ARMAND: - C' est po çoula, Moncheu, ki dj' a l' oneur di v' dimander vosse feume è marièdje

OCTAVE : - (Amaké) Bin vz estez reud sot sûrmint ! Mi feume, c' est da meune !

ARMAND: - (Todi fwért keu) Si pô, Moncheu.

OCTAVE : - K' avez v' l' êr dè voleur dire, don, vos ?

ARMAND: - Ci n' sèreut nin bê di m' pårt si dji v' rèpètéve les paroles ki vosse feume, mi dit so vosse compte. Ele ni pout s' espêtchî dè dire ki dji vås bråmint mî k' vos.

OCTAVE : - (Ki n' sét pu cwè) Insi, èle va raconter å prumî vnou...

ARMAND: - Nin l' prumî vnou, Moncheu. A mi, si galant.

OCTAVE : - (Si måvlant, alant vè ene pwète) Dji m' el va ...

ARMAND: - (L' arestant) Dji n' a nin fini

OCTAVE : - A ! Vos n' avez nin fini. K' est c' ki ça va pår esse !

ARMAND: - Vos estez st in ome ki tûze et ki ratûze m' avez v' dit torade, et vos cwèrez todi l' dreut dè djeu. Hoûtez m' on pô, adon. Vos m' avez dit ki vos n' estez nin bin marié, dji v' prind å mot. Vosse feume n' est nin binåhe nin pu ? Adon, rin d' pu simpe, dinez m' èl.

OCTAVE : - Et si dj' inme bin d' esse må, mi ? ! Nèni, dji wåde mi feume: dj' inme mî d' esse må avou leye ki d' esse bin tot seu. Ele n' årè måy li divorce.

ARMAND: - C' est vosse dièrin mot ?

OCTAVE : - Nonna, Moncheu, dj' ènn a co in ôte.

ARMAND: - Dihez l' !

OCTAVE : - Dji n' wèzreu nin, dji so trop bin aclèvé

ARMAND: - Li djeu va flêrî.

OCTAVE : - I flèrreut co pu fwért si dji dhéve li mot.

ARMAND: - Dji rgrète adonpwis, dji n' comptéve nin diveur el fé, min i fårè bin.

OCTAVE : - Fé cwè ?

ARMAND: - (Todi fwért keu, i prind on paket foû di s' malète et el diswalpeye: I prind on révolver foû) Dji v' vin touwer.

OCTAVE : - (Ni comprind nin å cminsmint) A !... Cwè ?

ARMAND: - (come s' i racontéve ine sacwè di tos les djoûs) Dji v' va touwer: on ptit moûde k' a pris nêhance è l' amoûr. Avou les çanses ki vosse feume èritrè d' vos, dji m' prindrè on bon avocåt. Dji sèrè vite foû, pu vite minme ki dè dvôrcer.

OCTAVE : - (Amaké) Vos estez tot èvôye !

ARMAND: - (come a ene sakî ki vole èvè l' cîr) Nèni, c' est vos ki va-t esse èvôye. (Avou des rproches) Dji vin chal vis libèrer et vos v' måvlez.

OCTAVE : - Dji v' vôreu bin vey è m' plèce.

ARMAND: - Si plê-st a Diu, divin deus ans, dji sèrè è vosse plèce. (Djinti) Volez v' fé ene pitite priyîre divant dè mori ?

OCTAVE : - Si vos m' lèyîz l' timp d' l' aprinde.

ARMAND: - Kibin v' fåt i ?

OCTAVE : - Cwinze djoûs

ARMAND: - Nonna. Vos estez trop malin, vos. Vos alez mori tot dreut. (Octave sitièrnixhe) Volez v' on catchet ? Vos alez atraper on freud.

OCTAVE : - Awè, mèrci. ( Amand lî done on catchet)

ARMAND: - I v' fåt sognî, savez, on atrape trop vite si daye. Siya, po l' djoû d' oûy on-z est vite èvôye.

