Å bon timp, tot crèche, tot s' dispiète,

Et minme nosse keur si rboute å vète.

Vola l' bontimp, on-z est binåje

Pask' i nos done voltî one båje.

Nosse keur, asteure, est plin d' tchansons,

I n' cåze pu ki d' fleurs et d' mouchons.

Et nos veyans l' long des pî-sintes

One masse di fleurs din les plates-bindes

Ki mosturnèt totes leus coleurs

Et k' sintnèt bon po nosse bouneur.

Cand on noude leus finès hinéyes,

On-z est contint tote li djoûrnéye.

Dèdja les åbes, din l' noû solia,

Faiynèt leus båbes, pingnnèt leus tchvias.

Po les mouchons ossi, c' est l' fiesse:

L' mazindje vint tocter ås finiesses,

L' aronde si dispêtche a fé s' ni,

Elle è vout fé on paradi !

Din les åbes, c' est des tchîpelriyes,

Des rmouwe-minnadjes et des betchriyes:

Li djôye e-st è l' air, tos costés,

C' est l' bontimp k' nos a-st arivé.

Li tchanson dit k' å bia mwè d' maiy,

On pout darmu padrî les hayes.

Dj' a conu on certin prétimp

Ki nos a lai veuy mile toûrmints.

Ki l' bon Diu voûye ki nos efants

I n' fåt rin k' in avri, in clér avri ki tchante,

Avè des blancs nuwâdjes, des ptits matins friskets,

Avè des tinres flotchètes din l' djoûne verdure lûjante

Pou k' èm keur fuche come ene plume dè rotlet.

I n' fåt rin k' in efant, in ptit efant ki danse,

Av' in doûs clér sourire, avè des iys eureus

Ki fzont spiter del viye et des bèlès souvenances

Pou k' èm keur fuche lidjére come in tout ptit spirieu.

I n' fåt rin k' in sourire din ene poûve grije matinéye,

In grand signe d' amitié, in ptit bondjoû d' å lon,

Ene frantche min k' on vous tind, in boun mot a l' afréye