Årvaye.Li pådje da Bernadette Hesbois.
Li tchèt èt les sèris.
Tins des condjîs, nosse tchèt, Arsouye, è oyu la mwêche idéye du raminè des sèris.
Dju l' vè, passant pa la bawète avu ène "Supeedy" dins la gueuye èt, la grosse bièsse (Arsouye), tot fiér èt come s' i riyot, drûve sa gueuye èt...èvôye la sèri ! Abîe dzos les meubes ! Nin moyin d' la rapicè. Nosse gros bêta, ô mitan dol cûjine, avu sn êr d' awarè, brâmint trop spès, n' årot seu passè non pus !
Kéke tins s' passe. On pô après, dju m' va a ma sèyance du kiné èt dju lê Silvîe, nosse fô pourcê èt speedy al måjon. I fjot télmint calme ki la gârce (la sèri, nin Silvîe) sôrte du sa catchète, passe padrî l' frigo, file tot l' long do mer èt va mougnè dins la gamèle do tchèt. Tote subaréye, nosse Silvîe lève ses pîds èt s' assît s' la tåle : elle avot la pèpète ! C' e-st insi ki dju l' ê rtrovu a rintrant.
Deus, trwas djoûs pus tård, minme comèdîe : la ptite seur du l'ôte u bin sn amant...(ca duspôy kékes djoûs dj' atindo brâmint do ramdam addé la poubèle : gn avot les papîs ki chîtyint).
Ayîr, todi avu Silvîe, dj' avans mètu des trapes : kéne afinre po les montè ! On ptit bokèt d' fromadje èt, tins dol nute, deus k' astint capoute. Å matin, mu-n ome les è pètè al poubèle èt dj' avans rmètu des novèlès trapes. Vè onze eures, dju rpasso la bwéye, lu gros båyåd astot coûtchè s' la tåle èt...clap...ène twazime : ène ètranjére u bin èn èfant des deus ôtes ? Dj' ê on sannant d' rusponse, ca a-n rintrant d' l' après-nonne, i gn avot co deus. La chîjime è moru dol nute èt la dêrinne, dju l' ê rtrovu padzo l' gâz ayîr a djouwant al bale avu nosse " tchèsseu ".
Moralitè : pèrdez in tchèt po tchèssè les sèris èt vos nn årez co dpus ki dvant !!
Bernadette Hesbois, soce des scrîjeus d' Årvaye, octôbe 2001.
Pådje del Soce des Scrîjeus d' Årvaye.
(Back textes sud-wallons) Alans rza sul pådje des scrîjadjes a walon dul Basse-Årdène.
Sicrijhaedje eplaidî so les fyis avou l' åjhmince del sicrijheuse.
Edition en ligne explicitement autorisée par l'auteur.