OCTAVE : - A kî l' dihez v'. (Tot mostrant l' révolver)

ARMAND: - C' est damadje por vos. Vos vz aler mutwè èwarer, ebin mi, dji vz inméve bin. dji dmandéve todi a vosse feume des novèles di vosse santé...Siya...Siya... Nos avans les minmès gosses. Li proûve est la, nos n' avans nin polou ariver a in arindjmint.

OCTAVE : - (Mouwé, i såye dè rinde corèdje a l' ôte) I n' fåt nin tchoûler po çoula, èdon. C' est on lêd moumint a passer et pwis c' est tot.

ARMAND: - Dj' åreu tolminme mî inmé... Si vos m' l' avîz co volou vinde, la !

OCTAVE : - (Intéressé) Vinde ? Vinde ? O ! mins, insi, i n' a co mwèyin d' s' arindjî. Kibin m' ènnè dnez v' ?

ARMAND: - A vosse sonlant, vos ? (I dit çoula, prète a martchoter)

OCTAVE : - Bin hoûter... Vos l' polez rloukî, c' est del bone tchår... Dalieur, vos l' savez bin.

ARMAND: - C' est djusse, min èle a dèdja chervou.

OCTAVE : - Fwért pô. Ele vi l' a po l' pu sûr dit.

ARMAND: - Ele n' est pu novèle.

OCTAVE : - Ele est çoula meyeuse. Et pu, èle vis frè des bons plats, del couhène tot çou k' i n a d' mî. Inmez v' bin l' potéye ås rècènes ?

ARMAND: - Awè.

OCTAVE : - Vos nn årez tos les djous, dji lî dîrè.

ARMAND: - N' el pôreu dj' nin prinde a såye ?

OCTAVE : - Vos m' baltez... Vos l' avez dèdja avou.

ARMAND: - Djo. Kibin nnè volez v' ?

OCTAVE : - Por vos, èle våt tot l' ôr dè monde. Por mi, èle ni våt pu rin. Côpans l' côp è deus.

ARMAND: - Ca fêt kbin, li mitan di tot l' ôr dè monde ?

OCTAVE : - Cincante meye francs.

ARMAND: - Fez v' li ristourne po "l' Amicale des fonctionnaires" ?

OCTAVE : - Dîjh por cint.

ARMAND: - Ça ca. Dji so dacwér.

OCTAVE : - Si vite k' èle sèrè prète, dji v' l' èvoyrè.

ARMAND: - Vos estez bin binamé.

OCTAVE : - Inte bravès djins, i n' a todi plèce po in arindjmint.

ARMAND: - Dji vz èvôyrè carante cinq meyes francs pa li posse, vos pôrez vz atchter tot çou k' vos volez.

OCTAVE : - Dj' îrè dabôr cwèri ene bouyote po restchåfer mes pîs... asteure ki dji sèrè tot seu è m' lét.

ARMAND: - Ebin, merci co cint côps !

OCTAVE : - I n a vormint nin d' cwè. Et s' i v' faléve on consey, on n' sét måy come vos alez esse djonne marié, si v' faléve on consey, po n' måy esse... hin (Djesse di torate po dire des cwènes)... Vinez m' trover, dji v' dîrè çou k' i fåt fé. C' est k' dji m' î cnoxhe savez, mi.

ARMAND: - C' est çoula !

(Armand sôrteye dismètant ki Octave si frote les mins. I brêt après Désiré)

Ake deus, sinne 3.

DESIRE et MATHIEU

MATHIEU: - Vis fåt i ene sacwè oûy ?

DESIRE: - Nèni. Co todi rin. Rimnez divins noûf djoûs.

MATHIEU: - Noûf djoûs ? Pocwè noûf djoûs ?

DESIRE: - Paski l' mêsse sèrè arivé, è s' live, al pådje wisk' i fåt des oûs.

MATHIEU: - (I n' a rin compris) A, a ? !

DESIRE: - Awè.

MATHIEU: - (so l' minme ton) A, a ? !

