Pêle-mêle de textes en walon oriental.

Hatche et matche e walon do Lvant.

 Dressêye:

Les bienfaits du bilinguisme chez l' enfant.

L' èfant ås deus lingadjes

Nos avans turtos cnohou des parints et des grands pannts ki djåzît walon inte di zels, mins ki fît tot leû ptit possibe po djåzer francès avou l' èfant. C'esteût avou l' francès k' li ptit (ou li ptite) arivreût a ene sacwè pus tård, et l' walon n' lî pôreût fé k' dè twért tot cmahant è s' pitite blonde tiesse les deus linguadjes. Les mêsses di scole n' estît-i nin la podrî pol acertiner ?

Il faut lire le beau livre que vient de faire paraître M. Dory, professeur à l'Athénée de notre ville (Liège) pour se rendre compte du mal que nous fait notre patois.

C'esteût è 1881 k' André Delchef., in ôteur walon portant, scriyéve çoula. Dispôy, di l' êwe a passè dzos l' Pont dz Åtches, et s'il est vrêye ki tot çou k' a candjî dispôy n' a nin tofêr situ dè bon costè, i n a dè mons ene sacwè k' a fêt on grand pas èn avant: c' est l' syince des lingadjes Bin sûr, i n a todi des djins ki djåzèt et c' est co...

(a sûre)

Marcel Slangen, divins: Djåzans walon, 4-1996.

Sermon prononcé à Liège lors de la visite retour des Wallons de Paris.

Prêtchèdje po les Parizyins.

Bin, dji vs el va dire tot dreut, bones et binameyès djins,... dji m' voreu bin têre...po k' nos polanse lèyî moussî è pus parfond d' nosse coûr çou ki Jézus Criss vint d' nos confiyî tot-asteure et çou ki torade, nosse camèråde Jules nos fa hoûter del Lète da Sint-Pîre : "L' Espwêr ki nos rimplih et ki nos dvans-t esse presses a-z espliker avou doûceur et respect. "... Espliker... ou bin dimani sins moti, lèyî toumer l' prêtchèdje ?... Et ki l' Bon Diu lu-minme si mosteure a vos oûy.

Et portant, i nos fåt-st espliker nost espwêr !

Djûdi passé, li feme d' on camarade mi dhéve : "Vos savez bin dji n' creu a rin, et d' abôrd, s' i n aveut-st on bon Diu, tot vèyant come li monde toûne, i rtoumreut mwért !"

Nèni i n' ritoumreut nin mwért on deuzinme côp. "Li Criss est mwért po les pètchîs on côp po totes ", avans-gn oyou lére.

Awè, ine feye po totes. Adonpwis "vos m' veurez... bin vikant. Et vos ôtes ossu, vos vicrez" Mins, po cnohe cist espwêr la, i n a k' ine vôye : c' est l' cisse di l' Amour. Fans ine fwèce po nos inmer et c' es-st adon k' nos ratacrans a viker.

Cwand dj' enn a m' compte des catchotreyes et des cis ki mètèt des wants po djazer, dji n' a k' a rdrovi l' Bone Novèle avou tos ses messèdjes, çou k' on es-st afêtî d' loumer l' Evandjîle. La, dè mons, ine sakî v' dit foû des dints k' awè, c' est awè, et nèni c' est nèni.

Cisse sakî la n' s' a måy chèrvou d' ine linwe di bwès, ki c' est minme po çoula k' on lî a fêt saveur çou ki l' bwès voléve dîre, li Bwès del Creu : on lî a minme fêt s' pôrtrêt !

Mins nos-ôtes, on-z a roûvî çou ki c' mêsse la aveut-st acsègnî, ou pus vite, on n' l' a wèzou sûre et on s' a lèyî aler foû vôye; on-z a dhindou la wice ki c' esteut pus åheye.

On s' a mètou a djouwer avou des tites : des "monsigneur", des "èccèlance", des ptits mêsses voci et des couroubètes vola... Et c' n' est co rin çoula : des tchîtchêyes, mins n' a-t-on nin trové k' i faléve broûler les djins po nnè fé des bons catolikes ? E-z èminer les neurs di l' Afrike po-z aler fé les deurs et les pus måssîs ovrèdjes di l' ôte dè costé del mér ? et, minme pol djoû d' oûy, èvoyî tot plin des divinès gråces et ine apostolike bènèdiccion å djènèrål Pinochet et a si cpagneye po les noces d' ôr di leu marièdje ?

