Dressêye:

• Conte fantastique: Li rodje dame (Jean-Denis Boussart).

Conte fantastique.

Li rodje dame

C' esteut ene feye on djonne magneu d' salåde, on ptit sôdård dè prince di Lîdje, ki s' anoyîve è grand palå :

" Dji m' ennè rva, dit-st i, è payis des makêyes, rabressî m' mame. " et i s' mèta avå les vôyes.

Di ç' tins la, i lûhéve co les cwate solos; mètowe a grand feu, li campagne caboléve: vos årîz wadjî k' elle aléve hati.

Li cokê, ki rotéve come on bouxhe-tot-djus, esteut nèyî dzo s' vète et pèzante cowe d' arondje; ossu, passé les grossès pîres, divant ki l' tchår dè leu ni prinse ses ènondêyes, i s' achiya so ene hourêye po ene gote si lèyî ravu.

L' ome as poussîres esteut i a l' awête podrî ene håye ? L' årdispène vis èl dîreut bin. Todi nn est i ki nosse capon touma-st èdwèrmou d' on plin côp.

On tchèron ki passéve tot la, fa pèter treus feyes si corîjhe sins l' poleur dispièrter !

Cwand l' valèt drova ses oûys, li nute esteut dèdja mêsse et dame so les tères. Les prumîrès steules, come des moxhes di Sint-Tchihan, djouwît a ene potchêye avå les hôtès neurès jèbes dè cîr. Ine sakî ploréve a costè d' lu.

Li ptit sôdård sinta s' cour si cafougnî tot. Il aveut del ponne sins savu pocwè. E fî fond d' lu-minme, i lî sonléve k' ine arèdjiye lavasse vinéve dè rispåmer tot l' prétins del djoûrnêye.

I toûrna s' tiesse, tot bin doûçmint, et s' vèya-t i ene feme k' avîzéve bèle, et djonne, et gåye mousseye è li spèxheur del vôye. Ele sayîve dè ravaler ses låmes, mins s' ponne esteut bin trop fwète; a moumints, li pôve båcèle hictéve et s' wignîve-t èle pés k' on djonne tchin.

Lu, hoûtéve li pèneuse tchanson : alez, i n' areut nin stu pus malèreus si vos lî arîz stitchî è coûr traze bones pontes di Paris !

- Dji vs è preye, Mamzèle, rapaftez vs ! Dji m' fê må di vs oyi plorer.

I sètcha s' grand rodje noret d' potche a pastiles po rsouwer l' vizèdje del djonne feye. Il aveut l' cogne d' ine vîle feme di manèdje ki prind bin londjinnmint ses poussîres.

- N' åyîz nole sogne et lèyîz m' fé. Dji n' so nin mètchant, savez !

- Djel sé bin, fa-t èle tot rsètchant deus treus côps s' narène, mi ptit deut m' l' a dit !

- La, alaboneure ! vos estez bin pus bèle insi.

On ptit riya d' ine çanse et dmeye vinéve dè ponde so les lèpes del djonne feye

- I n a dè tins k' dji vs louke dwèrmi; voz avîz torade ine vatche d' ôr sol bètchète di vosse narène, et dji tchantéve a mitan bas :

" Nannez poupå nikèt !

I n a vosse mame k' est è bwès..."

Li ptit sôdård si rècresta; ses oûys tapît des blames. Il aveut l' êr d' on cok bateu ki mousse èl treye.

- Dji so-st in ome, portant, et fleur di sôdård, dji vs l' acertineye ! Dji m' bate a côps d' pî, a côps d' pogn, a côps d' tiesse... dji vs såreu bin disfinde, savez !

- Vos m' avez dèdja fêt rîre: ci n' est nin co si må... savez.

- Ebin, tchoû-tchoûle, mi dîrez vs asteure pocwè k' vos avez tant ploré ?

- Insi, paret !... dji m' anoyîve tote fî seule. Chal è payis, dji pou aler po tot costé, dji so todi ctchesseye. Les djins brèyèt: " Jézuss Mariya ! Vola l' rodje dame ! ", et i m' clapèt l' ouxh al narène tot s' sègnant.

(a sûre)

Jean-Denis Boussart, Li rodje dame, (et des ôtes contes), SLLW, 1976.

 (Back homepage) Alans rzè al mwaisse-pådje

 Harmonisation des graphies des textes régiolectaux présentés sur ce site: årmonijhaedje.

 (Back textes est-wallons) Po raler sol pådje des scrîyèdjes walon do Payis d' Lîdje.

 (Index par auteur) Indecse des oteurs

 (Back page menu liégeois) Hay ervôye sol minèdje po les Lîdjwès .

Sacwants scrijhaedjes di cisse waibe chal polèt esse dizo abondroets; nos les rsaetchrans foû s' i fåt.

Some texts published on this site may be affected by copyrights and eventually need to be removed in the future.