DESIRE: - Pocwè dhez v' "A, a ? !"

MATHIEU: - Paski dji n' comprind nin.

DESIRE: - (so l' minme ton) A, a ? !

MATHIEU: - Ci n' est nin çoula. Min ça aléve todi mî dè trèvins del dame.

DESIRE: - Awè, min èle ni såreut nin esse chal èt...

MATHIEU: - Et è m' mohone !

DESIRE: - C' est sûr çoula. (I comprind) Kimint çoula, è vosse mohone ?

MATHIEU: - Bin awè. Ele m' a supliyî d' el prinde avou mi. Dji l' a pris et mågré mi ptit mèhin - on tot ptit, savez - ebin èle vike awoureuse avou nozôtes.

DESIRE: - Avou vos ?

MATHIEU: - Ele nète li cinse, èle sogne les vatches, les poûrcês, èle turbine...djo, elle a des plêzîrs tant k' èle vout.

DESIRE: - Dj' ènnè rvin nin mi.

MATHIEU: - Ele s' afêteye po cwand èle sèrè cinsresse.

DESIRE: - Ele va-t esse cinsresse ? Cand çoula ?

MATHIEU: - Cand èle sèrè mariyeye avou mi.

DESIRE: - Vos vz alez marier avou l' dame ?

MATHIEU: - Awè.

DESIRE: - Pocwè ?

MATHIEU: - Pocwè s' mareye-t on ? (Et i prind on janre d' onk ki s' î cnoxhe)

DESIRE: - (I comprint) A ! Awè... c' est l' vreye !

MATHIEU: - Ebin, mi, ci n' est nin po ça.

DESIRE: - A, a ? !

MATHIEU: - Awè, A, a ? !

DESIRE: - Li mêsse ni sét nin çoula ?

MATHIEU: - Nèni.

DESIRE: - Aa, bon ! (Et s' såve so l' bètchète di ses pîs. Octave inteure et l' veut nnaler).

Ake 2, sinne 4.

MATHIEU, DESIRE: - et OCTAVE

OCTAVE : - Wice alez v' ?

DESIRE: - Mi... Nole på !...Dji såye d' atraper ene moxhe.

OCTAVE : - I n' a portant nin des moxhes a c' moumint chal.

DESIRE: - C' est ine k' a pièrdou l' tiesse. Ele ni sét wice k' èle est bin.

OCTAVE : - (A Mathieu) K' avez v' di novê por mi ?

MATHIEU: - Des novèlès martchandeyes.

DESIRE: - Il a ossu des novèles da...euh !

MATHIEU: - Da kî ?

DESIRE: - Da...Madame.

OCTAVE : - Kéle Madame ? Li ptite rossète ?

MATHIEU: - (A pårt) Kimint set i k' dj' a ene vatche k' est rossète, lu ?

DESIRE: - Dji n' è sé rin, mi.

MATHIEU: - Si vos volez, dji v' pous dèner des novèles del rossète ossu, savez.

OCTAVE : - Sèyîz' on pô pus ognesse, alez, po djåzer d' lèye.

MATHIEU: - Bin vola ene maweure èdon, sûrmint.

OCTAVE : - N a-t i si lontimp k' çoula ki vos l' kinohez, po l' loumer insi ?

MATHIEU: - Dji l' a vèyou vni å monde, alez, dji m' ennè sovint todi. Ça n' a nin stu fwért åheye savez ! Il a falou des grossès cwèdes po l' avou foû.

OCTAVE : - Têhiz v', alez, vos.

MATHIEU: - Come dji vz èl dit. Vos veurez on djoû, dji v' mosteurrè s' drîmint

OCTAVE : - C' est on drîmint come in ôte va sûrmint.

MATHIEU: - Dji n' a todi d' keure, c' e-st on fameu. C' est d' l' ovrèdje d' ottant pu cwand dj' el deu laver, el rinèti, hover...

OCTAVE : - Paski vos l' lavez !