Awè, vola kimint k' è nosse prôpe Eglîze, des djins avou des crosses (et nin dè crosses di pan) ont compté bin fé... N' est-ce nin on pô çoula k' a fêt k' on s' a må compris ?... Et k' i n a ki l' Bon Diu lu-minme ki sèrè capåbe di rtrover ses djonnes !

Inte ci-èt-don, i m' dimane a v' dîre, et a v' rèpèter après nosse camarade Robert, ki turtotes et turtos vos estez les binvnous.

Va co bin dabôrd k' i n' a nole usteye po mèzerer çou k' i n a è pus parfond dè coûr et del consyince : on sèreut sûr èwarè... des prumîs ki sèront les dièrins et les dièrins k' amousront po les prumîrès plèces.

Å réss, ci n' est nin nos afêres : nos n' avans nin a nos djudjî d' onk al ôte. Çou k' i nos fåt fé èdon c' est nos abwérder téls ki nos estans, et avou respect... minme avou on ptit sorîre. Ci n' est nin pask' on-z est rassonlé el catèdrale k' on s' deut rloukî come des posteures !

Et, par egzimpe, n' åyanss nin sogne di mostrer la k' nos estans difèrints. Assuré, li comûnion del messe c' est po les cis ki crèyèt ki rçûre li sinte Osteye, c' est prinde l' eurêye al manîre ki Jèzus lu-minme a volou. Mins li fiesse, li bone ètinte, in akeuy come ça dvreut esse, inte soûrs et frés pår k' i n al Walone di Paris ki fêt hôt avou nos-ôtes, ci rapoûlèdje la, c' est tot l' monde ki ça compète.

Dabôrd, ni l' avans-gn nin co mostré divant-z-îr al nute : awè, vormint nos estans d' acwérd di nos rtrover po des crwaziêres, nin po des crwazådes ! et ki ci seuye tot sûvant les cmandmints di l' Evandjîle, ou ki ci seuye tot hoûtant çou ki sofèle è nosse consyince (pocwè nin les deus essonle ?), lèyans toumer, åtou d' nos-ôtes, di l' Amour... treus gotes d' amour.

"Treus gotes d' amour ? mins... C' est l' boneur ! Wice volez-v' ki djèl våye cwèri ?" si dmandéve li macrê da Alice Closset.

Wice ? wice cwèri l' boneur ? I surdeye di l' amour : c' est d' la k' i vint foû. Wice ? wice èl trover ? Po nos-ôtes, les crustins, et mågré les droles d' egzimpes ki dji dhéve torade, et k' on s' a chervou del rilidjon po miner des guères et fé del politike, po nos-ôtes, l' amour ki prustih et ki fêt lèver l' vrey boneur mågré ponnes et displits, l' amour li pus foû-mèzeure, c' es-st addlé Jézus Criss ki nos l' trovans.

Ossu et po fini, dji tûze a ine fwèrt bèle priyîre da François Masset - ki c' est djusyumint ciste annêye dèdja dîh ans k' i nos a cwitè !- Françwes, di So-les-bwès,... on vî camèråde... sol trèvin d' ses dièrinnès annêyes, on s' a sovint håbité... Tot fant k' i n' crèyéve nin, mi dhève-t-i, i s' a mètou a scrîre çou k' voci, loukant ou mådjinant on crusfis :

"Tot djèmihant dzos mes ponnes, vo m' la dvant Voste îmådje : èle mi dit Vosse Mårtîre, ki Vz estez l' seul a cnohe... I Vz ont clawé sol creu, Vos deus grands bress å lådje, di sogne ki, tot morant, Vos n' les bènihîsse co"

Amen.

Gaston Schoonbroodt, divins: " Djåzans walon ", 3-1993, prêtchaedje dit li 16 di may 1993, po cwand les Walons d' Paris ont rivnu a Lîdje.

Li politike å tos les djoûs : responda do govierneu del Province di Lîdje.

 

L' ovrèdje d' on pårlumintêre, d' on mayeur, d' on govierneu.

Gaztî (G) - Jilbert Motard, vos estîz borguimêsse di Hologne e 1952, vos estez oûy govierneu del Province dispus dedja sacwantès annêyes Dji pinse k' on borguimêsse d' oûy et on borguimêsse d' i n a trinte ans, ci n' est nin pår li minme afêre?

