes Dasnois) o telefone, k' est ki rassonre li barake, eyet ly leyi on drole di messädje : " les erägnes keudet leus rantoeles dins les cwänes " (les araignées cousent leurs toiles dans les coins). Mins ces mots la, c' esteut onk des modpasses k' i s' endè cherveut e mission. Sabaye kisk' est padrî ça : Greta Meyenrsdorf, li zûnante båcele des Rodjès Brigådes ; Yoko, li Green-Peasresse (écologiste) terorisse ki vut distrure tote les ujhenes anichtantes (polluante), inte di zèles li celuloze di Harnoncoû ; udon Mercedes Calor Garcia de Bahia, li holigandresse bräzilyinne ki vleut asnondyi (projeter) on cotea (couteau -coutê, cotê, coutia-), so Maradona pask' i fieut piede li Bräzil. Totes les troes, Blêze, l' adjint sicret, les aveut fwet raclôre.

Les troes roles di ces femes vampires la sont tnus clapantiveuzmint (superbement, avec brio) pa Mareye-Pire Binet, k' a sti lanawere, avu Pol Lejeune, rissure (suivre à nouveau) on staje di teyåte avu li grand essinneu René Briyalmont. Ele n' a nen sti piede si timp, nosse dame : gn aveut k' a yesse a Nûviè po l' vey.

A z-agritchi o meur, avu (à épingler également), li djowädje da Michele Franswès, a 35 bontimps, li pus djonne del binde et k' a fwet li prezintädje al fen tot e walon (c' est nen souvint come ça dins les tropes ki walon, wisk' on croet coben k' i fåt rtumer sol francès do côp k' on-z est fû del pîce).

Les Chats r'latant ni sont nen a leu prumire saye. La ttaleure 15 ans k' i djowet e walon. Leu prumire pîce, " La lete du novèl an " a sti prodûte eviè 1983. L' anéye passéye, c' esteut " On cåzadje a pårt ", deus ans dvant : " C' est l' orädje li cåze ".

Li trope put compter so 8 acteurs et actresses (4 omes et 4 fames), tertos et tertotes di Nûviè eyet di Libråmont. Ene pårticularitè : il ont tertos eter 35 eyet 50 ans. I plet, eto, compter so Freddy Adam po totes les corwéyes et les olivetes; et sacwants botikes po les ahesses (décors) : Houba di Freu, po les meubes, Bernadète Evrard po les cwefeures et les " tchåborädjes " (maquillages), et li magazin Vert-tige po les caflorixhädjes (décors floraux).

Si vos riyoz voltî, èt k' vos inmoz l' bon teyåte walon d' asteure, rivnoz l' anéye ki vent a Nûviè riwêti les " Rlatants Tchèts " !

Po dz ôtès racsegnmints û des fotos : Marie-Pierre Binet, Residence Chanterroy Bte 24, 6800 Libråmont; Michele François, vôye du Ronsåt (rue de Rossart),8 6800 Nûviè (Neuvillers).

Lucyin Mahin, li 29 di måss 1998, divin: Coutcouloudjoû, limero 32-33, måss-avri 1998

Alans rzè al maisse-pådje

 (Back page présentation théâtre wallon) Hay ervoye sol pådje divantrinne do teyåte e walon