MATHIEU: - Malèreu ! I rlût come on clå d' keuve.

OCTAVE : - I rlût ? !

MATHIEU: - Po l' moumint, elle est plinte

OCTAVE : - Elle est plinte !

MATHIEU: - Awè. Fåreut vey li lècê k' èle mi done.

OCTAVE : - Dihez, tékféye, ci n' est nin c' lècê la ki vos apwèrtez chal ?

MATHIEU: - Des côps k' i n a. Et ... cwand dj' el mine å torê...

OCTAVE : - A torê ? Vos v' mokez d' mi sûrmint ? !

MATHIEU: - Mi moker d' vos ? Ki n' a-t i d' èwarant k' ine vatche våye...

OCTAVE : - A ! Li rossète...c' e-st ine vatche !

MATHIEU: - Awè.

OCTAVE : - Dji creu ki dji v' va rabressî, télmint ki dj' so binåjhe.

MATHIEU: - Vos estez binåjhe paski m' rossète va...

OCTAVE : - Dji so binåjhe ki vosse rossète ni seuye nin li rossète da tot l' monde.

MATHIEU: - Aa, bon ! Dji n' comprind nin.

OCTAVE : - Mi bin.

MATHIEU: - Ca va insi. Asteure, dj' a bêcôp a v' rimercî.

DESIRE: - (Advinant çou ki va-st ariver) Waye ! (Ennè va so l' bètchète di ses pîs)

MATHIEU: - Wice alez v' ?

DESIRE: - Dji rvin so l' côp: i m' sonle k' i n a on corant d' êr, chal, dj' atrape des tcholeurs. (I sôrteye)

MATHIEU: - (Continowe) Awè, dji v' deu rmercî.

OCTAVE : - Mi rmercî ? Pocwè ?

MATHIEU: - Di m' aveur prusté vosse feume !

OCTAVE : - Prusté m' feume... Vos avez promètou l' vôye di m' èwarer disk' å coron

MATHIEU: - Ni fez nin l' ènocint: dj' el marèyrè paski c' est l' feume k' i m' fåt. Ele sét s' î prind avou les biesses et savez v' bin pocwè èle kinohe si bin les biesses ?

OCTAVE : - Nèni.

MATHIEU: - Pask' èle a stu mariyeye avou vos, di-st èle.

OCTAVE : - C' est djusse !...Cwè ? !

MATHIEU: - (Escoûrci) Et pwis, èle sét fé a magnî.

OCTAVE : - (abatou) Ça, dj' el deu dire. Dispôy k' elle est èvôye, dji n' magne pus rin d' bon. Tènèz loukîz, dji va-t esse oblidjî dè prinde ine prudje paski dj' a må m' coûr.

MATHIEU: - (Ewaré) Vosse coûr. Dji n' saveu nin k' i faléve prinde ine prudje cwand k' on-z a må s' coûr.

OCTAVE : - Siya, siya ! (curieus) Min, dihez, i n a ene sacwè ki dji vôreu bin sèpi : mi feume va è vosse mohone ?

MATHIEU: - Awè. D' el matin.

OCTAVE : - Vos l' louwez ?

MATHIEU: - Nèni, dji l' a po rin

OCTAVE : - Et, vos nn estez binåjhe ?

MATHIEU: - Dj' el vou bin creure: èle convint po tot ! Et po fé a magnî... !

OCTAVE : - C' est bon èdon, çou k' èle fêt ? (Tot sospirant).

MATHIEU: - A s' ènnè ralètchî les deuts !

OCTAVE : - Et si dji v' racontéve måy çou k' èle mi féve !

MATHIEU: - Si dji v' racontéve måy çou k' èle mi fêt !

OCTAVE : - Djåzans d' ôte tchwè, ça m' fêt må m' coûr.

MATHIEU: - Vosse coûr ? Adon, prindez vosse prudje.

OCTAVE : - Dj' el prindrè torade.