Jilbert Motard (J.B.) - Djusse ! Dj' a l' èpinse k' i n' si ravizet wêre. Dji n' va nin dire ki c' n' est pus les minmes omes pask' enn a co k' estît dèdja adon è plèce et k' î sont co todi. Mins ça a fwârt candjî. Dji l' a veyu mi-minme, pôy ki dj' a sti rnoumè e 58, e 64 et e 1970, ça fêt a pô près 19 ans come mayeur. Mins inte çu ki s' passe oûy, et çu ki s' passéve e 1952, u minme e 1970, n a ene evolucion estrordinêre. Po cmincî, nos estîz li mayeur et deus scabins. Asteure, après les fûzions, i sont li mayeur et cink u chîh echvins. On n' djåzéve nin come asteure amwinnadjmint do teritoere, ecolodjeye. On n' aveuve nin les evestismint k' on a fêt - et k' on n' fêt pus målureuzmint, ca l' crize est la ossi. N aveuve djusse a c' moumint la in echvin d' l' instruccion, on scabin des travôs et l' mayeur ki féve tot l' resse. Et ki s' ocupéve co di rascovri çu k' les deus ôtes fît.

G: - On poléve dire, e c' tins la, l' administråcion d' ine comune, c' estéve ene afwere di famile?

J M: - C' estéve ene afwere di famile, foirt sovint, cwand djel raconte: dji cnohéve totes les botches d' egout, dji savéve bin, cåzu, a ké moumint k' on lz avéve etertinu li dierinne feye, et dji veyève bin, pask' èle si ristopît tinzintins, a ké moumint k' les aléve fali vni disbouchî.

 (a sûre) 

interview de G. Motard, gouverneur de la Province de Liège, par J. Brumioul, Médiathèque de la Province de Liège, 1992

Cassette : CRIWE

A propos d'une mode vestimentaire néfaste et ridicule

De influentia cravatis

 Lu saminne passêye, dj' a stu å docteur.

Po v' dire lu veur, duspôs adon, mu veye a totanett candjî, et c' n' est nin tant ku l' docteur m' a rwèri d' one sacwè !

Vos avez dèdja stu å docteur ?

Prumîrmint, on v' fêt intrer è-n one pitite place avou do vî tapis å mour et trinte-sîh tchèyîres rabracnêyes, la k' enn a nin minme deuss ki s' ravizet. On pôreut cåzî pinser k' i n' ont nin les mwayins, les docteurs.

C' est dayeurs Piron parey avou les notêres. Vos avez dèdja stu adré l' notêre ?

Mins mi, dju n' so nin biesse et dju m' rin bin compte ku c' est do cinema, tot çoula. Adon, on v' dene a léhe des rvûwes et des gazètes medicåles, rimpliyes du publicitès po tant d' mèdicamints diferints, k' on su dmande cumint les apotikêres plet co fé tni çoula è leu ptite botike et pocwè zels ossu n' bastihet nin so nosse vîhe casêre.

Inte deus rèclames, on-z aprind totes sôrtes d' afêres so des maladiyes tèlmint gråves k' i våt mètant mî houkî d' on côp l' Jilbert [croque-mort] po n' nin duvleur passer po la.

Çoula n' m' etone nin k' i gn a chake anneye on novê docteur a Mâmdî avou tot çou k' on-z invante come mèhin ådjourdu !

C' est tot foytant one du ces gazètes ku dj' a toumè s' on årtike fwart interessant s' one ètude syintifike k' a stu fêt o l' Amèrike. C' est bin normål ku c' seuhe o l' Amèrike ! I gn a pus k' zels k' ont l' fèning.

L' årtike djåzéve do bon abissèdje [irrigation] do cervê pol song et d' tot çou ki l' pléve espêtchî.

Statisticmint, one des totes prumîs cåzes do måva passèdje do song vè l' cervê sereut çou k' on loume one crawåte. I paret minme ku l' crawåte freut piède pol mon cincwante pourcants dol intèlidjince et des facultès mintåles du ci k' ènnè pwate.

Sol moumint, dju n' a gote rèyadji. Cu n' est k' tot rintrant o cabinèt do docteur ku dju rinda compte ku duzo s' blanc vantrin pindéve onk du ces bokets du stofe la. Et cwand k' i m' duna one ordonance longue a nnè rinde blètche [pâle (de jalousie)] lu proces vèrbål d' one sèyance du nosse consey, adon ku dju vnéve djusse po runovler les catchets du m' fème.

Dju m' a bin dit ku c' n' esteut nin tot twart çou k' esteut scrit o l' årtike. Vus rindoz v' compte: cincwante pourcants d' l' intèlidjince å diâle, çu n' est nin må ! C' est mètant po çoula k' on djåze d' on dmè-brake. Et dju n' veus wêre du difèrince inte hèrtchî tot on bwas ou seulmint one mitan.