MATHIEU: - Mi, dji cour èvôye: dji m' dispêtche dè rintrer et d' apruster l' ovradje po vosse feume. C' est plêzîr avou leye... C' est vormint plêzîr... Ele est djinteye, banameye, corèdjeuse, bèle...

OCTAVE : - Ele fêt bin l' couhène !

MATHIEU: - Disk' a pu tård !

OCTAVE : - Racontez m' on pô çou k' èle vi fêt po magnî ?

MATHIEU: - (Come onk ki va ataker) A !... Nèni, dji n' a nin l' timp.

OCTAVE : - Rin k' on plat ?

MATHIEU: - I m' fåt co aler amon Dètry.

OCTAVE : - Passez po li drî... Dji va avou vos... Racontez m' !

Ake 3, Sinne 16

OCTAVE : - et DESIRE, adonpwis CLEMENCE

DESIRE: - Vos n' volez rin, Moncheu ?

OCTAVE : - Siya. A réze d' oûy, dji vou ene prudje tos les djoûs: å matin, å dîner et a l' nute. Dji m' va nèyî m' ponne divins l' prudje... hik...

DESIRE: - Vos estez målureu paret ?

OCTAVE : - Cwand dji tûze a çou k' dj' a pièrdou... (Clémence inteure et fêt sène a Désiré di s' têre Octave ni l' a nin vèyou) Dji l' inméve sins l' sèpi. A bout d' ine tchoke, veyez v', on roûveye k' on inme. L' amour, ci n' est nin come on må d' dint. On må d' dint ni s' lêt nin roûvî lu, min l' amour si catche. On direut k' il est honteu, l' amour, et mi, sins l' sèpi, dji l' inméve...Désiré !

DESIRE: - Hik...Moncheu...hik...

OCTAVE : - Vos n' dihez rin ?

DESIRE: - Dji m' dimande si ...hic... c' est d' li ptite rossète ki vos djåzez. (C' est Clémence ki lî a fêt dmander)

OCTAVE : - Biestreye çoula. I n a nole pitite rossète. O ! Dji n' di nin ki dji n' åreu nin bin volou, min lèye n' a nin volou. Et a cåze di leye... dj' a co mî inmé m' feume pask' èle mi féve del potéye ås rècènes, leye, èle mi féve tot çou k' dj' inméve bin, èle mi bouwéve, èle mi ranawîve... A ! Dji pou dire k' èle m' inméve po mi minme.

DESIRE: - Vos v' ripintez, direut on ?

OCTAVE : - O !,. dj' el vou bin creure !

DESIRE: - Et si elle esteut la, dji n' el riloucreu nin paski l' ome ni deu nin blazer divant ene feume, dji lî freu des lêds oûyes, dji l' acomptreu nin. Dji n' lî dirè måy çou k' dj' a sofrou a cåze di leye, dji n' vôreu nin k' èle li sèpasse po tot l' ôr dè monde. (Clémence mète si main so li spale da Octave) A ! Awè, Désiré, c' est deur. Vos avez bin des tinres mins, vos, asteure. On veut bin ki vos estez sins ovrèdje ! (I s' toûne et èl veut) Kimint, c' est vos k' est la ? !

CLEMENCE: - Awè, c' est mi, ki vz inme co puss ki davance. Et vos ?

OCTAVE : - Dji so prète a mori a vos pîs, po ottant ki dji v' pôye rabressî après !

CLEMENCE: - Ça n' nos arivrè pus, èdon ?

OCTAVE : - Nos nos batrans, nos nos towrans, min nos n' nos séparrans pu.

Li teule toume !

Harmonisation des graphies des textes régiolectaux présentés sur ce site: Årmonujhaedje

(Back page présentation théåtre wallon) Hay ervoye sol pådje divantrinne do teyåte e walon

Page de Jean Marie Warnier sur les genres remarcables en théåtre wallon.

(Back textes est wallons) Po raler sol pådje des scrîhèdjes è walon dè Payi d' Lîdje.

(Back homepage) Alans rzè al mwaisse pådje