Mi, al nute, dju rlouke lu tévé so totes les tchinnes: i fåt bin dmoni å corant des novèles, minme s' èle sont rårmint bones.

Duspôs k' dj' a léhou cist årtike la, mes ûs vèyet ôtmint, et dju m' a rindou compte k' on n' i prèzintéve cåzî ku des djins è crawåte. Insi, nos minisses, on n' les veut co jamês sins, po dècîder du rlèver les taxes. Minme nosse gros soflè d' prumî minisse.

Lu tévé l' a on djoûr acsègnî cwand plantéve on åbe o fond du s' corti. C' est bin l' seule afêre sûtiye ku dju l' a måy vèyou fé duvant one camera. A bin, ci djoûr la, ennè pwartéve nin. C' est bin l' proûve !

Mes vus rindoz v' compte? Maystadt, Wathelet, Spitaels, cincwante pour cants !

Et minme si l' Mathot lêt todi on boton drovi - 50% - i n' våt nin mî ku lz ôtes. Adré lu, c' est po sûr du nêhance [de naissance].

Co pé, å pårlumint, parèt k' sont oblidjîs dul mète. Çoula pôreut esplikî tot on hopê d' afêres. I sèreut mètant tins du candjî l' règlumint duvant k' on foute lu Beljike so s' panse podbon.

Après, on veut des "manèdjeus" et des bankîs, ces "wodèr-boys" la do l' economiye k' èvoyet des meyes du djins å chômèdje, sayî d' nos esplikî les cwè et kesse dol crize economike. Dju n' a måy rin compris a totes leus salådes. Dju vou bin creure : pwartèt do trinte-noûf adon ku l' cwarante-cink est co trop streut.

Tot-z alant ovrer dvant-z-îr, dj' a rescontrè m' camaråde Djôzef. D' avance, on fzéve les chîjes essonle al minme machine, et on s' intindéve come des frés po dfinde lu ptit ovrî. Mins l' an passè, i l' a stu vôtè come delèguè syndicål, et duspôs adon, i n' mu dit cåzî pus bondjoûr et n' djåze pus ku d' rantabilitè et d' productivitè avou s' bê costume èt... s' rodje crawåte.

Dj' ennè vinreu minme a dner l' absolucion a m' gamin po aveur raté cwate fiyes l' universitè. I l' avéve portant bin apris inte deux ribotes a Lîdje. Mins po ses egzamins, i l' a stu oblidjî d' èfiler ses moussores do dimègne, blanke tchumîhe et crawåte bin nokiye. C' esteut sûr po s' mète al hôteur des professeurs.

Dju m' dumande si dju n' deureu nin scrire å minisse Di Rupo po egzijer du leyî m' gamin rsayî co one fiye, sins crawåte. Mins dvant, dju dmandrè cwandminme a l' oteur do l' årtike çou ki va do flot [ce qu'il en est du noeud papillon]. Après les biestihes dèbitêyes par ci mossieu la pol rintrêye des scoles, dju wadje ku çoula deut esse co bin pé.

Et mins vu rindoz v' compte: cincwante pourcants d' mon !

Mådjinoz on pôk cou ccoula candjreut si on supriméve ciste acceswâre ki n' siève a rin adré nos ajants d' polices, les militêres, les djudjes, sacwants fonccionêres et adrè nosse mayeur, ki, dju vous wadjî lu wåde sûr po dwarmi.

One chance po tos vos ôtes - nu roûviyoz nin k' vos fèmes, zèles, ènnè pwartet nin - tos vozôtes ki, o l' måhon, pôrîz rinde vosse crawåte et rprinde... lu pantalon

Fré Djuhan-Batisse (pseudonyme d'un membre du Royâl Club Walon d' Mâmdi), divins: Lu vî Sprawe, 1994.

Accent de Malmedy: si vous voulez prononcer avec l'accent original : L'accint d' Mâmdiy

 (Back homepage) Alans rzè al mwaisse-pådje

 Harmonisation des graphies des textes régiolectaux présentés sur ce site: årmonijhaedje.

 (Back textes est-wallons) Po raler sol pådje des scrîyèdjes e walon do Payis d' Lîdje.

 (Index par auteur) Indecse des oteus

 (Back page menu liégeois) Hay ervôye sol minèdje po les Lîdjwès .

Sacwants scrijhaedjes di cisse waibe chal polèt esse dizo abondroets; nos les rsaetchrans foû s' i fåt.

Some texts published on this site may be affected by copyrights and eventually need to be removed in the future.